1 Epilli 10 - Mawu a Mulluku

Okhwa wa mwene Saulo

¹ Afilisti yaawanattho ni Aisraele nave Aisraele yahaathawa Afilisti koma anchichi yahiiphiwa vamwaangoni wa Gilibowa.

² Afilisti yaawiikariha Saulo ni anaaye nave yaawiipha anaaye araru Yonatani, Abinadabu ni Malikishuwa.

³ Ekhoto yaamunnuwella Saulo nave athu oovokha mipaamba yaamuhoma wawi aahoowa wunchichi ni oovokha mipaambaayo.

⁴ Nave Saulo aamulleella ootukhulla ezida ddaye ddakhoto wi, “Hullulla nsupada nawo okihomena, woova wi oohiphaddiwa ttuukittheya.” Koma ootukhulla ezidooyo aakhoota vawi aamoova. Sika Saulo aakusa nsupada naye amorellavo.

⁵ Ootukhulla ezida oonille wi Saulo ookhwa nayeene aamorellattho va nsupada akhwa.

⁶ Sika Saulo, anaaye araru ni nibanja naye nittheene yakhwelle nimodda.

⁷ Nave Aisraele attheene ayo yaari o ntapo yoonilliiwa wi mulloko wakhoto woothawa nave Saulo ni anaaye aakhwa, yaahiya mizinda ddiwa ethawa. Vano Afilisti yaaphiya enakhallamo.

⁸ Osaka wene Afilisti yaawa wi yaakhe dda athu awiiphiwaayo nave yaamuphwanya Saulo ni anaaye ekhwenlle vamwaangoni wa Gilibowa.

⁹ Yaamurulla ekusa murwaaye ni ezida ddaye ddakhoto, yaarumiha amithenga mu ellapo ettheene ya Afilisti wi yavuwihe wa athu ni milluku ddiwa.

¹⁰ Vano yahiiyaatthi ezida ddaye ddakhoto mu enyumba dda milluku ddiwa nave yaatthomeya murwaaye mu enyumba ya Dagoni mullukwiiwa.

¹¹ Nave athu attheene a o Yabeshi Giliyadi yiiwalle ddittheddene Afilisti yamweerelliiwa Saulo,

¹² allopwana attheene oollipa murima yaatimulla eya yakusa mutembo wa Saulo ni mitembo dda anaaye ewaana o Yabeshi. Nave yaavittha makhuviiwa vatthi va muteekho wamuthundu o Yabeshi nave yaahalla ocha* wa mallapo matthanu ni meelli.

¹³ Sika Saulo aakhwa ekaamba ya ohiroromelleya waye, khaawiiwellella Apwiya, mwawi khaasunga malamulo a Apwiya navettho aveka ezeru wa athu ayo yallota ni minepa dda athu ookhwa

¹⁴ nave khaapaalla wi Apwiya emuhoollelle. Sika ekaambiiwa Apwiya yamwiiphalliiwa, evelleella omwene wa Davide mwaana a Yese.