1 Akorinto 13 - Mawu a Mulluku

Dda echikondi

¹ Naari killotaka ellotello dda athu ni dda angelo koma kaahikhalla ni echikondi, ollota waka onakhalla wonanko mukoko wawoopiwa apaalle belo awoopiwa.

² Naari kirina emphaso ya onamallotella naari kidduwellaka ddittheddene ni wiiwesesa ddoovittheya ddittheddene; naari kirina echikhulupililo yuullupalli yoowora osusa miyaango koma kaahikhalla ni echikondi, nginna mutteko.

³ Naari kikaweke ddeko ddaka ddittheddene nave naari kivelleelle mwiillaaka wi woosiwe, koma kaahikhalla ni echikondi yaakayaaka khekhallavo.

⁴ Echikondi enniithaalla nave ennareera murima. Echikondi khenaakhallella ehache athu amodda apaalle wiitukhulla apaalle okota.

⁵ Echikondi khenakhalla ni makhallello oonanara apaalle kheniikonda apaalle khenasha murima mwawaakuva, echikondi khenasungella mangawa a athu amodda,

⁶ Echikondi khenahakallalla ni onanara murima koma enahakallalla ni ddawoona.

⁷ Echikondi ennamaalleya mu ddeko ddittheddene, ennakhulupilila ddeko ddittheddene, ennatiyera mu ddeko ddittheddene, ennavillella mu ddeko ddittheddene.

⁸ Echikondi khenamalla. Vookhalla onamallotella koma yoolla oneeromalla. Vookhalla ellotello ddoohidduwanyeya* koma ddineeromalla. Vookhalla odduwella koma oneeromalla.

⁹ Vawi odduwella wahu ni onamallotella wahu khaddinakwakhwanella.

¹⁰ Koma ddookwakhwanella ddaphiya, vano ddoohikwakhwanellannddo ddineeromalla.

¹¹ Kaariimi mwaana, kallota wonanko mwaana, kaganiza wonanko mwaana nave ezeru ddaka ddaari wonanko mwaana. Vano vawi kohunnuwa koohiya okhalla wonanko mwaana.

¹² Vano khaninoona phaama ddeko dda Mulluku wonanko muthu aawiiweheraka ekhove vanigalasini nohooniha phaama. Koma vahoollomvo nineerewoona vamiitthoni ni vamiitthoni. Vano kinadduwelleemi tti ddoohikwakhwanella koma muhoollommo ddineerokwakhwanella wonanko mmo Mulluku anakidduwellelleeye phaama.

¹³ Vano ddeko ddiraru ddoohimalla tti echikhulupililo, etiyerello ni echikondi. Nave yookhwaranya ddittheddenenndda tti echikondi.