1 Akorinto 7 - Mawu a Mulluku

Makoho a dda otthella

¹ Vano kaakhulle makoho mwaalembilleenyu. Tti waphaama wa muthu wi ahitthelle.

² Koma kaambiiwa vookhalla oraruwa wunchichi, tti waphaama wa arive mullopwana wi akhalle ni mwaariye nave arive mutthiyana akhalle ni mamune.

³ Mullopwana ahikhooteke okona ni mwaariye nave emoddamoddavettho mutthiyana ahikhooteke okona ni mamune.

⁴ Vawi mutthiyana khanalamulella mwiillaaye koma mamune sika analamulella. Emoddamoddave yeeyo mullopwana khanalamulella mwiillaaye koma mwaariye sika analamulella.

⁵ Muhikhootaneke koma vaavove mwiiwanane wi mweere ddiiddo va enthawi yooyeva wi mwiivelleelle wa Apwiya m'mavekelloni. Nave mweeddiiddo mukhallekettho nimodda wi Satana ahiweeseni ekaamba ya ohiihiiha wanyu.

⁶ Kinuulleellani ddenndda ohiri mowuulamulani koma moowaakhullellani wi muddeere.

⁷ Kapanlle wi arive muthu akhanlleke wonanko miyaano. Koma arive muthu oovahiwa yaayeyaaye yoovenyera wa Mulluku, muthu mmodda yawi yoori mmodda yawi yoori.

⁸ Vano kinallota wa ayo ehiri vanibanjani ni wa anaamukhwelle wi tti waphaama wa alliwa okhallave weekhiiwa wonanko miyaano.

⁹ Koma yaahiwora wiihiiha o minkhella ddiwa, eye yatthelle. Tti waphaama otthella ohiyana ni oviha mwiilli.

¹⁰ Nave wa athu ootthella, kookhalla ni lamulo, ohiri naaka koma na Apwiya wi mutthiyana ahimuhiye mamune.

¹¹ Koma amuhiya, anaphwanella wi ahitthelliwettho apaalle ahokollweellane ni mamunooyo. Nave mullopwana ahimuhiye mwaariye.

¹² Nave wa amoddanyu, miyaano, ohiri Apwiya kinallota wi ookhulupilila aamullopwana akhalla ni mwaariye oyo ahiri ookhulupilila nave mwaariyooyo aakhullella wi akhallekeve ni olliyooyo, mullopwanooyo ahimuhiye mwaariyooyo.

¹³ Navettho ookhulupilila aamutthiyana akhalla ni mamune oyo ahiri ookhulupilila nave mamunooyo aakhullella wi akhallekeve ni olliyooyo, mutthiyanooyo ahimuhiye mamunooyo.

¹⁴ Vawi mullopwana oyo ahiri ookhulupilila annaakhullelliwa wa Mulluku voopataanani ni mwaariye nave mutthiyana oyo ahiri ookhulupilila annaakhullelliwa wa Mulluku voopataanani ni mamune. Waahikhanlleke ddiidda, aniiwa yaaweerokhalla wonanko anamwani ayo ehiri ookhulupilila koma vawi ddiri ddiidda, ennaakhullelliwa wa Mulluku.

¹⁵ Nave oyo ahiri ookhulupilila apaalla omuhiya mukhwaaye ookhulupililoolle, amuhiye. M'millatuni ddawi ddiidda, ookhulupililoolle, aamutthiyana apaalle aamullopwana khanamakiwa. Mulluku oowiithanani wi mukhalle m'murendelleni.

¹⁶ Ookhulupilila aamutthiyana, onadduwella mwawiidde wi oneeromuvullusa mamunawo? Apaalle ookhulupilila aamullopwana, onadduwella mwawiidde wi oneeromuvullusa mwaariyo?

Mukhalleke moollikana ni mmo Mulluku awiithanilleeyeni

¹⁷ Arive muthu akhalleke moollikana ni mmo avahiweeye ni Apwiya nave wonanko mmo akhallelleeye iithaniweeye ni Mulluku. Nna sika lamulo kinahuddiheemi m'mipingoni ddittheddene.

¹⁸ Mullopwana oophaddiwa iithaniwa ni Mulluku, khanaphwanella otthattusa ophaddiwanko. Mullopwana oohiphaddiwa iithaniwa ni Mulluku, khanaphwanella ophaddiwa.

¹⁹ Vawi ophaddiwa naari ohiphaddiwa, khonna mutteko; enapaalleya tti othwara malamulo a Mulluku.

²⁰ Arive muthu akhalleke mmo aariiye iithaniwe ni Mulluku.

