1 Epilli 11 - Mawu a Mulluku

Davide anazoziwa wi akhalle mwene

¹ Vano Aisraele attheene yaatthukumana vamodda wa Davide o Hebroni nave yaamulleella wi, “Ngoonani, hiyaano ni nyuwaano niri a nikhame nimodda.

² Khalle Saulo aariiye mwene, mwaanaahoollella Aisraele okhotoni ni ohokollowanattho. Nave Apwiya Mullukwaanyu yaallota ni nyuwaano wi, ‘Oneerokhalla wonanko mbusa a athwaaka, Aisraele nave oneerokhalla mwene a athwaaka, Aisraele.’ ”

³ Sika oohoollella attheene a Aisraele yaawa o Hebroni o Hebroni nave Davide aakeraatthihana echipangano wenko vamiitthoni va Apwiya. Nave yaamuzoza Davide wi akhalle mwene a Aisraele moollikana ni mawu a Apwiya yallotiwe ni Samuele.

⁴ Vano Davide ni Aisraele attheene yaaya o muzinda wa Yerusalemu oyo waromolliwa wi Yebusi vawi waanakhalla Ayebusi, aneetthi a ellapweeyo.

⁵ Vano Ayebusi yaamulleella Davide wi, “Wuno khovollowawo” Koma Davide ahaakha mpandiiwa wa Ziyoni awuromolla wi muzinda wa Davide.

⁶ Davide aallota wi, “Arive muthu anaambe owiipha Ayebusi aneerokhalla oohoollella muullupalli a mulloko wa akhoto.” Nave Yowabu mwaana a Zeruya sika aari awaamba oyaawo mwawi aari oohoollella muullupalli a mulloko wa akhoto.

⁷ Nave Davide aanakhalla mumpandanimmo nave waromolliwa wi muzinda wa Davide.

⁸ Vano aamakattho muzinda waapheella nipuronno ovenyera va mpanda wa Milo nave Yowabu sika apotokosille embali ddimodda dda muzindooyo.

⁹ Vano Davide aavirellella okhalla ni masiva manchichi vawi Apwiya Amasiva Mattheene yaari ni olliye.

Akhoto oovuwa a Davide

¹⁰ Vano alla sika oohoollella akhoto amasiva a Davide. Alliwa vamodda ni Aisraele attheene yaamukavihera mu omwenaaye moollikana ni mawu a Apwiya oollota dda Israele.

¹¹ Ntthopoollo na akhoto amasiva a Davide naari Yashobeamu mwaana a Muhakimoni, muullupalli a akhoto araru oovuwesesa. Nave nllapo nimodda aawiipha athu 300 ni nivaka naye enthawi emodda.

¹² Nave mmoddattho mwa athu ararwaalle aari Eleazara mwaana a Dodo, Muahohi.

¹³ Olliye aari ni Davide o Pasidamimu mvo Afilisti yatthukumanilliiwa wi ewanena ekhoto mu emata yabarele. Athu yahaathawa Afilistaayo

¹⁴ koma Eleazara ahiimella muwariwari mwa emata aayiteteza nave aawiipha Afilistaayo. Sika Apwiya yahaavullusa ni waapambaniha wuullupalli.

¹⁵ Nllapo nimodda, araru mwa oohoollella akhoto 30 yaaya o nlluku nko wakhalla Davide o nikhungu na Adulamu. Vakhuviru ni wenko akhoto a Afilisti yaatthipellawo misasa ddakhoto o ntapo na Refaimu.

¹⁶ Enthawi yeeyo Davide aari munikhunguni mulle nave mulloko wakhoto wa Afilisti waari o Betelehemu.

¹⁷ Vano Davide aavolliwa nthona wunchichi nave aallota wi, “Aarikivo oyo anaarike maaddi wiihimeni eyo eri va mullako wa Betelehemu, aaweerokivaha wi kiwirye!”

¹⁸ Vano athu araru amasivaalle yaakhwaranya misasa dda Afilisti nave yaarika maaddi veehimeni ya Betelehemu eyo yaari vakhuviru ni va mullako valle. Nave yaakusa maaddaayo ewaana wa Davide. Koma Davide khaawiryalle maaddaayo, aawiithella muthaani wonanko yoovelleella wa Apwiya.

