1 Akorinto 8 - Mawu a Mulluku

Makoho a dda ddoocha ddooheraatthiwa mukutho wa mafano

¹ Vano kinaaka killote dda ddoocha ddooheraatthiwa mukutho wa mafano nnddo mwaalembilleenyu. Tti ddawoona wi attheene nookhalla ni ezeru. Vano ezeru ddinnaweeriha athu okota; koma echikondi sika enallipiha.

² Ayo eneesa wi ennadduwella ddeko, khenadduwelle nnddo yaphwanelliiwa odduwella.

³ Koma muthu aamukondaka Mulluku, Mulluku annamudduwella olliyooyo.

⁴ Sika vano kinuulleellani dda ocha ddoocha ddooheraatthiwa mukutho wa mafano. Ninnadduwella wi nifano khe ello eyo eri ni okumi; ninnadduwella wi Mulluku tti mmoddave.

⁵ Naarittho ddookhallavo ddeko nnddo ddineeriwa “milluku” oddullu apaalle vatthimva nave naari ddookhallavo ddinchichi dda milluku ddenndda ni apwiya anchichi,

⁶ wa hiyaano arivo tti Mulluku mmodda. Olliyooyo tti Attiitthiihu, Oophatusa ddeko ddittheddene nave ninnakhalla ni okumi wi nimurumeyelleke. Nave erivo Apwiya amoddave, Yesu Khrisitu. Ddeko ddittheddene ddaaphatusiwa mwa olliye navettho mwa olliye ninnakhalla ni okumi.

⁷ Koma khe arive muthu anadduwella yeella. Athu amodda aaddollweella mafano sika naari vano yaachaka yoocha yeella eneesave tti yooheraatthiwa mukutho wa mafano. Yawuupusella murimiiwa tti yoofooka nave enaganiza wi aaripihiwa ni yoocheeyo.

⁸ Koma yoocha kheneeriha wi naattane ni Mulluku; kheyiivo eyo ninarameehu naahicha yoocheeyo navettho nacha khaninaphwanyavo ello.

⁹ Vano chenjerani wi ottaphuwa wanyu vaweerani ddeko muhaakwakwatuwihe athu oofooka mu echikhulupililo.

¹⁰ Erimakhalla wi muthu ookhalla ni yawuupusella murima yoofooka, oowoona weyaano, muthu oodduwella, ochaka mu enyumba ya nifano, yeella khemullipiha mwiilli ocha yoocha yooheraatthiwa wa mafano?

¹¹ Sika vano ekaamba ya ezeru ddawo muthu oofooka yoolla, mwanamunno apaalle murokoriyo oyo Khrisitu amukhwenlleeye aneerewoonongiwa.

¹² Nave mwawi ddiidda vawaalakwellani asinninyu ni arokorinyu ni ophoreyiha yawuupusella murimiiwa yoofooka munamuchimwella Khrisitu.

¹³ Sika vano yoocha yamukwakwatulliha mwanamunnaka apaalle murokoraka, ngiwa kichattho enama yeella wi kihaakwakwatullihe.