1 Akorinto 2 - Mawu a Mulluku

Othenga wa Khrisitu ootthomeyiwa vamutandani

¹ Asinnaka ni arokoraka, kawiilleemi wa nyuwaano wi killalleye yookhuweya yawoona ya Mulluku, ngaallotille wonanko muthu aruso ni oodduwella dduullupalli.

² Vawi kaariimi ni nyuwaano, kaaganiza otiwalla erive ello opatula Yesu Khrisituve oyo atthomeyiwe vamutandani.

³ Sika kawiilleemi wa nyuwaano, kaari oofooka ni ootthukumella ni woova,

⁴ nave ohuddiha waka ni othengaaka ngawuuvellelle ni mawu ootthopoowa eezeru dda muthu koma ni woonihella wa masiva a Munepa a Mulluku.

⁵ Sika echikhulupilwaanyu ehikhalle va ezeru dda muthu koma va masiva a Mulluku.

Ezeru dda Mulluku

⁶ Nave kinallalleya othenga wa ezeru wa athu oowaraalla m'munepani. Nave khe ezeru ya ellapo yavattheella apaalle ya oolamulella a ellapweella, ayo masiviiwa enamalla.

⁷ Ezeru kinalloteemi tti dda Mulluku ddookhuweya nnddo atthoollelleeye ntitimiho nahu ellapo yavatthi ehinaphatusiwe.

⁸ Khaavo oolamulella a ellapo ella aadduwenlle ezeru yeella. Yadduwenlleke kheyaatthomeye vamutandani Apwiya antitimiho.

⁹ Nave mawu a Mulluku enallota wi, “Eyo muthu ahoonilleeye apaalle wiiwa, eyo muthu ahiganizereeye wi ttuuweereya, tti yeeyo Mulluku aakhozereeye ayo enamukonda.”

¹⁰ Koma Mulluku ahuupullulla wa hiyaano yoovittheyaaye mwa munepaaye. Munepa annoona erive ello naari owallamella wa maganizo a Mulluku.

¹¹ Tti munepa wa athu onadduwella ddittheddene dda yaayo, emoddamoddave yeeyo tti Munepave wa Mulluku onadduwella ddittheddene dda Mulluku.

¹² Hiyaano khanaawakhenlle munepa wa ellapo yavattheella koma naakhenlle Munepa woorumihiwa ni Mulluku wi nidduwelle ddittheddene Mulluku anivahilleeye.

¹³ Sika vano khenallota ddenndda mu mawu oohuddihiwa ni ezeru dda athu koma ni mawu oohuddihiwa ni Munepa vawi ninnatthopoolla ddawoona dda munepa wa ayo erina Munepa.

¹⁴ Oyo ahinna Munepa khawora waakhella emphaso ddoovenyera wa Munepa a Mulluku. Athu yaayo kheniiwesesa emphasonnddo, khaddinna mutteko wa alliwaayo kaambiiwa oreera wiwa onadduwanyeya mwa Munepa Waweella.

¹⁵ Oyo arina Munepa, annawora odduwella oreera wa erive ello nave khaavo anamudduwella olliye.

¹⁶ Vawi mawu a Mulluku enallota wi, “Ethiyo anadduwella maganizo a Apwiya ttaani? Ethiyo ttaani anaawore omulangiza? Hiyaano nookhalla ni maganizo a Khrisitu.”