1 Akorinto 15 - Mawu a Mulluku

Ovenya wa Yesu Khrisitu

¹ Asinnaka ni arokoraka, vano kinapaalla kiwuupuseni nyuwaano dda othenga waphaama oyo kallalleyeemi wa nyuwaano, oyo mwaakhenlleenyu nave va yooyo echikhulupililwaanyu eniimella moollipa.

² Muneerovullusiwa ni othenga waphaama oyo kallalleyeemi mwawuphara moollipiha. Ddaahikhalla ddiiddo sika echikhulupilwaanyu tti yoohikhalla ni mutteko.

³ Vawi kaavelleella wa nyuwaano yoopaalleya yuullupalli eyo kaakhenlleemittho yawi Khrisitu aakhwa ekaamba ya ddoochimwa ddahu wonanko mmo ddilembelliwiiwa mu mawu a Mulluku,

⁴ wi aavitthiwa nave wi aavenyihiwa wa ookhwa viviralle mallapo mararu, wonanko mmo ddilembelliwiiwa mu mawu a Mulluku,

⁵ wi ahooneya wa Petro nave eerille ddiiddo ahooneya wa oohuddera khumi ni eelli attheene.

⁶ Eerille ddiiddo ahooneya enthawi emodda wa asinnihu ni arokorihu ookhwaranya 500. Anchichi a yaayo tti akumi ophiyera vano koma amodda mwa yaayo aakhwa.

⁷ Vano ahooneya wa Yakobo, avenyaka vaavo wa oohuddera attheene.

⁸ Voomallihella ahooneyattho wa miyaano naari kaphwanaphwanaka ni muthu ooyariwa mallapo ehinakwakhwane.

⁹ Vawi miyaano tti murummwa ooyevesesa mwa attheene. Nginaphwanella wi keeriwe murummwa kaambiiwa kaahoosa mpingo wa Mulluku.

¹⁰ Koma ni echisomo ya Mulluku miyaano kiri mmu kikhallelleemi nave echisomo aakivahilleeye kheyaari yoohikhalla ni mutteko. Koophara mutteko moollipiha ohiyana ni amurummwa amodda attheene naari khe miyaano koma echisomo ya Mulluku eyo enaphara mwa miyaano.

¹¹ Sika vano naari kaariki miyaano apaalle alliwaayo enallalleya, attheene ninnallalleya othenga omoddave yooyo nave nyuwaano mwaakhulupilila.

Ovenya wahu

¹² Othengaahu tti wawi Khrisitu oovenyihiwa wa ookhwa. Kaambiiwa tini amoddanyu munallota wi athu ookhwa khewa evenya?

¹³ Koma athu ookhwa yaahivenyihiwa, sika ddinattaphullella wi Khrisitu khaavenyihiwe wa ookhwa.

¹⁴ Koma Khrisitu aarimi ahivenyihiwe wa ookhwa, sika ollalleya wahu khonna mutteko navettho echikhulupililwaanyu khenna mutteko.

¹⁵ Ovirellella yeeyo, ninnooniwa wi ninnoottha dda Mulluku kaambiiwa naavelleella omboni wi aamuvenyiha Khrisitu wa ookhwa. Nave ddakhalla ddawoona wi athu ookhwa khenavenyihiwa, vano Mulluku khaamuvenyihalle Khrisitu.

¹⁶ Vawi athu ookhwa yaahivenyihiwaka, Khrisituttho khaavenyihiwe.

¹⁷ Nave Khrisitu aarimi ahivenyihiwe, sika echikhulupilwaanyu khenna mutteko navettho muri mu machimwaanyu ophiyera ollello.

¹⁸ Vano athu ayo yakhwille emukhulupililaka Khristu khevullusiwa.

¹⁹ Sika naatiyerellaka mwa Khrisitu mu okumi yoollave ohirittho okumi wa muhoollo, vano niri oomoriha ethakaraka omukhwaranya arive muthu mu ellapo yavatthi ettheene.

