Nyabusulu ya Yowane 21 - Musamu Wamubwete 2013

Yulu dyamoono na butoto bwamoono

¹ Me nyamono yulu dyamoono na butoto bwamoono. Mukwongo, yulu dyatete na butoto bwatete bimwaaluta, na mubu kasii ko.

² Me nyamono bvula dyangisi, Yerusalemi dyamoono, dyasunduka mu yulu kuri Nzaambi, dyalwaata bunu ntuumba yayirima mu kweebwaana mulumi waandi.

³ Me nyayuka mbeembu yayinene yapala mu mboloko yabaleele ti: «Mono, musaampu Nzaambi weki ha kakati dya baatu! Nde sa kadzakala na bo, na bo sa baba kaanda dyaandi; na nde ha kakati dya bo, sa kaba [Nzaambi bo].

⁴ Nde sa kayaala mansangasa momanso mu miisu mya bo. Kubweese kuba lufwa ko, bufwiiri se ko, misaakulu na mpasi se ko, [bukuri] bitotolo byatete bimwaaluta.»

⁵ Wunde waba wadzakala ha yulu mboloko waleele ti: «Mono, me nsiiri byobinso byeki byamoono.» Wabweese kuleele ti: «Tina, bukuri maampu mamama mari masuunguma na mangwanwa.»

⁶ Nde waleele kuri me ti: «Mi mwaa yirima! Me [ngo] Alafa na Omenga, mbandukulu na manunu. Kuri wunde wuri na mpwiisu, me sa nyamuha maampa ma mukeri wa mwooyo kwa buunu.

⁷ Wunde wuluuluka sa kataambula saala dimadi, me sa mba Nzaambi yaandi, na nde sa kaba mwaana waami.

⁸ Nkani kuri babo bari na boomo, bahele kukwiikama, bangaa-bubi, badzusi, biyala, bangaa-makundu, misaambiri mya biteki, na bobanso bangaa-mpya, saala dya bo ngo dyaanga dya mbaawu ya mile, lulwo ngo lufwa lwadzoolo.»

Yerusalemi dyamoono

⁹ Mosi mu bambasi nsaamu, baba na mambasa nsaamu maluula mu biteesu nsaamu bya mpasi bya mpotulu, wayisa na wadzoonso na me, waleele ti: «Wasa, me nyikusoongo mukyeetu wa lulelusunu lwa makweele, mukasi Mwaana kimeeme.»

¹⁰ Nde wanata me mu mpeeve ku yulu mulaandu wamunene, wadzaangama, na wansoongo bvula dyangisi, Yerusalemi, dyanangukina ku yulu kuri Nzaambi, dyaba sunduka

¹¹ dyaba na nkeembu Nzaambi, dyaba semaana bunu bu semaa tari dyantalu, diri bunu tari dya yasipi, diri kuseme bunu lumweenye.

¹² Bvula didyo, dyaba na kibaka kyakinene kyadzaangama, dyaba na myeelu kuumi na myoolo, na mu myeelu mimyo mwaba bambasi kuumi na boolo, na mwaba mwatina mankuumbu, mankuumbu ma makaanda kuumi na moolo ma baala ba Isaheli.

¹³ Kupalila ntaangu, kwaba myeelu mitatu, ku moongo myeelu mitatu, ku baanda myeelu mitatu, ku dyaamunaa ntaangu se myeelu mitatu.

¹⁴ Kibaka kya bvula, kyaba kyatuunga ha yulu matari kuumi na moolo ma lufulu, na mu matari, mwatina mankuumbu kuumi na moolo, ma bantumu kuumi na boolo, ba Mwaana kimeeme.

¹⁵ Mbasi yaba dzoonsaana na me, yaba na kiteesulu, luboto lwa woolo, mu kuteese bvula, myeelu myaandi na kibaka kyaandi.

¹⁶ Bvula dyaba makuumbu mana, bula bwaandi na bunene bwaandi nsiisa. Mbasi yiyo yateese bvula mu luboto, nde wataanga mafuunda kuumi na moolo ma mboto: bula, bunene na mutele waandi byaba nsiisa.

¹⁷ Nde wateese kibaka kya bvula, wataanga nkama na makuumi mana na bina ma biteesu. Mbasi yasalila kiteesulu ki salilaa baatu.

¹⁸ Kibaka kyaba kyatuungula mu matari ma yasipi, na bvula dyo-meene ngo diri dyatuungula mu woolo dyatsyeeme, diri bunu lumweenye lwatsyeeme.

¹⁹ Lufulu lwa kibaka kya bvula lwa bweeyese mu matari mantalu; tari dyatete dya lufulu dya yasipi, dyamoolo dya safire, dyamatatu dya kalekedoni, dyamana dya samarangado,

²⁰ dyamataanu dya sardonu, dyamasaamunu dya sardyoni, dyansaamu dya kirisolito, dyampoomo dya berulo, dyawa dya topadzyoni, dyakuumi dya kirisoparaso, dyakuumi na mosi dya wakinto, dyakuumi na moolo dya ametuseto.

²¹ Myeelu kuumi na myoolo ngo misaanga kuumi na myoolo, mpisi mweelu waba wayirikulu mu musaanga mosi. Kibeendu kya bvula, ha kutukunaa baatu, kyaba kyayirikulu mu woolo dyatsyeeme, diri bunu lumweenye kuri lo biri ku mambisa bimonokono.

²² Me nyasii mono Nzo-nzaambi mu bvula didyo ko, bukuri Mfumu Nzaambi, Mwa-mpuungu, na Mwaana kimeeme ngo Nzo-nzaambi.

²³ Bvula dyaba dyahele na nzala ntaangu, bunu pe na nzala ngoondo, mu kuri ti kuba buungi mu bvula; bukuri nkeembu Nzaambi yaba muha buungi, na Mwaana kimeeme ngo mwiinda waandi.

²⁴ Makaanda sa madyaatila mu buungi bwaandi; bambyaasi ba butoto sa banata nkeembu yaaku kunsa bvula.

²⁵ Myeelu mya dyo mibweese kuba myakaangu mu mwiini ko, bukuri kubweese kuba butsuku ko.

²⁶ Bambyaasi sa batwaala nkeembu na lukiinsu lwa makaanda kunsa bvula.

²⁷ Mu dyo, kuri nkotulu kitotolo kyasumuka, muyiriki mya myamibi, bunu pe ngaa-mpya ko, ngo bakoto mu dyo, bani babo batinima mankuumbu mu mukaanda wa mwooyo, wa Mwaana kimeeme.