Nyabusulu ya Yowane 9 - Musamu Wamubwete 2013

¹ Mbasi yabataanu yasika mvumvuri, na me nyamono mbwetete, yanangukina ku yulu, yibwiiri ha butoto, baha mbwetete yiyo fungula dya bulu dya lubila,

² na yadzibula bulu dya lubila. Mwiisi watoomboko mu bulu, wuri bunu mwiisi wa dziku dya mbaawu dyadinene. Mwiisi bulu wasa kuri ti ntaangu na maheembele biba mampimbisi.

³ Mu mwiisi mwaapala bambambala ha butoto, baha kuri mo miswa miri bunu mya bangeenge ba ha butoto.

⁴ Badika bambambala kukwaamisa bitiiti biri ha butoto, makaya mankaaka na miti, ngo bakwaamisa bani baatu bahele na kinyemu kya Nzaambi mu mambuunsu.

⁵ Babadika kudzusa baatu babo, ngo kasi bababamisa mu mangoondo mataanu; kubama kwa bo, lo bunu bu bamonaa muutu, wuri ngeenge yimutatikiri.

⁶ Mu biluumbu bibyo, baatu sa basaka lufwa, ngo ka badzuukila lwo ko. Sa baba na nzala kufwa, ngo lufwa sa lwayitika la na bo.

⁷ Bambambala babo, baba bafwanikina na makavaalu, meki mayirima mu kweende ku mudziingu; mu mitu mya bo, mwaba mwateeteke nkoongolo dziri bunu dzawoolo, na bidziri bya bo byaba bunu bya baatu,

⁸ mfu dza bo dzaba bunu mfu dza bakyeetu, miinu mya bo myaba bunu mya bankosi,

⁹ baba na binkuta bya mu ntulu, bya mukaanda kibulu, bunu binkuta byabiseengu, lusuku lwa mapaapu ma bo, lwaba bunu lusuku lwa kikokolo kya makavaalu malaka, mari mu kudzumuna mu mudziingu.

¹⁰ Mikila mya bo, myaba myafwanikina na mya bangeenge, miri na biba; na mu mikila mya bo mwaba misya, miri lo mibamisini baatu mu mangoondo mataanu.

¹¹ Mbyaasi bo, ngo mbasi ya lubila; mu kihebeleho, «Abadoni», mu kihelene «Apolyoni.»

¹² Mpasi dzatete dzaluta; ha mambisa haho, biteesu byoolo bya mpasi, biri mu kubweese kwiisa.

¹³ Mbasi yabasaamunu yasika mvumvuri, na me nyayuka mbeembu, yapalila mu mampoko mana ma dziku dyawoolo, diri ha busu bwa Nzaambi.

¹⁴ Mbeembu yiyo yaleele kuri mbasi yabasaamunu, yaba na mvumvuri ti: «Nyanguna bambasi bana, ba bari bakaanga mu nyari yayinene, ngo Efarata.»

¹⁵ Bambasi bobana babanyanguna; bo baba bayirima mu kilookolo, mu kiluumbu, mu ngoondo, na mu mubvu, mu kudzusa ndaambu mosi, mu mandaambu matatu ma baatu.

¹⁶ Lutaangu lwa bayongolo baba mu yulu makavaalu, byaasi byoolo bya byaasi na byaasi, me nyiri nyayuka.

¹⁷ Bubwo me nyamwiini mu mamono-miisu makavaalu, na baba badzakala ha yulu mo, balwaata binkuta bya mu ntulu bya mukaanda kibulu, byabeenge bunu mbaawu, biri na ntiinta ya tari dya safire, na ntiinta ya mfulu dza musaka-nkala. Mitu mya makavaalu, myaba bunu mitu mya bankosi; mu minwa mya bo, mwaba palaana mbaawu, mwiisi na mfulu dza ntiinta ya musaka-nkala.

¹⁸ Ndaambu mosi, mu mandaambu matatu ma baatu, yawa kufwa mu bitsuumbu bya mpasi byo bitatu bibyo: mbaawu, mwiisi na mfulu dza ntiinta ya musaka-nkala, byaba palaana mu minwa mya bo.

¹⁹ Mukwongo, makwa ma makavaalu mari mu minwa myaaku, na mu mikila myaaku. Mikila mya bo, miri na mitu miri bunu mitu mya banyoko, mu myo bakoomonisaa baatu mpasi.

²⁰ Baatu babamosi, bari basii fwa mu bitsuumbu bya mpasi dzidzo ko, basii yiinga madyeele ko, mu ntoono biyiriki bya myooko myaaku, kuri bahotiri kusaambila mampeeve mamabi, na biteki bya woolo, bya palata, bya nsoongo, bya matari na bya miti, biri byamona ko, byayuka ko, na bikookweyendaa ko.

²¹ Bo basii yiinga madyeele se ko, mu ntoono ya kwedzusa baatu, kweloko baatu, kwesalila buyala na kweyiba.