Mukaanda kuri bari Filipo 4 - Musamu Wamubwete 2013

¹ Mu didyo, bampaangi baami ba mutima, ba ntiiri kwalaka, beenu luri kiminu kyaami na lukoongolo lwaami; ngo banduku ba mutima, beenee na keketee mu Mfumu.

Monee kiminu mu Mfumu

² Me nyisyaamisa Evodya na Sintike mu kuba na nyukusunu mu Mfumu.

³ Heehe, me nyiloombo kuri ye se, mbaasi yaami ya kisalu ya ngwanwa ti, bakisa bakyeetu babo, bo banweeni kintwaari na me, mu ntoono Musamu Wamubwete, kintwaari se na Kelema na bambaasi ba me bakaka ba kisalu, bari mankuumbu mari mu mukaanda wa mwooyo.

⁴ Monee kiminu mu Mfumu mu mpisi ntaangu; me nyibweese kuleele, monee kiminu.

⁵ Hemesee bundeembu bweenu buba bwayabakana kuri baatu bobanso. Mfumu weki bebele.

⁶ Yaa luba na boomo mu ntoono ti mosi ko; ngo mu myominso, hemesee ndoombulu dzeenu dziba dzayabakana kuri Nzaambi, mu nsaambulu, mu nyingukulu na mu mvutukulu matoondo.

⁷ Tumi kiyeengi kya Nzaambi kibvuriri na madyeele momanso, sa kyakebe mitima myeenu, na bitsimi byeenu mu Kiristo Yesu.

⁸ Mu misiiri ngo miri bampaangi, myominso miri myangwanwa, myominso myalukiinsu, myominso myasuunguma, myominso myatsyeemeke, myominso mi batiiri, myominso myamibwe mu kuleele, na mbuti kuri manzelu mamabwete, na myayelemene kusiika, lo tsiminee myominso mimyo.

⁹ Mamo ma luri lwayika, ma luri lwataambula, ma luri lwayuka, na ma luri lwamono kuri me, salilee mo; tumi Nzaambi ya kiyeengi kaba na beenu.

Pawulo wubvutula matoondo kuri bari Filipo

¹⁰ Me nyamwiini kiminu kyalaka mu Mfumu, bu lwabweesiri kutsimina me lolo di. Lwaba kwaandi na kitsimi, ngo mpwaani yaba yo pe.

¹¹ Kari mu nzala kubaka ko me nyileele bubwo, ngo bukuri me nyayika kuba mu kiminu, kunsa biteesu byobinso bi nyiri.

¹² Me nyaari kuba kunsa buwelu, na nyaari kuba se kunsa byabuukula; mu byobinso na mu myominso, me bansaatsa mu kuba wayukuta na mu kukolo nzala, kuba kunsa byabuukula na kuba na nzala kubaka.

¹³ Me lo nyakuka mu myominso, mu wunde wumpaana makwa.

¹⁴ Ngo beenu lwayirikiri mamabwe, mu kukabula mpasi dza me.

¹⁵ Beenu bari Filipo luyaari se ti, mu mbandukulu Musamu Wamubwete, me manaa kupala mu nsi ya Makedonya, kwasii ba dibuundu ti dimosi ko, dyatolo mboongo na dyapalisa mboongo mu me, mbuti ka beenu kitsu ko.

¹⁶ Bukuri bu nyaba nyakiri ku Tesalonika, beenu lwampeeke lubakusu, mbala mosi bunu pe dzoolo.

¹⁷ Kari kuri ti me nyisaka bi bankabula ko, ngo me nyisaka kuri ti ndaandu yiba yabuukula kuri beenu.

¹⁸ Me nyataambula byobinso, na nyiri na byabuukula, me nyaluula bu nyataamburi bi lwampeekiri kuri Epaforodito, biri bunu mananaasi ma mfuku yayibwete, kikabu kya kudzusa kyataambulu na kyabweeye kuri Nzaambi.

¹⁹ Nzaambi yaami sa kayukitisa manzala meenu momanso, bunu buri busina bwaandi kunsa nkeembu mu Kiristo Yesu.

²⁰ Nkeembu kuri Nzaambi, Taayi dyeetu mu bibvu ngo bibvu. Amene.

Mamboto ma mpotulu

²¹ Henee mboto kuri mpisi wangisi mu Kiristo Yesu. Bampaangi bari na me baluheekiri mamboto.

²² Bangisi bobanso baluheekiri mamboto, bvulu-bvulu ba mu nzo Kayisari.

²³ Bweese bwa Mfumu Yesu Kiristo buba na kiluunsi kya beenu.