1 Epilli 13 - Mawu a Mulluku

Otthaamihiwa wa nibokosi na echipangano o Kiriyati Yearimu

¹ Vano mwene Davide aaveka ezeru ovenyera wa oohoollella akhoto uullupalli ni ang'onong'onweene.

² Nave vatulli viwa Davide aallota wa mutthukumano muttheene wa Aisraele wi, “Ddaarimi dduuddivellakani navettho yaarimi eri yoopaalla ya Apwiya Mullukwaahu, hankoni nimwaramwareye, nirumihe mawu wa abaliihu attheene ayo ehanlle mwiillaponi ettheene ya Israele ni wa allupa mukutho ni Alevi m'mizindani ni mizi ddiwa wi ewe wuno ekhalle ni hiyaano.

³ Vano hankoni niweenattho nibokosi na echipangano na Apwiya vawi khenaanipwathille va enthawi ya Saulo.”

⁴ Nave mutthukumano muttheene wahaakhullella weera ddennddo vawi ella yaari ello yaphaama vamiitthoni va athu attheene.

⁵ Sika Davide ahaatthukumaniha Aisraele attheene ovenyera o muhinje wa Shihori o Iguputo ophiya o mullako wa Hamati wi eweena nibokosi na echipangano na Mulluku ovenyera o Kiriyati Yearimu.

⁶ Nave Davide ni Aisraele attheene yaaya o Baala, o Kiriyati Yearimu o Yuda wi yakuse nibokosi na echipangano na Mulluku. Nibokosinno nadduwanyeya moollikana ni nnddina na Apwiya ayo yakhalla va akerubi* wonanko va mpando woomwene.

⁷ Nave yaatukhulla nibokosi na echipanganonno va nigareta nanaanweene ovenyera o enyumba ya Abinadabu. Uza ni Ahiyo sika yeetiha nigaretanno.

⁸ Vano Davide ni Aisraele attheene yaari ehakallallaka ni murimiiwa muttheene vamiitthoni va Mulluku, enamwiipella machipo ni azeze, magitala, ekoma, misangwa ni mapallapata.

⁹ Vano ephiyalle onipuroni woomuuputhellawo tirigu o Kidoni, Uza aatukhulla nnatta naye wi aphare nibokosinne vawi eng'ombe ddamagareta ddaakwakwatuwa.

¹⁰ Enthawi yeeyo Apwiya yaamushella murima Uza nave yaamwiipha kaambiiwa aatukhulla nnatta naye aphara nibokosinne. Sika akhwenlle vaavo vamiitthoni va Apwiya.

¹¹ Vano Davide aasha murima ekaamba yawi Apwiya yaamwiipha Uza. Sika nipuro nenno ninaromolliwa wi Pereziuza ophiyera ollello.

¹² Vano nllapo nenno Davide aamoova Mulluku nave aallota wi, “Ethiyo kinaaphiyena mwawiidde nibokosi na Mullukunna?”

¹³ Sika Davide khaayiillena nibokosinne owaniwa, o muzinda wa Davide koma anihiyalle o enyumba ya Obedi Edomu Mugiti.

¹⁴ Sika nibokosi na echipanganonno naakhalla wa Obedi Edomu wa miyeri miraru mpa mwaye. Nave Apwiya yaadalisa nibanja na Obedi Edomu ni ddittheddene aariiyena.