Nyabusulu ya Yowane 17 - Musamu Wamubwete 2013

Kiyala kya mukyeetu kyakinene

¹ Mosi mu bambasi nsaamu baba bakwaata mambasa nsaamu, wayisa mu kudzoonso na me, waleele ti: «Wasa, me sa nyakusoongo buba nsundusulu kiyala kya mukyeetu kyakinene, kyadzakala ha yulu maampa mamanene,

² Bambyaasi ba butoto basa buyala na nde, na baatu badzakala ha butoto bakolo malu ma buyala bwaandi.»

³ Mbasi yanata me mu kimpeeve ku nsi yankatu. Me nyamono mukyeetu mosi wadzakala ha yulu kibulu kyabeenge, kyaluula mu mankuumbu ma nsaanunu, kyaba na mitu nsaamu na mampoko kuumi.

⁴ Mukyeetu waba walwaata binkuta byabeenge, bikweseme, na bilebete byawoolo, bya matari mantalu na misaanga. Nde waba wakwaata mu kooko kwaandi, mbasa ya woolo yaluula mu mya nsoni na mviindu dza buyala bwaandi,

⁵ Ha mbuunsu yaandi haba hatina nkuumbu mosi ya nsweeki: «Babiloni dyadinene, nguri biyala na mya nsoni mya ha butoto.»

⁶ Me nyamono mukyeetu wakolo mu makila ma bangisi, na mu makila ma bambaangi ba Yesu. Me nyakimuka mu kiteesu kya makwa ha nyamumwiini.

⁷ Mbasi yaleele kuri me ti: «Mu nki ntoono ye wukimuka? Me sa nyayaabisa ye mpaanu dza mukyeetu na dza kibulu kiri na mitu nsaamu, na mampoko kuumi, kiri mu kwemunata.

⁸ Kibulu ki wamwiini ye kyaba, ngo kyasaala ko, sa kitoomboko mu lubila, na sa kyeende ku mfukusulu; baatu badzakala ha butoto, babo bari mankuumbu mahele kutina mu mukaanda wa mwooyo, kuholosono nyirikulu nsi, sa bakimuka ha bamono kibulu, Bukuri kyo kyaba na kyasaala ko, kasi sa kyabweese kumonokono.»

⁹ «Hamaha ha monoko madyeele na nyaabulu. Mitu nsaamu ngo milaandu nsaamu, miri mukyeetu wadzakala ha yulu myo. Mitu mimyo se ngo bambyaasi nsaamu:

¹⁰ bataanu mu bo babwa, mosi wuri, wakaka wakiri kwiisa pe; di kakwiisa nde, mwaa-ntaangu yantele kasa.

¹¹ Kibulu kyaba, na kiri kyasaala ko, yiyo ngo mbyaasi yampoomo, wuri mosi mu bambyaasi nsaamu na wuri mu kweende ku mfukusulu.»

¹² «Mampoko kuumi ma wamwii ye, ngo bambyaasi kuumi, bakiri kutaambula pe kimfumu; kasi sa bataambula lutumu bunu bambyaasi mu kilookolo kimosi, kintwaari na kibulu.

¹³ Bambyaasi bamaba kitsimi kimosi bari na kyo, kya kuha mpinu na lutumu lwa bo kuri kibulu.

¹⁴ Bo sa basa mudziingu kuri Mwaana kimeeme; na Mwaana kimeeme sa kababwiisa, bukuri nde wuri Mfumu ya bamfumu, Mbyaasi ya bambyaasi. Nde sa kababwiisa mu kintwaari na ba kari kateele mbila, ba kari kasoolo na bakwiikama mu nde.»

¹⁵ Mbasi yaleele kuri me ti: «Maampa ma wuri wamoono, madzakikila kiyala kya mukyeetu, ngo baatu, mampuumbu, makaanda na mandiinga.

¹⁶ Mampoko kuumi ma wuri wamoono na kibulu, sa babele kiyala kya mukyeetu, sa bahosono byobinso bi kari na byo, sa bamusa kimpene, sa badya miswinyi myaandi, na sa bamuyoko ku mbaawu.

¹⁷ Mukwongo, Nzaambi wasuusa mu mitima mya bo, kitsiimi kya kukukisa kitaasi kyaandi, mu kukukisa kitaasi kyokimosi, na mu kuyakisa kimfumu kya bo kuri kibulu, natee kuri ma leele Nzaambi mayirimini.»

¹⁸ «Mukyeetu wu wuri wamono ye, ngo bvula dyadinene, diri na kimfumu ha yulu bambyaasi ba ha butoto.»