1 Akorinto 11 - Mawu a Mulluku

¹ Khallani ookittakihera miyaano wonanko miyaanottho kinamuttakiherelleemi Khrisitu.

Owara ello omuruni voollapellani

² Kinnathokoza kaambiiwa mu erive ello munnakuupuwella ni othwara ehuddiho eyo kuuhiyenreemini.

³ Nave kinapaalla wi mwiiwesese wi Khrisitu tti muru wa arive mullopwana, mullopwana tti muru a mutthiyana nave Mulluku tti muru a Khrisitu.

⁴ Sika mullopwana anavekella apaalle anallotella awanre ello omuruni waye, anamuvevulla Khrisitu.

⁵ Nave mutthiyana anavekella apaalle anallotella ahiwanre ello omuruni waye, anamuvevulla mamune; khanahiyana ni mutthiyana achemiwe murwaaye.

⁶ Mutthiyana aahiwara ello omuruni waye acheme meehaaye. Vawi tti ello yoowulliha muru wi mutthiyana acheme m'muruni mwaye apaalle acheme mpala, anaphwanella owara ello omuruni waye.

⁷ Mullopwana khanaphwanella owara ello omuruni waye kaambiiwa aphatusiwe wi aphwanaphwaneke ni Mulluku nave Mulluku anatitimihiwa ekaamba ya olliye. Koma mullopwana anariiheya ekaamba ya mutthiyana.

⁸ Vawi mullopwana khaaphatusiwe ovenyera wa mutthiyana koma mutthiyana ovenyera wa mullopwana.

⁹ Vawittho mullopwana khaaphatusiwe ekaamba ya mutthiyana koma mutthiyana aaphatusiwa ekaamba ya mullopwana.

¹⁰ Ekaamba ya yeella nave ekaamba ya angelo mutthiyana anaphwanella akhalleke ni yawiikhuneella omuruni waye.

¹¹ Mu eyaattano ya Apwiya, mutthiyana khawora weera ello vihiri mullopwana naari mullopwana khawora weera ello vihiri mutthiyana.

¹² Vawi mutthiyana aaphatusiwa ovenyera wa mullopwana, emoddamoddave yeeyo allopwana enayariwa ovenyera wa mutthiyana nave ddeko ddittheddene ddinavenyera wa Mulluku.

¹³ Ganizerani weekhiinyu waari woophwanella wi mutthiyana avekelle wa Mulluku ahiwanre ello omuruni.

¹⁴ Ethiyo ephatuwello ya muthu khenanihuddiha wi tti yoowulliha muru mullopwana okhalla ni meehi oorekama,

¹⁵ koma ello yoolemu wa mutthiyana? Mutthiyanooyo aavahiwa meehaaye oorekama wi ekhalle yookhuneella murwaaye.

¹⁶ Koma vakhalla muthu mmodda anapaalla ovaanyiha ddenndda, eyo kinaalloteemi tti yawi hiyaano naari mipingo dda Mulluku khaddinna makhallello mamodda ollapella.

Mugonelo wa Apwiya

¹⁷ Vano m'malangizoni yaalla, nginahakallalla ni nyuwaano kaambiiwa mitthukumano ddanyu ddoollapella khaddineera ddaphaama koma ddoonanara.

¹⁸ Vawaamba, koolleelliwa wi vookhalla okawaneya mumpingoni mwanyu mwaatthukumanaka nave vang'onove kinnoona wi tti ddawoona.

¹⁹ Yookayikella kheyiivo, onaphwanella wi vikhalle okawaneya variyari va nyuwaano wi ayo eri oororomelleya yooneye phaama.

²⁰ Mwatthukumana mulloko mmodda, kohiyo mugonelo wa Apwiya munacheenyu.

²¹ Vawi mwaachaka, arive muthu anacha yoochaaye, sika amodda ennavolliwa ettalla amodda elezelaka.

²² Khamunna m'mawaninyu moochellamo ni moowiryellamo? Apaalle munapaalla ovevulla mpingo wa Mulluku ni waawulliha muru athu ehinna ello? Kuulleelleni tini dda ddenndda? Kuuriiheni? Ata, nguuriihani!

²³ Vawi ehuddiho eyo kavahiweemi wa Apwiya kahuullellanittho nyuwaano wi, Apwiya Yesu, mahiiyu yaalle yavelleelliwiiwa yaamukusa buledi,

²⁴ yaavekella emuthokoza Mulluku, emumeyameya nave ellota wi, “Olla sika mwiillaaka woovahiwa ekaamba ya nyuwaano. Mweereke yeella vookuupuwellani miyaano.”

²⁵ Emoddamoddave yeeyo, emanlle omucha buledoolle yahaavaha kapu, ellota wi, “Kapu yoolla tti echizindikiro ya echipangano yanaanweene ya Mulluku, eyo yeeriwe oweella mu nikhame naka.” Erive enthawi mwaaweeraka yeella mweereke ddiiddo mookuupuwella miyaano.

²⁶ Vawi enthawi ddittheddene munamucheenyu buledi yoolla ni omuwiryella kapu yoolla munallalleyella okhwa wa Apwiya ophiyera eneeriiwa ewe.

²⁷ Vano muthu mmodda aamuchaka buledi a Apwiya ni omuwiryella kapwiiwa moohiphwanellella anachimwella mwiilli ni nikhame na Apwiya.

²⁸ Sika vano, muthu anaphwanella wi aambeke oddoona yeekhaaye nave amucheke buledooyo ni omuwiryella kapu.

²⁹ Vawi muthu aahivaha olemu mwiilli wa Apwiya aamuchaka buledi ni omuwiryella kapu, aniitembelela yeekhaaye aachaka ni owirya.

³⁰ Ella sika ekaambiiwa anchichi a nyuwaano tti oofooka ni oovoriiwa nave naari amodda aakhwa.

³¹ Naambilleke oddoona weekhiihu khanaatembeleliwe ni Mulluku.

³² Koma ninneeruziwa ni ollakiwa ni Apwiya wi nihiipiwe mullatu vamodda ni ellapo yavatthi.

³³ Sika vano asinnaka ni arokoraka, mwatthukumana vamodda wi muche mugonelo wa Apwiya, mutiyeraneke.

³⁴ Mmodda avolliwa ettalla anaphwanella wi ache owaniwa wi muhitembeleliwe ni Mulluku mwaatthukumanaka vamodda. Nave ddimoddannddo, kineerodditthopoollattho kawa.