1 Atesalonika 3 - Mawu a Mulluku

¹ Hiyaano araru attheene khanaaworille ovillella. Sika naaganiza wi athu eelli nihalle weekhiihu o Atene,

² nave naamuruma Timoteo, mwanamunnihu oyo anaphara mutteko wa Mulluku ni hiyaano woollalleya othenga waphaama wa Khrisitu. Naamuruma wi uullipiheni mwiilli ni okavihera echikhulupilwaanyu,

³ wi mmodda ahihokollweelle mutulli ekaamba ya ddoohoosa ddenndda. Nyuwaano nyookha munnadduwella wi ddoohoosanndda Mulluku aari addaakhullelle wi ddeereye.

⁴ Vawittho naariihu ni nyuwaano, nahuulleellani moovallallella wi nineerohoosiwa. Mwawi ddiiddo ddaheereya wonanko mmo munadduwellaanyu.

⁵ Ella sika ekaambiiwa kimurumihalleemi Timoteo. Miyaano ngaawore ovillella, sika kaamuruma olliyooyo wi oone echikhulupilwaanyu. Vawi koova wi apaalle Satana aaweesani nave wi muttekwaahu muttheene waari woohikhalla ni mutteko.

⁶ Vano Timoteo oowaawo owaninyunko nave oonilleella epilli yaphaama ya echikhulupilwaanyu ni echikondaanyu. Oonilleella wi munnanuupuwella phaama mallapo mattheene nave wi munnapaalla onoona hiyaano wonankottho mmo ninapaallelleehu owoonani nyuwaano.

⁷ Ekaamba ya yeella, asinnihu ni arokorihu, echikhulupililwaanyu yoonillipiha murima mu mavihwaahu mattheene ni ddoohoosa ddahu ddittheddene.

⁸ Vawi khamunatikheya mu eyaattanwaanyu ni Apwiya vano mirima ddahu ddoottaphuwa.

⁹ Vano ninnawora omuthokoza wunchichi Mullukwaahu ekaamba ya nyuwaano. Ninnamuthokoza ekaamba ya ohakallalla niriihuna vamiitthoni vaye ekaamba ya nyuwaano.

¹⁰ Ninnamuveka otthaana ni mahiiyu ni murimaahu muttheene wi niwooneni nyuwaano vamiitthoni wi noonjerere ddooyelleella mu echikhulupilwaanyu.

¹¹ Ninamuveka Mulluku Attiitthiihu ni Apwiihu Yesu wi anihoollelle ettilla yoophiyera wa nyuwaano!

¹² Ninaaveka Apwiya wi yoonjerere ni wunnuwiha echikondaanyu va ookhulupilila akhwiinyu nave va athu attheene wonanko mmo echikondaahu va nyuwaano yunnuwelliiwa.

¹³ Mwa yeella aneerewuullipihani mirima ddanyu nave muneerokhalla aphaama ni aweella vamiitthoni va Mullukwaahu ni Attiitthiihu yaawaaka Apwiihu Yesu vamodda ni athwaaye attheene.