Nyabusulu ya Yowane 18 - Musamu Wamubwete 2013

Mbwiilulu Babiloni

¹ Ha mambisa haho, me nyamono mbasi yikimi, yasunduka ku mayulu, yaba na lutumu lwalunene, na butoto bwakoto kunsa buungi bwa munkeembu waandi.

² Yo yafula mu mbeembu yayinene, yaleele ti: «Dibwiiri, dibwiiri, Babiloni dyadinene, dikitukiri kikuundi kya mampeeve mamabi, kibeendu kya mampeeve momanso masumuka, banoni bobanso basumuka, bibulu byobinso byasumuka bi bari babele,

³ bukuri makaanda momanso manwa malu ma nkesi dza buyala bwaandi, na bambyaasi ba ha butoto basa buyala na nde, bangaa-mumbungu bari ha butoto babaka busina mu mpinu dza busina bwa nde.»

⁴ Me nyayuka mbeembu yikimi ku mayulu yaleele ti: «Baatu baami, palee mu bvula di, mpisi luhele kuba ntwaari mu masumu ma dyo, na luhele kutaambula biteesu bya mpasi dza dyo,

⁵ bukuri masumu ma bvula di matubukiri natee ku yulu, na Nzaambi baambukiri mwooyo mu bubayi bwa dyo.

⁶ Muyirikilee mamabi, ma kari kayirikila bambaasi, na bweeseenu biteesu byoolo bya mamabi maandi; munsa mbasa yi kari kasaanga, mu saangileenu biteesu byoolo,

⁷ bunu bu kari kakeembise nyutu yaandi, na bu kari kataanda busina bwaandi, mu moniseenu mpasi na manyoongi, bukuri nde wukweleele kunsa mutima waandi ti: "Me nyadzakala mu bumbyaasi, me nyiri mufwiiri ko, na se nyiri mwiinina mpasi dza kufwiilila ko."

⁸ Mu ntoono yiyo, biteesu bya mpasi dzaandi, mfwiilu, ngebe dza kufwiila, nzala, sa miisa kuri nde mu kiluumbu kimosi, na nde sa kanyeenge mu mbaawu, bukuri Mfumu Nzaambi wumutsuundisa, wuri ngaa-kwa.»

⁹ Bambyaasi ba ha butoto, baba kwesa buyala na nde, na bataandiri busina bwa bo, sa badila na sa bateeteke myooko ha yulu mutu mu ntoono nde, ha bamono mwiisi mbaawu yi kanyeengine nde,

¹⁰ bu bateleme kimamanga, mu ntoono boomo bwa mpasi dza nde, bo sa baleele ti: «Kyaari! Kyaari! Kuri bvula dyadinene, Babiloni bvula diri na makwa, bukuri nsundusulu yaaku yitubukiri mu kilookolo kimosi.»

¹¹ Bangaa-mumbungu ba ha butoto, bakwedila na bakoto bufwiiri mu nde, bukuri kusii muutu wubweese kusuumba nkaari bo ko:

¹² nkaari ya woolo, ya palata, ya matari mantalu, ya misaanga, ya mansaanda mamabwete mabeenge, mahembeke, ma mbeengulu ya mbaawu, miti myominso mya mananaasi, bitotolo byobinso byayiriku mu miinu mya nzawu, na bitotolo byobinso byayiriku mu miti myantalu, nsoongo, biseengu na malweende,

¹³ bi basaanga mu byandya, mamfumfuku, mananaasi, milono, libano, malu, maasi, bifulu bya masaangu, bwaangala, bibulu byabinene, bimeeme, makavaalu, bikokolo, manyutu na miheebulu mya baatu.

¹⁴ «Bimbutu bi waba tyaanaa ye, byeki la na ye, busina bwobunso, nkeembu yoyinso bidziimbiri ha busu bwa ye, na babweese kubaka bitotolo bibyo ko!»

¹⁵ Bakooyarikaa bitotolo bibyo, na ba bakiri busina mu bvula didyo, sa bateleme kimamanga, mu boomo bwa mpasi dzaandi, sa badila na sa bakoto bufwiiri;

¹⁶ bo sa baleele ti: «Kyaari! Kyaari, kuri bvula dyadinene, di balwiikiri mansaanda mamabwete mabeenge, mari mbeengulu bunu mbaawu, di balwikiri bilebete bya woolo, matari mantalu na misaanga,

¹⁷ bukuri mu kilookolo kimosi, mburi busina bu bwo budziimbiri!» Banati ba mabwaatu bobanso, bakweyendaa mu mabwaatu, bisari bya mabwaatu byobinso, na bobanso basala mu mubu, baba bateleme kimamanga,

¹⁸ baba fulaana misaakulu, ha bamwiini mwiisi mbaawu yaba nyeengise bvula, bo baleele ti: «Na wafwanikina na bvula dyadinene di?»

¹⁹ Baatu batuba fuunda ku yulu mitu mya bo, bafula misaakulu, badila na bakoto bufwiiri, baleele ti: «Kyaari! Kyaari! Kuri bvula dyadinene! Diri bobanso bari na mabwaatu mu mubu, babangukila mu busina bwa dyo, bukuri mu kilookolo kimosi ditsyaamukini.»

²⁰ Yulu, mono kiminu mu dyo! Beenu se bangisi, bantumu na babikiri, monee kiminu, bukuri Nzaambi tsuundisiri dyo mu ntoono bubi bu kaluyirikiri!

²¹ Mbasi yiri na makwa yanaanguna tari, diri bunu tari dyadinene di batuutilaa bitotolo, yatuba dyo mu mubu, na yaleele ti: «Bubwo, mu mbala mosi, balooso Babiloni, bvula dyadinene, na ka ba bweese kudimono ko.

²² Ku nzo ye, babweese kuyuka mikuunga mya basiki ba ngoomfi, bayimbiri, basiki ba nseembe, na basiki ba mvumvuri ko. Ku nzo ye, babweese kumono se, muutu wuri na kisalu kya mu myooko, mpisi kyo ko; na ku nzo ye, kubweese kuyukukuna lusuku lwa tari di batuutilaa bitotolo ko;

²³ ku nzo ye, babweese kumono buungi bwa mwiinda ko; ku nzo ye, babweese kuyuka mambeembu ma munkuula na ntuumba bari mu lulelusunu lwa makweele ko, bukuri bangaa-mumbungu ba ye, babeeri baatu ba lukiinsu butoto, bukuri mu makundu maaku, ye wawumini makaanda momanso.»

²⁴ Na mu bvula dya Babiloni, badzuukiri makila ma babikiri, ma bangisi, na ma bobanso ba bari bakeke ha butoto.