²⁰ Koma yawoona tti yawi Khrisitu oovenyihiwa wa ookhwa wi akhalle awaamba wa ayo enaavenyihiwe.

²¹ Vawi okhwa waawa vatthimva oweella mwa muthu, Adamu, emoddamoddave yeeyottho ovenya wa ookhwa onawa oweella mwa muthu, Khrisitu.

²² Vawi athu attheene enakhwa ekaamba ya Adamu, emoddamoddave yeeyo attheene eneerovenyihiwa wa ookhwa ekaamba ya Khrisitu.

²³ Nave arive muthu aneerovenyihiwa va enthawaaye. Vawaamba va attheene, Khrisitu, vatulli viwa ayo eri aaye a Khrisitu va enthawi anaaweeye.

²⁴ Vano ellapo yavatthi eneeromalla; Khrisitu aneerowoononga masiva mattheene oolamulella nave aneerovelleella omwenooyo wa Mulluku Attiitthinnya.

²⁵ Vawi Khrisitu anaphwanella alamulelle ophiyera Mulluku aagonjihalle adani attheene ni waahiya m'mattani mwa Khristu.

²⁶ Mudani oomallihella woonongiwa tti okhwa.

²⁷ Vawi mawu a Mulluku enallota wi, “Mulluku aahiya ddeko ddittheddene m'mattani mwaye.” Nave tti ddoodduwanyeya khalle wi mawu awi, “ddeko ddittheddene” khenamwaaka ni Mullukweene oyo anahiya ddeko ddittheddene m'mattani mwa Khrisitu.

²⁸ Nave ddeko ddittheddene ddineerohiyiwa m'mattani mwa mwaana, Khrisitu, vano mwaanooyo aneerewiivelleella m'mattani mwa Mulluku, oyo ahiyalle ddeko ddittheddene m'mattani mwa mwaana wi Mullukuve aalamulelle athu attheene.

²⁹ Vano, athu ookhwa yeeki ehivenyihiwe, enaaweereye tti tini wa athu ayo enabatiziwa munipuroni mwa athu ookhwa? Kaambiiwa tini athwaayo enabatiziwiiwa munipuroni mwa athu ookhwa?

³⁰ Nave wa hiyaano kaambiiwa tini ninakhalleehu mu ddawoopiha enthawi ddittheddene?

³¹ Asinnaka ni arokoraka, okhwa kinneetana nllapo ni nllapo! Wuukotellani waka, ekaamba ya Khrisitu Yesu Apwiihu, onnakeeriha ollota yeella.

³² Moollikana ni oganiza wa athu, yoowanella ni enama ddamuhakani wonanko keerelleemi wa Efeso tti tini? Nave athu ookhwa yaarimi ehivenyihiwe vano hankoni neere wonanko mmo athu enallotelliiwa wi, “Hankoni niche nave niwirye vawi osiisello nineerokhwa.”

³³ Muhillekiwe. “Waattana ni athu oonanara onnoononga makhallello aphaama.”

³⁴ Muhokollweelle o makhallellwaanyu aphaama nave muhiye ettilla ddanyu ddoochimwa. Kinallota wi kuuwulliheni muru kaambiiwa amodda a nyuwaano khamunamudduwella Mulluku.

Mwiilli woovenyihiwa

³⁵ Muthu mmodda akoha wi, “Athu ookhwa enaavenyihiwe mwawiidde? Enaakhalle ni mwiilli wawiidde?”

³⁶ Muthu ookarangeya we! Wamidda mmiddo, khonamella waahaamba okhwa.

³⁷ Khaninamidda yoomella ettheene eyo enunnuwa koma mmiddove, tirigu apaalle mmiddo mmodda.

³⁸ Mulluku annavaha mmiddo yooyo mwiilli anapaalleeye; annavaha orive mmiddo mwiillaaye.

