1 Epilli 15 - Mawu a Mulluku

Enakhozekella wi yakuse nibokosi na echipangano

¹ Davide aamaka enyumba ddimodda mu muzinda wa Davide. Nave aakhoza nipuro na nibokosi na echipangano na Apwiya atthipella musasa moohiyamo nibokosinno.

² Vano Davide aallota wi, “Kheyiivo enaatukhulle nibokosi na echipangano na Mulluku oyaana onipuroni koma Alevive vawi Apwiya yahaatthoolla wi etukhulle nibokosi ni wi yaarumeyelleke wa enthawi yoohimalla.”

³ Nave ahaatthukumaniha Aisraele attheene a o Yerusalemu wi yakuse nibokosi na echipangano na Mulluku, eweena o nipuro niwa nko anikhozelleeye.

⁴ Vano Davide aatthukumaniha edduullu dda Aroni ni Alevi amoddattho.

⁵ Mwa anamwani a Kohati, Uriyele sika aari ohoollella nave olliye ni abalaaye attheene yaarivo 120.

⁶ Mwa anamwani a Merari, Asaiya sika aari oohoollella nave olliye ni abalaaye attheene yaarivo 220.

⁷ Mwa anamwani a Gereshomo, Yowele sika aari oohoollella nave olliye ni abalaaye attheene yaarivo 130.

⁸ Mwa anamwani a Elizafani, Shemaya sika aari oohoollella nave olliye ni abalaaye attheene yaarivo 200.

⁹ Mwa anamwani a Hebroni, Eliyele sika aari oohoollella nave olliye ni abalaaye attheene yaarivo 80.

¹⁰ Mwa anamwani a Uziyele, Aminadabu sika aari oohoollella nave olliye ni abalaaye attheene yaarivo 112.

¹¹ Vano Davide aawiithana allupa mukutho, Zadoki ni Abiyatara, owaakattho Alevi monga Uriyele, Asaiya, Yowele, Shemaya, Eliyele ni Aminadabu.

¹² Nave ahaalleella wi, “Nyu tti oohoollella a mabanja a makhollo a Alevi. Muddeellihe weekhiinyu ni abalaanyu wi mwakuse nibokosi na echipangano na Apwiya Mulluku a Aisraele nave mwanihiye o nipuro nno kakhozilleemi.

¹³ Vawi khe nyuwaano mwanitukhullalle vawaamba valle, Apwiya Mullukwaahu yaanillaka ekaamba yawi khenaanipwathille moollikana ni mmo yapaallelliiwa.”

¹⁴ Sika allupa mukutho ni Alevi yaaddeelliha weekhiiwa wi yakuse nibokosi na echipangano na Apwiya Mulluku Israele.

¹⁵ Vano Alevi yaanitukhulla nibokosinno vamathurini viwa voopharihellani mutteko ekopo moollikana ni mmo Apwiya yalamulelliiwa oweella mwa Mose.

¹⁶ Vatulli viwa Davide ahaalamulattho oohoollella a Alevi wi yaatthoolle amodda mwa abaliiwa wi yiipeke ni murimiiwa muttheene voopharihani mutteko azeze, magitala ni mapallapata wi mawu eehakallallo yiiweyeke phaama.

¹⁷ Sika Alevi yaamutthoolla Hamani, mwaana a Yowele nave mwa abalaaye yaamutthoolla Asafu, mwaana a Berekiya ni Etani, mwaana a Kushaya Mwa edduullu dda Merari.

¹⁸ Nave a va abaliiwaayo yahaatthoollattho owaathwarellelliiwa, Zekariya, Yaaziyele, Shemiramoti, Yehiyele, Uni, Eliyabu, Benaya, Maaseiya, Matitiya, Elifelehu ni Mikineya owaakattho alonda, Obedi Edomu ni Yeiyele.

¹⁹ Athu awiipa, Hemani, Asafu ni Etani sika yiipa misangwa ddamukuwa.

²⁰ Zekariya, Aziyele, Shemarimoti, Yehiyele, Uni, Eliyabu, Maaseiya ni Benaya sika yiipa azeze ooruma wunchichi.

²¹ Koma Matitiya, Elifelehu, Mikineya, Obedi Edomu, Yeiyele ni Azaziya sika yahoollella, yiipaka ezida dda mawu ookittha.

²² Kenaniya, oohoollella a Alevi vawiipani machipo sika aahoollella wiipanko vawi aari eeruso.

²³ Benekiya ni Elikana sika yatthoolliwe wi ekhalle alonda a nibokosi na echipangano.

²⁴ Allupa mukutho, Shebaniya, Yoshafati, Natanele, Amasai, Zekariya, Benaya ni Eliyezere sika yaphwanella wiipa mapallapata vahoollo va nibokosi na echipangano na Mulluku. Obedi Edomu ni Yehiya alliwa yaarittho alonda a nibokosinno.

Nibokosi na echipangano ninakuselliwa o Yerusalemu

²⁵ Sika mwene Davide ni attekweene a Aisraele navettho uullupalli a akhoto 1,000, moohakallalla yaaya yakusa nibokosi na echipangano na Apwiya o enyumba ya Obedi Edomu.

²⁶ Voopaallani wi Mulluku aakavihere Alevi ootukhulla nibokosinno, athwaayo yaavelleella mukutho wa anankhoro eeng'ombe atthanu ni eelli ni anankhoro eenkhosa atthanu ni eelli.

²⁷ Nave Davide aari awarille mukanjo wabafuta wonanko mmo yawarelle Alevi ayo yatukhulla nibokosi na echipangano navettho athu awiipa machipo woonjereravo Kenaniya oohoollella machipo. Sika Davide aawarattho Efodi.

²⁸ Vano Aisraele attheene yaawaana nibokosi na echipangano na Apwiya ekhuwaka nave yiipaka eziitolilo, mapallapata ni misangwa. Nave yaaniipattho azeze ni magitala.

²⁹ Vano nibokosi na echipanganonne niphiyalle mu muzinda wa Davide, Mikala, mwaana aamutthiyana a Saulo aatthurumella vaniwindoni nave aamoona mwene Davide iinaka navettho ahakallallaka. Vaavo mutthiyanooyo ahaamba omuvevusa m'murimani mwaye.