¹⁹ Nave aallota wi, “Kinimallupella vamiitthoni va Mulluku wi ngeera ddenndda. Onaakhalle wonanko owirya nikhame na athu ayo ehiyalle okumiiwa vooswaani.” Sika aakhoota waawirya. Nndda sika yeerille akhoto araru amasivaalle.

²⁰ Vano Abishai, mwanamunne a Yowabu aari owaahoollella athu 30. Vano aawiipha athu 300 nave aavuwa wonanko athu ararwaalle.

²¹ Aavuwa wunchichi mwa athu 30 nave aakhalla oohoollella koma khaavuwalle wonanko ararwaalle.

²² Nave Benaya mwaana a Yehoyada a o Kabizeele aari muthu oollipa murima nave aphara mitteko dduullupalli. Olliye aawiipha akhoto eelli oovuwa a o Mowabu nave ahiipha mukango mu nlliti enthawi yooriirya.

²³ Nave aamwiiphattho Muiguputo mmodda ooneneva ni oorekama mamita meelli ni hafu. Muiguputooyo aakhalla ni nivaka nuullupalli m'mattani mwaye noophwanaphwana ni mukoko wa muthu awoopa ekuwo. Koma Benaya aaphiya wa olliye akusalle ekopo nave aamwaakha Muiguputoolle nivakanne amwiiphana.

²⁴ Ddenndda ddaamweeriha Benaya mwaana a Yehoyada ovuwa variyari va athu araru amasivaalle.

²⁵ Olliye aavuwa wunchichi mwa athu 30 koma khaavuwalle wonanko ararwaalle. Vano Davide aamutthoolla wi akhalle muullupalli oolamulella akhotwaaye oomuteteza.

²⁶ Nave akhoto amasiva amodda yaari Asahele mwanamunne a Yowabu, Elihanani mwaana a Dodo a o Betelehemu,

²⁷ Shamoti a o Harodi, Helezi Mupeloni,

²⁸ Ira, mwaana a Ikeshi a o Tekowa, Abiyezere a o Anatoti,

²⁹ Sibekai Muhushati, Ilai Muahohi,

³⁰ Mahari a o Netofa, Heledi, mwaana a Baana a o Netofa,

³¹ Itai mwaana a Ribai a o Gibea, Mubenjamini. Vaakhallattho Benaya a o Piratoni,

³² Hurai a o mihinje dda o Gaashi, Abiyele Muarabati,

³³ Azimaveti a o Baharumi, Eliyaba a o Shaaliboni,

³⁴ Hashemu Mugizoni, Yonatani, mwaana a Shage Muharari,

³⁵ Ahiyamu, mwaana a Sakara Muharari, Elifala mwaana a Uri,

³⁶ Hefere Mumekerati, Ahiya Mpeloni,

³⁷ Heziro a o Karimele, Naarai, mwaana a Ezibai,

³⁸ Yowele mwanamunne a Natani, Mibara mwaana a Hagiri,

³⁹ Zeleki Muamoni, Naharai a o Beeroti, ootukhulla ezida ddakhoto dda Yowabu, mwaana a Zeruya,

⁴⁰ Ira Muitiri, Garebu Muitiri,

⁴¹ Uriya Muhiti, Zabadi mwaana a Ahelai,

⁴² Adina mwaana a Shiza, Murubeni, oohoollella a Arubeni ni athu 30 aariiyena,

⁴³ Hanani mwaana a Maaka ni Yoshafati, Mumitini,

⁴⁴ Uziya Muashiterati, Shama ni Yeiyele anamwani a Hotamu, Mueroeri,

⁴⁵ Yediyaele mwaana a Shimiri ni Yoha mwanamunne Mutizi,

⁴⁶ Eliyele Mwahavi navettho Yeribai ni Yoshaviya, anamwani a Elinamu ni Itima Mumowabu,

⁴⁷ Eliyele, Obedi ni Yaasiyele Mumezobai.