1 Akorinto 3 - Mawu a Mulluku

Oorumeyella a Mulluku

¹ Ollota ddawoona, asinnaka ni arokoraka ngaaworille ollota ni nyuwaano wonanko mmo kinalloteemi ni athu ookhalla ni Munepa. Koma kaaphwanella ollota ni nyuwaano wonanko athu a ellapo yavatthimva, wonanko anamwani mu echikhulupililo ya Khrisitu.

² Kahuuwiryihani mukaka, ohiri wuuchihani ddoollipa kaambiiwa khamwaaworille ocha. Nave naari vano khamuwora ocha,

³ kaambiiwa munakhallave wonanko enakhallella athu a ellapo yavatthi ella. Vaakhalla ehache ni okangana variyari vanyu, nndda khaddinoonihella wi nyuwaano tti a ellapo yavatthi ella ni okhalla ni makhallello a muthu?

⁴ Mmodda a nyuwaano allota wi, “Mi tti a Paulo.” Nave mmodda allota wi, “Mi tti a Apolo,” khamunakhalla wonanko athu a va ellapo yavatthi ella?

⁵ Ni okhalla wene, Apolo ttaani? Nave Paulo ttaani? Hiyaano tti oorumeyella a Mulluku, ayo yuuhoollelleni o echikhulupililo. Arive muthu a hiyaano anaphara mutteko Apwiya yaamvahilliiwa wi aphare.

⁶ Miyaano kaamidda mmiddo, Apolo aahellella maaddi nave tti Mulluku eerihalle ddoomella wi ddunnuwe.

⁷ Oomidda naari oohellella maaddi tti oohipaalleya. Tti Mulluku ari oopaalleya kaambiiwa anneeriha ddoomellannddo wi ddunnuwe.

⁸ Ohiyana khawiivo variyari va oomidda ni oohellella maaddi. Nave Mulluku aneeromuthuva arive muthu moollikana ni mutteko aphanreeye.

⁹ Vawi hiyaano tti allupa mutteko akhwaaye a Mulluku nave nyuwaano tti emata ya Mulluku. Nyuwaanottho tti enyumba ya Mulluku.

¹⁰ Moollikana ni echisomo kaavahiweemi ni Mulluku, kaaphara mutteko woomaka phaama nave kaakeraatthiha matthipello nave muthu mmodda animamakavo. Nave arive muthu achenjere ni mamakellwaaye.

¹¹ Vawi Mulluku oomuhiyavo khalle Yesu Khrisitu okhalla matthipello yaayove nave matthipello mamodda khekeraatthihiwa.

¹² Amodda ennamaka vamatthipellonimvo ni golide apaalle siliva apaalle malluku oowallamella mutengo; amodda ennamaka vamatthipellonimvo ni miteekho apaalle ni manasi apaalle mittatthi.

¹³ Nave oreera wa mutteko wa arive muthu oneerewuupullulliwa va nllapo na echiweruzo vawi nllaponno nineerophiya ni munllo nave munllooyo sika onaalinge mitteko dda arive muthu.

¹⁴ Eyo yaamakiwe va matthipello yaahisha ni munllo, oomakooyo aneerothuviwa.

¹⁵ Koma mutteko wa mmodda washa olliye khathuviwa komave aneerovullusiwa wonanko oovulluwa m'munlloni.

¹⁶ Ethiyo khamunadduwella wi nyuwaano tti enyumba ya Mulluku nave Munepa a Mulluku onakhalla mwa nyuwaano?

¹⁷ Sika muthu oononga enyumba ya Mulluku, Mulluku aneeromoononga olliye. Vawi enyumba ya Mulluku tti ya weella nave nyuwaano tti enyumbaaye.

¹⁸ Ahikhallevo muthu aniilleke yeekhaaye. Muthu mmodda variyari vanyu aaddeesaka wi tti eezeru owaaka ezeru dda ellapo yavattheella, aambe okhalla ookarangeya wi akhallena ezeru.

¹⁹ Vawi eyo eneeriiwa ya ezeru va ellapo yavatthimva tti yoohikhalla ni ezeru vamiitthoni va Mulluku. Moollikana ni mawu a Mulluku awi, “Mulluku anaphariha mutteko ochenjera wa athu eezeru wonanko musampha vawaapharani alliwaayo,”

²⁰ nave mawu a Mulluku amodda enallota wi, “Apwiya ennadduwella wi maganizo a athu eezeru tti oohikhalla ni mutteko.”

²¹ Vano ahikhallevo awiitukhulla ni ddaweera dda athu. Ddeko ddittheddene tti ddaanyu:

²² Paulo, Apolo ni Petro; ellapo yavatthi ella, okumi ni okhwa, ddamuttano ni ddamuhoollo, ddittheddenenndda tti ddaanyu,

²³ nave nyuwaano tti a Khrisitu nave Khrisitu tti a Mulluku.