1 Epilli 16 - Mawu a Mulluku

¹ Vano athu yaawaana nibokosi na Mulluku nave yaanihiya va nipuro niwa muwari mwa musasa atthipenlle Davide. Vano yaavelleella mikutho ddooshellelliha ni dda eyaattano wa Mulluku.

² Vano Davide amallihalle ovelleella mikuthonnddo, ahaadalisa athu mu nnddina na Apwiya.

³ Vano ahaakawella Aisraele attheene, allopwana ni atthiyana arive muthu mwitthi wa buledi, enthuli ya enama navettho keke ampesa.

⁴ Nave ahaatthoolla Alevi amodda wi erumeyelleke o nibokosi na echipangano na Apwiya ni wi evekelleke, yaathokozeke ni waallapella Apwiya Mulluku a Israele.

⁵ Asafu sika aari oohoollella nave oomukavihera yaari Zekariya, Yeiyele, Shemiramoti, Yehiyele, Matitiya, Eliyabu, Benaya, Obedi Edomu ni Yeiyele. Yaalla sika yatthoolliwe wi ekhalle awiipa asikoma ni azeze. Asafu sika aari awiipa misangwa,

⁶ Benaya ni Yehaziyele, allupa mukutho sika yaari awiipa mapallapata o nibokosi neechipangano na Apwiya.

Davide aniipa machipo owaatitimiha Apwiya

⁷ Vano nllapo nenno Davide aganizalle wi ello yawaamba ekhalle wiipa machipo owaathokoza Apwiya moohoollelliwa ni Asafu ni akhwaaye.

⁸ Athokozeni Apwiya, ithanani nnddina niwa, vuwihani mitteko ddiwa variyari va mitundu dda athu.

⁹ Wiipelleni machipo awaatitimiha, tthopoollani ddoottikhiniha ddiwa ddittheddene.

¹⁰ Kotellani nnddina niwa naweella, mirima dda oowaashaasha Apwiya ddihakallalle

¹¹ Muwaashaasheke Apwiya ni masiviiwa, okohella ekhoviiwa wa enthawi yoohimalla.

¹² Muupuwelleke mitteko ddoottikhiniha ni ezizindikiro ddiwa, mmo yaweeruzelliiwa athu,

¹³ nyu edduullu dda oorumeyelliiwa Israele, anamwani a ootthoolliwiiwa Yakobo.

¹⁴ Alliwa tti Apwiya Mullukwaahu, ennalamulella ellapo yavatthi ettheene.

¹⁵ Muupuwelleke echipanganwiiwa enthawi ettheene, mawiiwa yaalamulelliiwa wa mibado ddinchichi,

¹⁶ echipangano yakeraatthihalliiwa ni Abrahamu, lonjezo yallupenlliiwa wa Isaki,

¹⁷ nno yanisimikizalliiwa wa Yakobo wi ekhalle echipangano yoohimalla wa Israele wa enthawi yoohimalla.

¹⁸ Yaallota wi, “Kineerewuuvaha ellapo ya Kanani, wi ekhalle yoohallanaawo.”

¹⁹ “Yaariiwa athu aweerengeya, athu ooyeva, alleto mu ellapweeyo,

²⁰ eneeteeta ovenyera o mutundu mmodda ophiyera mutundu mmodda, ovenyera omwene omodda ophiyera omwene omodda,

²¹ Apwiya kheyaawakhullelle wi naari mmodda aanyingallelle, yahaahumullulla mamwene ekaamba ya alliwa.”

²² Yaallota wi, “Muhaattannye oozoziwaaka,* muhiweerelle yoonanara anamallotellaaka.”

²³ Wiipelleni Apwiya, nyu athu a va ellapo yavatthi ettheene, llalleyani dda ovullusa wiwa nllapo ni nllapo.

