1 Akorinto 16 - Mawu a Mulluku

Ddoovelleella wa ookhulupilila akhwiinyu

¹ Vano kinaaka mudduwelle dda ddoovelleella makobiri awaakavihera athu a Mulluku o Yudeya nnddo mwalembilleenyu. Munaphwanella weera kalamulalleemi mipingo mu Galatiya wi ddeere.

² Nirive Nllapo Namulungu arive muthu anyuwaano akuseke makobiri mamodda moollikana ni mmo muphwanyelleenyu nave musunge wi vihikhalle opaalleya ovelleella makobiri kaawaaka.

³ Kawa kiphiya, kineerowinnya makalata ayo mwaatthoonlleenyu nave kineerewaaruma wi yavelleelle emphaswaanyu o Yerusalemu.

⁴ Waphwanella wi miyaano kiyeewottho, nineerothaanana.

Ddoolinga dda Paulo

⁵ Kineeroowa wa nyuwaano kakhwaranya echigawo ya Masedoniya vawi kinaayeelle o Masedoniyanko.

⁶ Apaalle kineerokhalla wa enthawi ni nyuwaano apaalle eyitta ettheene wi mukikavihere voovirellellani olendwaaka orive weko kineereemi kiyeewo.

⁷ Nginapaalla owoonani wa enthawi yooyeva kaaviraka koma kinatiyera okhalla ni nyuwaano wa enthawi yoorekama, Apwiya yaakhullella.

⁸ Kinaakhalle wuno o Efeso ophiyera nllapo na Pentekosite.

⁹ Vawi wuno mullako wookihulleyella miyaano wa mutteko muullupalli ni woopaalleya naari oovaanyihana eriwo anchichi.

¹⁰ Timoteo aphiya owaninyunko, moonesese wi olliye oone wi moomwaakhella variyari vanyu kaambiiwa olliye anapharattho mutteko wa Apwiya, wonanko miyaano.

¹¹ Ahikhallevo muthu anaamuvevulle koma munaphwanella mumukavihere ovirellella voolendonaaye m'murendelleni wi ahokollweelle wa miyaano vawi miyaano vamodda ni mpingo wuno ninnamutiyerella.

¹² Vano dda munnihu Apolo, kaanamullipiha murima wunchichi wi awe owaninyunko ni ookhulupilila amodda koma olliye khaapanlle wi awe veneva. Nave aneeroowa akhalla ni enthawi.

Mawu oomallihella

¹³ Chenjerani, khallani oohitikheya mu echikhulupililo, khallani oohoova nave khallani amasiva.

¹⁴ Erakani erive ello ni echikondi.

¹⁵ Munnadduwella dda Stefanasi ni nibanja naye wi yaari ookhulupilila awaamba mu Akaiya wi yahiivelleella weekhiiwa waarumeyella athu a Mulluku. Asinnaka ni arokoraka, kinimuuvekani

¹⁶ wi mwiiwellelleke olamulello wa athu wonanko yaalla ni arive muthu oyo anaphara mutteko ni orumeyella ni alliwaayo.

¹⁷ Koohakallalla ni owa wa Stefanasi, Fortunato ni Akayiko vawi yaawa munipuroni mwanyu.

¹⁸ Nave yaakillipiha murima, wonanko mmo yuullipihalleewani. Athu yaalla enaphwanella waavaha olemu.

¹⁹ Mipingo dda mu echigawo ya Asiya* ddinnuuvahani mooni. Akwila, Prisila ni mpingo onatthukumana mpa mwiwa ennuuvahani mooni wunchichi mu eyaattano ni Apwiya.

²⁰ Asinninyu ni arokorinyu attheene wuno ennuuvahani mooni. Muvahaneke mooni mwa echikondi ya ookhulupilila.

²¹ Miyaano Paulo kinalemba dda moonoolla meekhaami.

²² Oyo ahinaakonda Apwiya akhalle ootembeleliwa. Apwiihu waani!

²³ Echisomo ya Apwiya Yesu ekhalle ni nyuwaano.

²⁴ Echikondaaka ekhalle ni nyuwaano attheene mu eyaattano ni Khrisitu Yesu.