1 Epilli 14 - Mawu a Mulluku

Mitteko dda Davide o Yerusalemu

¹ Nave Hiramu, mwene a o Tiro ahaarumiha amithenga wa Davide ni miteekho ddamukunguza vamodda ni athu eeruso yoodduwella omaka voopharihellani mutteko malluku ni matabwa wi yamumakelle enyumba yoomwene.

² Vano Davide aadduwella wi Apwiya yaamukeraatthiha wi akhalle mwene a Israele navettho wi aawelliha omwenaaye ekaamba ya Aisraele, athwiiwa.

³ Davide ahaatthella atthiyana amodda o Yerusalemu nave ahaayara anamwani amodda aallopwana ni aatthiyana.

⁴ Anamwani aayarilleeye o Yerusalemu yaari Shamuwa, Shobabu, Natani, Solomoni,

⁵ Ibara, Elishuwa, Elipeleti,

⁶ Noga, Nefegi, Yafiya,

⁷ Elishama, Beeliyada ni Elifeleti.

Davide anaagonjiha Afilisti

⁸ Afilisti yiiwalle wi Davide oozoziwa* omwene woolamulella ellapo ya Aisraele ettheene, Afilisti attheene yaaya wi yamphare. Nave Davide iiwalleeye ddennddo, aakhuma wi awanena ekhoto.

⁹ Vano Afilisti yaaphiya va ntapo na Refaimu yaamba woononga ddeko ni owaana.

¹⁰ Vaavo Davide aamukoha Mulluku wi, “Ethiyo kiyeewo kawanena Afilisti? Ethiyo muneerewaavelleella m'mattani mwaka?” Nave Apwiya yaamwaakhulla wi, “Khawe, kineerewaavelleella m'mattani mwawo.”

¹¹ Sika Davide aaya o Baala Perazimu awanana ekhoto nave ahaagonjiha Afilistaayo. Vano aallota wi, “Mulluku ookiphariha mutteko wi kaagonjihe adanaaka wonanko maaddi eechigumula.” Sika ekaambiiwa nipuro nenne ninaromolliwa wi Baala Perazimu.

¹² Vano Afilisti yaaddihiya milluku ddiwa eddihella munllo moollikana ni mmo Davide alamulelleeye.

¹³ Nave enthawi emodda Afilisti yaahokollowattho ontaponi wulle yaamba woonongattho ddeko.

¹⁴ Vano Davide aamukohattho Mulluku nave Mulluku aamulleella wi, “Ohinawanana moowehanana koma owaapheelle nave waaphiyere otulli wiwa nave waahelle ekhoto vanipuroni noowehana ni miteekho.

¹⁵ Vano wiiwa onyakulla wa etthoka dda miteekhonnddo sika vaavo okhume wawanena vawi Apwiya eneerewuuhoollella wi waagonjihe akhoto a Afilisti.”

¹⁶ Vano Davide aheera moollikana ni mmo Mulluku amulamulelleeye. Nave yaagonjiha mulloko wakhoto wa Afilisti ovenyera o Gibiyoni ophiya o Gezere.

¹⁷ Ovuwa wa nnddina na Davide waamwareyella mu ellapo ddittheddene nave Apwiya yaaweeriha athu a mitundu ddittheddene wi emooveke.