²⁴ Llalleyani dda ntitimiho niwa wa athu a mitundu ddittheddene. Tthopoollani dda ddoottikhiniha ddiwa wa athu a ellapo ddittheddene.

²⁵ Apwiya tti uullupalli, tti oophwanella otitimihiwa wunchichi, owoova okhwaranya milluku ddittheddene

²⁶ Milluku dda athu tti mafano, koma Apwiya yaaphatusa ddamuddullu.

²⁷ Ntitimiho ni omwene ddiri vamiitthoni viwa, masiva ni ohakallalla ddiri mpa mwiwa.

²⁸ Atitimiheni Apwiya, nyu athu a mitundu ddittheddene, akhullellani wi ntitimiho ni masiva tti ddayiwa.

²⁹ Tthamallani ntitimiho na nnddina na Apwiya, wannani ddoovelleella m'mathatoni a enyumbiiwa. Allapelleni Apwiya antitimiho ni aweella,

³⁰ tthukumellani vamiitthoni viwa, nyu athu attheene a va ellapo yavatthi, ddawoona, ellapo yavatthi yookeraattheya moollipa, yoohitikheya!

³¹ Ddooddullu ddihakallalle, ddavatthimva ddithapelle! Alleelleni athu attheene wi, “Apwiya sika enalamulella!”

³² Enyanja ni ddittheddene ddiri mwemmo ddithurume, emata ni ddittheddene ddiri mwemmo ddihakallalle!

³³ Miteekho dda muutthakoni ddiipeke moohakallalla vamiitthoni va Apwiya Vawi enimawa wi yeeruze ellapo yavatthi.

³⁴ Athokozeni Apwiya vawi tti aphaama, echikondiiwa yoohisintheya tti ya enthawi yoohimalla!

³⁵ “Nyu Mulluku oovullusaahu, nivulluseni, nitthukumaniheni ovenyera variyari va athu a mitundu ddimodda wi nithokoze nnddina nanyu naweella, wi nikotelleke otitimiheya wanyu.

³⁶ Oodala tti Apwiya Mulluku a Israele, ovenyera o enthawi yoohimalla, wa enthawi yoohimalla!” Vano athu attheene yahaakhulla wi, “Amen” nave yahaatitimiha Apwiya.

Ollapella o Yerusalemu ni o Gibiyoni

³⁷ Sika mwene Davide aamuhiya Asafu ni abalaaye nko waari nibokosi na echipangano na Apwiya wi erumeyelleke enthawi ddittheddene wonanko mmo wapaalleya nirive nllapo.

³⁸ Obedi Edomu ni abalaaye 68 yaanakaviherana muttekooyo. Enthawi yeeyo Obedi Edomu, mwaana a Yedutuni navettho Hosa yaari alonda a va mullako.

³⁹ Vano Davide aamuhiya Zadoki, mullupa mukutho ni allupa mukutho akhwaaye o musasa wa Apwiya, nipuro noollapellamo o mwaango wa Gibiyoni.

⁴⁰ Aahiyalle wenko wi enthawi ddittheddene evelleelleke mikutho ddooshellelliha ohinase ni misikuwa, voothwarani ddittheddene ddalembiwe mu nibukhu na malamulo a Mose ayo Apwiya yaalamulalliiwa Aisraele.

⁴¹ Athwaayo yaari vamodda ni Hemani ni Yedutuni ni amodda ayo yatthoolliwe mowaaromolla manddina wi yaathokozeke Apwiya vawi echikondiiwa yoohisintheya tti ya o enthawi yoohimalla.

⁴² Hemani ni Yedutuni yahoollella wiipa misangwa, mapallapata ni ezida ddimodda navettho ezida ddimodda ddawiipella machipo oollapella. Anamwani a Yedutuni yaahiyalle wi ekhalle alonda a va mullako.

⁴³ Vatulli viwa athu attheene yaavenyawo, arive muthu aya owaniwa. Navettho Davide aaya owaniwa wi adalise nibanja naye.