³⁹ Nave miilli khaddinakhalla ddoophwanaphwana; ddimodda dda athu, ddimodda dda enama, ddimodda dda epallame nave ddimodda dda ehomba.

⁴⁰ Nave vookhalla miilli ddooddullu navettho miilli dda vatthimva; ntitimiho na miilli ddooddullu tti noohiyana ni oreera wa miilli dda vatthimva.

⁴¹ Nndduwa nookhalla ni owala wiwa, mweeri wookhalla ni owala wayiwawayiwa nave etheneeri ddookhalla ni owala woohiyana; navettho vookhalla owala woohiyana variyari va etheneerinnddo.

⁴² Ddinaakhalle mwawi ddiidda athu ookhwa yavenyihiwa. Mwiilli oyo onamiddiwa voovitthiwani, onnuunta koma wavenyihiwa khokhalla wawunta.

⁴³ Waamiddiwaka onakhalla woonanara ni woofooka koma wavenyihiwa onaakhalle wooreera ni wamasiva.

⁴⁴ Onamiddiwa ori mwiilli woomuthu koma onavenyihiwa ori mwiilli wamunepa. Vawi vookhalla mwiilli woomuthu, sika vookhallattho mwiilli wamunepa.

⁴⁵ Vawi mawu a Mulluku enallota wi, “Muthu awaamba, Adamu, aari muthuve.” Koma Adamu oomallihella, Yesu tti Munepa woovaha okumi.

⁴⁶ Khe yamunepa enawa vawaamba koma yoomuthu nave vatulli viwa yamunepa.

⁴⁷ Adamu awaamba awoopiwa ni ethaya aari avatthimva koma Adamu aneepiilli, Yesu aari ooddullu.

⁴⁸ Arive muthu ari va ellapo yavatthi ari wonanko Adamu awaamba koma ooddullu tti wonanko Adamu aneepiilli.

⁴⁹ Vawi ninnaphwanaphwana ni muthu awoopiwa ni ethaya, sika nineerophwanaphwanattho ni muthu ooddullu.

⁵⁰ Eyo kinaakeemi, asinnaka ni arokoraka, tti yawi yawoopiwa ni mwiilli ni nikhame khewora waakhella omwene wa Mulluku nave yoomalla khewora waakhella yoohimalla.

⁵¹ Ngiiwesesani, kinawuupullullellani yookhuweya yawoona ella. Khanikhwa attheene koma nineerotthattusiwa,

⁵² mu enthawi yooyeva, mwawaakuva wonanko ominyalla wa niittho nipallapata noomalliha noopiwa. Vano athu ookhwa eneerovenyihiwa ni mwiilli woohimalla, hiyaanottho nineerotthattusiwa.

⁵³ Vawi yoomalla eneerotthattusiwa yoohimalla, eyo enaakhwe eneerotthattusiwa yoohikhwa.

⁵⁴ Sika ddenndda ddeereya yoomalla yatthattusiwa yoohimalla, eyo enaakhwe yatthattusiwa yoohikhwa, vano mawu a Mulluku eneerokwakhwanihiwa awi, “Okhwa woomiryiwa voogonjihiwani!”

⁵⁵ “We okhwa, opambana wawo ori wuuwi? Ethiyo okhwa, murophaawo ori wuuwi?”

⁵⁶ Murophi wa okhwa tti machimo nave machimo enakusa masiviiwa ovenyera omalamuloni.

⁵⁷ Koma nimuthokoze Mulluku oyo ananipambaniha oweella mwa Apwiihu Yesu Khrisitu!

⁵⁸ Sika vano, asinnaka ni arokoraka ookondiwa, khallani oohitikheya ni oohisuseya. Hiyani murimaanyu va mutteko wa Apwiya vawi munnadduwella wi oweella mwa alliwa, muttekwaanyu onnakhalla ni mphuro.