1 Akorinto 9 - Mawu a Mulluku

Ddoophwanella waakhella murummwa ni odindwaaye

¹ Miyaano ngihiyo oottaphulliwa? Miyaano ngihiyo murummwa? Ngimonne Yesu Apwiihu? Nyuwaano khamuri ezipaso dda muttekwaaka mu eyaattano ni Apwiya?

² Naari amodda khenakeera murummwa, nyuwaano munaphwanella okeera murummwa. Vawi Nyuwaano tti omboni wawooniha wi miyaano tti murummwa kaambiiwa mohaattana ni Apwiya.

³ Athu yaavaanyihaka wi ngihiyo murummwa, kinaakhulla mwawi ddiidda wiiteteza meekha.

⁴ Miyaano nginaphwanella ovahiwa yoocha ni yoowirya ekaamba ya muttekwaaka?

⁵ Miyaano ngiphwanenlle othwara echisanzo ya amurummwa amodda ni asinniwa a Apwiya ni Petro, voomutthellani mutthiyana ookhulupilila wi kimukuseke voolendonaaka?

⁶ Apaalle Baranaba ni miyaano tti weekhiihu ninaphwanella ophara mutteko wi nikhallena makobiri?

⁷ Ookhallavo akhoto aniillivella yeekhaaye? Ookhallavo oollima ahinacha mpesa woovenyera m'matani mwaye? Ookhallavo mbusa ahinawirya mukaka wa enkhosa ddaye?

⁸ Ethiyo kinalloteeminndda tti ezeru dda athu apaalle malamulo khenallota ello emoddamoddave yeeyo?

⁹ Vawi ddoolembiwa m'malamuloni a Mose wi, “Ohiyimake eng'ombe owanoni eyo enamuuputha tirigu.” Vano Mulluku anaaka dda eng'ombe?

¹⁰ Alloteeye ddenndde khaaka dda hiyaano? Ddawoona ddennddo ddaalembelliwe hiyaano. Oyo anallima ni oyo anahata enaphwanella ophara muttekwiiwa mootiyera okawanana ddoohatannddo.

¹¹ Noomidda mmiddo wa munepa variyari vanyu voollalleyani. Ethiyo tti ello yoohikhalla phaama nahata ddeko ddoopaalleya mu okumaahu ovenyera wa nyuwaano?

¹² Nave amodda yaphwanella waakhella ddenndda ovenyera wa nyuwaano, hiyaano khaninaphwanella wunchichi waakhella ddenndda? Hiyaano khanipharihalle mutteko yoophwanella yeella koma noovillella erive ello wi nihisellihe othenga waphaama wa Khrisitu.

¹³ Khamunadduwella wi athu enaphara mutteko mu enyumba ya Mulluku enaphwanya yoocha ovenyera mu enyumba ya Mulluku yeeyo nave allupa mukutho enaakhellana dda mukuthooyo.

¹⁴ Emoddamoddave yeeyo, Apwiya aalamula wi ayo enallalleya othenga waphaama enaphwanella yaakhelleke ddoopaalleya mu okumiiwa ovenyera mu ollalleyanko.

¹⁵ Koma ngipharihalle mutteko yoophwanella yeella naari emodda nave nginalemba ddenndda wi kuukoheni yoophwanella ya miyaano. Waaweerokhalla waphaama kaambilleke okhwa mmodda ahinaambe okillivella kaambiiwa aneerokivenyihera okotella waka woollalleya moohillivelliwa!

¹⁶ Koma kaallalleyaka khe ello yookiphwanelliha okota. Vawi miyaano koolamuliwa weera ddenndda. Otulli onaakhalle wa miyaano kaahillalleya othenga waphaama yoolla!

¹⁷ Kapharaka mutteko moopaalla mwaka, vano keerekopaalla ollivelliwa. Koma kaapharaka mutteko woohikhalla ekaamba ya opaalla waka sika wi muttekooyo tti odindo oyo Apwiya yakivalliiwa.

¹⁸ Vano kinallivelliwa mwawiidde? Ella tti yawi kaallalleyaka othenga waphaama, killalleyeke moohillivelliha, moohikoha yoophwanella ya muttekwaaka woollalleya.

¹⁹ Miyaano ngihiyoni kaporo a muthu mmodda koma kinnaddeera meekhaaka kaporo a arive muthu wi kaakopelle athu anchichi wa Apwiya.

²⁰ Kaapharaka mutteko ni Ayuda, kinnakhalla wonanko Ayuda wi kaakope yaayo. Naari miyaano meekhaaka nginalamuliwa ni malamulo a Mose, kinakhalla wonanko kinalamuliwa ni malamulo kaapharaka mutteko ni yaayo enalamuliwa ni malamulo wi kaakope alliwaayo.

²¹ Emoddamoddave yeeyo, kaapharaka mutteko ni athu oohilamuliwa ni malamulo a Mose kinakhalla wonanko muthu oohilamuliwa ni malamulo a Mose wi kaakope athu ayo ehiri Ayuda. Ella khenattaphullella wi nginathwara malamulo a Mulluku koma kinathwara malamulo a Khrisitu.

²² Kakhalla variyari va athu oofooka mu echikhulupililo kinakhalla oofooka wonanko mmodda a yaayo wi kaakope alliwaayo. Sika wa athu attheene kinakhalla wonanko alliwaayo wi apaalle kaavulluse amodda a yaayo voopharihani mutteko erive ettilla.

²³ Kineera ddittheddenndda ekaamba ya othenga waphaama wi nameenettho kaakhellena madaliso.

²⁴ Ethiyo khamunadduwella wi va mpikisano woothamaka athu anchichi ennathamakana koma mmoddave sika anathuviwa. Sika vano thamakakani phaama wi mwathuviwe.

²⁵ Arive muthu oothamaka, vookhozekellani anniihiiha va ddeko ddittheddene wi aakhelle emphaso yoomalla koma hiyaano nineera ddiiddo wi naakhelle emphaso yoohimalla.

²⁶ Sika nginathamaka kihinna yoolinga nave ngiri wonanko mullupa oowana ookusha.

²⁷ Kinnahiiha ni owutthattusa kaporo mwiillaka wi kihilephele kiri miyaano killalleyille othenga waphaama wa amodda.