Mukaanda kuri bari Filipo 2 - Musamu Wamubwete 2013

Nkulukulu na nzangusulu Kiristo

¹ Ngo mbuti kuri nsyamusunu mu Kiristo, mbuti kuri mboondulu mu ntiilu, mbuti kuri kintwaari mu Mpeeve, mbuti kuri lusaambu na ngebe,

² lo kukiseenu kiminu kya me, mu kuba ndyaatulu mosi, ntiilu mosi, mutima mosi, kitsimi kimosi, na kuba na kintwaari.

³ Yaa lwesalila kunsa nwaanusunu ko, bunu pe mu nzala-kubila yabuunu ko, ngo kasi mu nkulukulu, holulee bambaasi bunu ti bo babvuriri na beenu.

⁴ Mpisi muutu mu beenu yaa kasaka ndaandu yini ya nde-meene ko, ngo kasaka se ndaandu ya bambaasi.

⁵ Dyaatileenu bubwo ha kakati dya beenu, bunu bwayelemene mu Kiristo Yesu.

⁶ Nde wuri bu kaba mu kinzeri kya Nzaambi, kasii saka kuba nsiisa na Nzaambi ko.

⁷ Ngo nde-meene wasokomono nyutu yaandi, waholo kinzeri kya nkutu, mu kufwanikina na baatu, na mu nzelu yaandi wamonoko bunu muutu.

⁸ Nde wakuluka nde-meene, mu kuba watumuma natee mu lufwa, lufwa lwa ha yulu kuruwa.

⁹ Hango-nkuumbu, Nzaambi kari kamudzaangisa, na kamuha nkuumbu yibvuriri na mankuumbu momanso,

¹⁰ mpisi heki mu nkuumbu ya Yesu, maboongo momanso matsukuma, ku yulu, ha butoto, na ku nsuku butoto,

¹¹ na ndima dzodzinso dzileele ti Yesu Kiristo ngo Mfumu, mu nkeembu ya Taayi Nzaambi.

Kisalu kya bakiristo

¹² Mu didyo, banduku baami ba mutima, bunu bu lukootumumaa mu mpisi ntaangu, kari hani ha busu bwa me ko, ngo mu lumalu, bvulee kutumuma, me bu nyiri nde pe. Salilee mu kibvumi na mu ntekutulu, mu kubaka mvuukulu ya beenu-meene,

¹³ bukuri Nzaambi koosalaa mu beenu, na kusa kuri ti, lutya na lusala bunu buri kutya kwaandi kwakubwete.

¹⁴ Yirikee momanso kwahele kwemunguta na kwahele nkalikisi,

¹⁵ mpisi luhele kuba na mi baluseembele, luhele kuba na kinsaangi-nsobo, luba baala ba Nzaambi bahele na mi babaseembele, ha kakati dya kiseendu kya baatu bawumuka na bababi. Ha kakati dya baatu babo, beenu luri mu kweseme bunu byuufu bya mbaawu mu nsi,

¹⁶ bu luri lwakaangama mu maampu ma mwooyo. Mu mimyo me nyiba na kimweese mu kiluumbu kya Kiristo, bukuri me nyasii kudzumuna kwa buunu ko, na nyasii mono mpasi kwa buunu ko.

¹⁷ Ngo ti hayuku makila ma me bamayitiri ha yulu kikabu kya kuha kuri Nzaambi, mu kisalu kya kanyi dya beenu, lo me nyimono kiminu, nyimono kiminu ha kimosi na beenu-banso.

¹⁸ Bwobumosi beenu se monee kiminu, monee kiminu ha kimosi na me.

Mpeekulu Timoteho na Epaforodito

¹⁹ Me nyiri nsiitu mu Mfumu Yesu, ti sa nyaluheeke Timoteho mu mawasu, mpisi heki me se mba nyasyaamusu, mu mampolo ma nyitaambula mu ntoono beenu.

²⁰ Mukwongo, me nyahele na muutu mukimi ha yulu nde, wuri bitsimi byobimosi na me, wutsiminaa misamu mitariri beenu mu ngwanwa.

²¹ Bobanso kwenama misamu mini mya bo-meene, nkani ka mya Yesu Kiristo ko.

²² Ngo beenu luyaari ma kari kayirika nde: bunu bu buyirikaa mwaana kuri taayi, nde wasala kintwaari na me mu ntoono Musamu Wamubwete.

²³ Nde me nyitsima kuheeke kuri beenu, me manaa kumono na pwelelee bunu bulutila misamu mitariri me.

²⁴ Me nyiri na nsiitu mu Mfumu ti, me-meene sa nyiisa mu mawasu.

²⁵ Ngo me nyamwii ti diri mufunu, mu kubvutula Epaforodito kuri beenu, mpaangi na mbaasi yaami ya kisalu na ya binwaanunu, ntumu yi lwampeekiri mu kumbakisa,

²⁶ bukuri nde wuri na nzala beenu yalaka, na wuri mu kubamaa, bukuri beenu lwayukiri ti nde wabee wabeele.

²⁷ Mukwongo, nde wabee wabeele, na ha ntele hasiiri nkani wafwiiri, ngo kasi Nzaambi wamubakiri ngebe, kari wunu nde ko, ngo na me se, mpisi heki me mpele kuba na kyaari ha yulu kyaari.

²⁸ Ngo me nyeki hebele mu kumuheeke kuri beenu, mpisi heki bu lumumwiini, beenu lubweese kumono kiminu, na me mba na kyaari kyantele.

²⁹ Ngo mutaambulee mu kiminu kyokinso mu Mfumu, na beenee na lukiinsu mu baatu ba bubwo,

³⁰ bukuri mu kisalu kya Kiristo, nde kakokosirye bebele na lufwa, na kakotisirye kidziingu kyaandi mu mpasi, mpisi kasalila me, ha kibeendu kya beenu.