1 Akorinto 4 - Mawu a Mulluku

Amurummwa a Khrisitu

¹ Vano athu enaphwanella eneereke hiyaano oorumeyella a Khrisitu oopwatha ddookhuweya ddoovenyera wa Mulluku.

² Ello emodda yoopaalleya tti yawi oorumeyella yaalla ekhalle oororomelleya.

³ Vano miyaano nginnana mutteko ddawi kineeruziwe ni nyuwaano apaalle va nthato na athu navettho naari nginaddeeruza meekha.

⁴ Vawi nginoona ello yookivaanyiha m'murimani mwaka koma yeella khenasimikizella wi miyaano tti oolungama. Apwiya sika enakeeruza miyaano.

⁵ Sika muhimweeruze arive muthu enthawi yoophwanella ehinakwakhwane, owa wa Apwiya. Eneerewooniha ddawiipittheya dda mwiipiphini nave eneerewuupullulla maganizo a athu. Nave attheene eneerewaakhella ntitimiho naye na wa Mulluku.

⁶ Asinnaka ni arokoraka, killotilleeminndda tti dda miyaano ni Apolo wi nikhalle echisanzwaanyu wi dduuhuddiheni ottaphullella mawu awi, “Muthwareke nnddo ddalembiwe.” Vano muhiitukhulleke mwa muthu mmodda ni omuvevulla mmodda.

⁷ Ttaani aweerilleni nyuwaano uullupalli a athu amodda? Khahiyo Mulluku uuvahilleni erive ello muriinyuna? Vano muniitukhullella tini, wonanko eyo muriinyuna khe emphaso?

⁸ Ethiyo mookhallana khalle erive ello munapaalleenyu? Ethiyo vano muri eeyuuma? Ethiyo mookhalla mamwene vano naari hiyaano nihinakhallevo? Ddaawerokhalla phaama mwaakhanlleke mamwene wi hiyaanottho nikhalle mamwene ni nyuwaano.

⁹ Vano kinnoona wi Mulluku oovaha nipuro noovevuwa wa hiyaano amurummwa, wonanko athu elamuliwe wi yiiphiwe wonanko ello yawoonihiwa wa ellapo yavatthi ettheene wa angelo ni wa athu.

¹⁰ Hiyaano tti ookarangeya ekaamba ya Khrisitu koma nyuwaano tti eezeru mwa Khrisitu! Hiyaano tti oofooka koma nyuwaano tti amasiva! Nyuwaano munnavahiwa olemu koma hiyaano ninnavevulliwa!

¹¹ Ophiyera enthawi yeella hiyaano ninnavolliwa ettalla ni nthona, ninnawara matapwata, ninnuukuthiwa nave khaninna vookhalla vaahuvaahu.

¹² Ninnaphara mutteko ni mattaahu. Naatembeleliwaka, ninnadalisa. Naahoosiwaka, ninnavillella.

¹³ Naawoottheriwaka, ninnaakhulla ni mawu aphaama. Niri wonanko ddootathilliwa vaddallani dda ellapo yavatthi nave ophiyera ollello niri ddoonyaambusiwa!

¹⁴ Kinalembella ella wa nyuwaano ohiri kaambiiwa kuuwulliheni muru koma wi kuuhuddiheni wonanko muri anaaka ookondiwa.

¹⁵ Vawi naari murina ahuddihi 10,000 mu okumaanyu wa echikhulipililo, murina attiitthaanyu amoddave. Vawi mwa Khrisitu Yesu miyaano tti attiitthaanyu voowaana othenga waphaama wa nyuwaano.

¹⁶ Vano kinimuuvekani wi mukittakihere miyaano.

¹⁷ Sika ekaambiiwa kinamurumiheemi Timoteo wa nyuwaano, oyo ari mwanaka ookondiwa ni oororomelleya mu eyaattano ni Apwiya. Aneerowuupusani ettilla kinathwareemi mwa Khrisitu Yesu. Nndda sika kinahuddiheemi virive veko mu mipingo ddittheddene.

¹⁸ Amoddanyu munnakota kaambiiwa muneesa wi ngiwaawo owaninyu.

¹⁹ Koma Apwiya yapaalla kineeroowa wa nyuwaano veneva nave kineerewoona meekha masiva ayo athu ookotaalla eriiwana, ohiri nnddo enallotiiwa.

²⁰ Vawi omwene wa Mulluku khe wa mawuve koma tti wa masiva.

²¹ Munapaalla tini? Kiwe wa nyuwaano ni ekopo yawuuwashullanani apaalle ni murima wa echikondi ni woomaalleya?