1 Atesalonika 2 - Mawu a Mulluku

Dda orumeyella wa Paulo mu Tesalonika

¹ Asinnihu ni arokorihu, nyuwaano nyookha munnadduwella wi owa wahu wa nyuwaano khawaari woohikhalla ni mutteko.

² Munnadduwella mmo nahooselliweehu ni onyaambusiwa o Filipi nihinawe wa nyuwaano o Tesalonika. Nave naari navaanyihiwe wunchichi, Mullukwaahu aanillipiha murima wi nuulleelleni dda othenga waphaama woovenyera wa olliyooyo.

³ Ollalleya wahu khonavenyera mwawoottha apaalle moonanara naarittho ohiri moomulleka arive muthu.

⁴ Koma ninnallalleya kaambiiwa Mulluku aanivaha hiyaano othenga waphaama. Sika ninallota ohiri waahakallalliha athu koma omuhakallalliha Mulluku oyo aneesa mirima ddahu.

⁵ Munnadduwella phaama ddene wi khanaallotille mooreera muwano apaalle ovenyera m'maganizoni a nrima, mbonaahu tti Mulluku.

⁶ Khanaapanlle waakhella olemu ovenyera wa arive muthu naari ovenyera wa nyuwaano apaalle wa amodda.

⁷ Naari wonanko amurummwa a Khrisitu, naakhalla ni masiva awuulamulani. Koma nahiithaalla naariihu ni nyuwaano, wonanko moowe anawuupaarelleeye anaaye.

⁸ Vano ekaamba ya wuukondani nyuwaano, hiyaano naakhozeka wuuvahani ohiri othengave waphaama wa Mulluku komattho okumaahu. Nyuwaano mwaari ookondiwaahu wunchichi!

⁹ Vawi munnuupuwella, asinnihu ni arokorihu mmo napharelleehu mutteko moollipihella! Naphara mutteko otthaana ni mahiiyu wi nihuukatamiheni nyuwaano nuullalleyelleehuuni othenga waphaama wa Mulluku.

¹⁰ Nyuwaano tti ambonaahu ni Mullukuttho wi makhallellwaahu wa nyuwaano munakhulupilila, yaari aweella, oolungama ni oohikhalla ni yoolakwa.

¹¹ Munnadduwella wi naamukavihera arive muthu a nyuwaano wonanko mmo mullopwana anaakaviherelleeye anaaye.

¹² Nahuullipihani murima, nahuukhurumusani murima nave naanuuvekani wi mukhalleke ni makhallello oomuhakallalliha Mulluku, oyo anawiithanani nyuwaano wi muvollowe mu omwenaaye nave mu ntitimiho naye.

¹³ Nave vookhalla ekaamba emodda ninamuthokozelleehu Mulluku erive enthawi. Ella tti yawi mwahaakhella othengaahu ohiri wonanko othenga woovenyera wa athu koma wonanko othenga wa Mulluku. Ddawoona olla tti wa Mulluku oyo onaphara mutteko mwa nyuwaano munakhulupilila.

¹⁴ Asinnihu ni arokorihu, nnddo ddeereyille wa nyuwaano tti ddoophwanaphwana ni ddeereyille o mipingo dda Mulluku o Yudeya wa athu a wenko oomuthwara Khrisitu Yesu. Mwaahoosiwa ni athu oowaninyu emoddamoddave yeeyo alliwattho yaahoosiwa ni Ayuda.

¹⁵ Ayudaayo sika yawiiphalle Apwiya Yesu ni anamallotella nave yaanihoosattho hiyaano. Khenamuhakallalliha Mulluku navettho enniitana ni athu attheene.

¹⁶ Alliwaalla yaheeseesa onihiiha hiyaano wi nihaallalleyelleke othenga athu ayo ehiri Ayuda wi evullusiwe. Mwawi ddiidda ahaanjerera machimwiiwa a nllapo ni nllapo. Nave osha murima wa Mulluku vano woophiya va yaayo!

Paulo anapaalla owoonattho Atesalonika

¹⁷ Vawi hiyaano, asinnihu ni arokorihu, nahiyanelleehu ni nyuwaano va enthawi yooyeva m'mwiillini ohiri m'murimani, naanapaalla wunchichi owoonanittho!

¹⁸ Napaalla ohokollweella wa nyuwaano. Miyaano Paulo wiilliwiilli kaheesa ohokollweella koma Satana sika anilephelihalle.

¹⁹ Vawi tti nyuwaano yootiyerellaahu, yoohakallallihaahu ni yookotellaahu va opambana wahu vamiitthoni va Apwiya Yesu va owa waye.

²⁰ Ddawoona, nyuwaano tti yookotellaahu ni ohakallalla wahu!