1 Akorinto 6 - Mawu a Mulluku

Omwiipa mullatu ookhulupilila mukhwaawo

¹ Mmodda a nyuwaano akhalla ni mullatu ni ookhulupilila mukhwaaye, enamullipiha mwiilli tti tini wi amusumelle wa oohimullapella Mulluku, ohiri wa athu a Mulluku wi yeeruze mwahooyo?

² Ethiyo khamunadduwella wi athu a Mulluku eneereweeruza ellapo yavatthi? Nave mwawora weeruza ellapo yavatthi, khamuwora weeruza millatu dding'onong'ono?

³ Ethiyo khamunadduwella wi nineeroweeruza angelo? Sika Nineerowora weeruza ddeko dda okumi yoolla.

⁴ Vano mwakhalla ni millatu dda ddeko ddenndda munaddisumella tini wa athu oohikhalla ni olamulello mumpingoni wi yeeruze?

⁵ Muwulliwe muru! Ethiyo vookhalla muthu mmodda eezeru variyari vanyu oyo anaawore weeruza mullatu variyari va ookhulupilila?

⁶ Koma vano ookhulupilila anaya o nthato namillatu omusumella ookhulupilila mukhwaaye wi athu oohimullapella Mulluku yeeruze mullatooyo!

⁷ Vawi munnakhalla ni millatu variyari vanyu, ddohooniha khalle wi nyuwaano tti oolephela wunchichi. Waaweerokhalla phaama wi muhiipaneke mullatu koma mwaahiye athu eweerellekeni ddoonanara nave ewiiyerekeni.

⁸ Koma tti nyuwaano munaweerella ddoonanara ni owiiyera naari eri ookhulupilila akhwiinyu.

⁹ Ethiyo khamunadduwella wi athu aweera ddoonanara kheyaakhella omwene wa Mulluku? Muhiddoottotthe weekhiinyu! Ooraruwa apaalle oollapella mafano apaalle ookonana ni allopwana akhwiiwa

¹⁰ apaalle allupaawiiya apaalle anrima apaalle oolezela apaalle oolalata, khaavo a yaalla anaawaakhelle omwene wa Mulluku.

¹¹ Amodda a nyuwaano mwaari awi ddiidda. Koma machimwaanyu yaakhululukiwa, mwaheellihiwa nave mwaheeriwa oolungama vamiitthoni va Mulluku mwa nnddina na Apwiya Yesu Khrisitu navettho Munepa wa Mullukwaahu.

Pharihani miilli ddanyu mu ntitimiho na Mulluku

¹² Athu amodda ennallota wi, “Kinnaakhullelliwa weera erive ello.” Ddawoona koma khe ddeko ddittheddene ddiri ddaphaama. Miyaano kinallota wi kinnaakhullelliwa weera erive ello koma ngilamulelliwa ni erive ello.

¹³ Athu amodda ennallota wi, “Ddoocha tti ddooya m'mirimani nave m'mirimani tti mwawaakhella ddoocha.” Ddawoona koma Mulluku aneerewoononga ddeko piilli ddenndda. Mwiilli khe waweerana ddooraruwa koma tti woowaarumeyellana Apwiya nave Apwiya sika enavaha ddoopaalleya dda mwiilli.

¹⁴ Mulluku ahaavenyiha wa ookhwa Apwiya, sika aneeronivenyiha hiyaano ni masivaaye.

¹⁵ Ethiyo khamunadduwella wi miilli ddanyu tti eziwalo dda mwiilli wa Khrisitu? Miyaano ttuukusa eziwalo dda Khrisitu ni odditthattusa eziwalo dda mutthiyana ooraruwa? Khe ddiiddo!

¹⁶ Apaalle khamunadduwella wi muthu oyo anakona ni mutthiyana ooraruwa ennatthattuwa mwiilli mmodda? Mawu a Mulluku enallota wi, “Eellaayo eneerokhalla mwiilli mmodda.”

¹⁷ Koma oyo anaattana ni Apwiya anakhalla mmodda ni alliwaayo m'munepani.

¹⁸ Thawani oraruwa. Erive yoochimwa eneeriiwa ni muthu khenaripiha mwiillaaye koma muthu ooraruwa anaripiha mwiillaaye.

¹⁹ Ethiyo khamunadduwella wi mwiillaanyu tti enyumba ya Munepa Waweella oyo anakhalla mwa nyuwaano navettho aavahiwe wa nyuwaano ni Mulluku? Khamunakhalla a nyuwaano weekhiinyu.

²⁰ Mwaakulliwa nave aallivella, sika pharihani miilli ddanyu wi mumutitimihe Mulluku.