1 Akorinto 5 - Mawu a Mulluku

Dda oraruwa mumpingoni

¹ Vano ddinniiweya wi vookhalla oraruwa variyari vanyu. Oraruwa wene tti wawi naari athu oohimullapella Mulluku kheneera. Koolleelliwa wi muthu annakona ni mwaara a attiitthinnya!

² Nave nyuwaano munakotella tini? Mwaphwanenlle m'moriweke ethakaraka nave muthu oyo enre ello yeella anaphwanella wi avenyihiwe variyari vanyu.

^3-4 Koma naari kirekamellane ni nyuwaano m'mwiillini, kinnuuganizerani. Koomweeruza khalle muthu aweera ello yeella wonanko kiri wenko, mu nnddina na Apwiihu Yesu. Mwaatthukumanaka vamodda kinaakhalleke vaavo m'munepani nave masiva a Apwiihu Yesu enaakhalleke vaavo.

⁵ Vano munamuvelleelle muthu yoolla wa Satana wi mitteko ddaye ddoochimwa ddoonongiwe vawi ddiidda munepaaye oneerovullusiwa va nllapo na Apwiya.

⁶ Kheyaphaama wi nyuwaano mwiitukhulleke! Ethiyo khamunadduwella wi, “Yisiti ooyeva annamufufumiha buledi muttheene”

⁷ Munaphwanella muvenyihevo machimo ayo tti wonanko yisiti akhalle wi mukhalle aweella wonanko buledi anaanweene oohikhalla ni yisiti. Muri aweella vawi Khrisitu, mwaanakhosa a Paska aaheraatthiwa mukutho.

⁸ Hankoni vano nihakallalle ni Paskaahu oohikhalla ni yisiti akhalle, yisiti a ddoonanara nave a machimo koma ni buledi oohikhalla ni yisiti, buledi a yaweella ni a yawoona.

⁹ Mu kalata oyo kaamulembilleemi, kahuulleellani wi muhaattaneke ni athu aweera ddooraruwa.

¹⁰ Vano nginaaka wi mwaathawe athu a ellapo yavatthi, ooraruwa apaalle anrima apaalle awiiya apaalle oollapella mafano. Kaambiiwa wi mwaathawe athu yaalla munaphwanella wi mukhumemo mu ellapo yavattheella.

¹¹ Eyo kaakeemi tti yawi munaphwanella wi muhaattane ni muthu oyo aniiromolla yeekha wi tti oomukhulupilila Mulluku koma ari ooraruwa apaalle anrima apaalle oollapella mafano apaalle olalata apaalle oolezela apaalle mullupaawiiya. Muhicheke vamodda ni muthu awi ddiidda.

^12-13 Kohiyo muttekwaaka oweeruza athu a otte wa mpingo. Mulluku aneeroweeruza. Koma ethiyo khamunaphwanella oweeruza athu a mumpingoni mwanyu? Mawu a Mulluku enallota wi, “Mumuvenyihemo muthu oonanara mumpingoni mwanyu.”