²¹ Ethiyo wiithaniweewe ni Mulluku waari ori kaporo? Ohikhupanye koma wakhalla ni ekari yoottaphulliwa, opharihe mutteko.

²² Vawi kaporo oyo iithaniwe ni Apwiya tti oottaphulliwa vamiitthoni va Apwiya; emoddamoddave yeeyo muthu oyo ahiri kaporo iithaniwe ni Khrisitu tti kaporwaaye.

²³ Mulluku ahuukullani nave aallivella, sika muhikhalle akaporo a athu.

²⁴ Asinnaka ni arokoraka, mu eyaattano ni Mulluku, arive muthu a nyuwaano akhalleke mmo aariiye iithaniweeye ni Mulluku.

Makoho a dda athu ehiri va nibanjani ni anaamukhwelle

²⁵ Vano ollota dda athu ehiri vanibanjani mwaalembelleenyu, nginna lamulo noovenyera wa Apwiya, kinallota maganizwaaka wonanko muthu oyo Apwiya yamweerelliiwa echifundo wi akhalle oororomelleya.

²⁶ Oganizera dda ddoohoosa ddamuttano, tti waphaama wa muthu okhalla wonanko mmo anakhallelleeye.

²⁷ Wookhalla ni mwaariyo? Sika ohaaheye omuhiya. Weyaano khonatthelle? Vano ohimwaashe mutthiyana.

²⁸ Koma watthella khe ochimwa nave namwalli atthelliwa khe ochimwa. Koma kapaalla wi muhoone ddoohoosa ddinakhalla ni athu ayo eri vanibanjani.

²⁹ Asinnaka ni arokoraka, eyo kinaakeemi tti yawi enthawi ehanlle tti yooyeva nave waambeella ollello, allopwana ootthella emuhiyeke Mulluku vahoollo wonanko khetthenlle.

³⁰ Emoddamoddave yeeyo ayo eninlla ekhalleke wonanko kheninlla, ayo enahakallalla ekhalleke wonanko khenahakallalla, ayo enakulla ddeko ekhalleke wonanko khenakhallana enakullewanndda,

³¹ ayo enaphariha mutteko ddeko dda vatthimva ekhalleke wonanko khennana mutteko ddekonnddo. Vawi ellapo yavattheella, mmo enooneyelliiwammu, khellekella omalla.

³² Kinapaalla wi nyuwaano muhihoosiweke. Mullopwana oohitthella anallipana ni ophara mutteko wa Apwiya nave anneeseesa waahakallalliha Apwiya.

³³ Koma mullopwana ootthella anallipana ni ddeko dda va ellapo yavatthi nave anapaalla omuhakallalliha mwaariye;

³⁴ nave vano anakhalla mpharapiilli. Mutthiyana oohitthelliwa apaalle namwalli anallipana ni mutteko wa Apwiya nave anapaalla akhalle aweella m'mwiillini ni m'munepani. Koma mutthiyana ootthelliwa anallipana ni ddeko dda va ellapo yavattheella nave anapaalla omuhakallalliha mamune.

³⁵ Kinallota ddenndda kaambiiwa kinapaalla wi kuukavihereni, ohiri wi kuuhiiheni ddoopaalla ddanyu. Koma kinapaalla wi mweereke ddaphaama nave wi mwiivelleelleke vawaarumeyellani Apwiya ni murima muttheene.

³⁶ Wa athu a va echitomelo koma ayo yaganizalle wi ehitthellane kinallota ddawi, mullopwana aaganizaka wi khokhalla waphaama wa mwaariye nave akhalla ni minkhella ddinchichi, vano ttuutthellana. Vawi yeera ddenndda khechimwalle.

³⁷ Koma mullopwana, moohiwatiheriwa, aganiza ni murimaaye muttheene wi ahimutthelle, awora ovillella minkhella ddaye nave aganiza m'murimani mwaye wi eere ddiiddo sika anneera phaama voohimutthellani namwallooyo.

³⁸ Sika mullopwana anamutthella anneera ello yaphaama nave oyo ahinamutthella anneerattho ello yaphaama wunchichi.

³⁹ Mutthiyana ootthelliwa anakhalla oomakiwa mamune akhalla ari mukumi; nave mamune akhwa, sika oottaphuwa wi atthelliwe ni mullopwana mmodda anamupaalleeye, mullopwanooyo akhalle ookhulupilila.

⁴⁰ Koma oganiza waka tti wawi anakhalla moohakallalla ni murimaaye muttheene akhalla oohitthelliwa. Nave kinaganiza wi kookhalla ni Munepa a Mulluku.