Nyabusulu ya Yowane 14 - Musamu Wamubwete 2013

Mukuunga wa ba bari bakuula

¹ Me nyatala, na nyamono Mwaana kimeeme waba wateleme ha yulu mulaandu wa Syoni, na mafuunda kuumi na mana ma baatu babatinini nkuumbu nde na ya taayi dyaandi mu mambuunsu ma bo.

² Me nyayuka mbeembu yanangukina ku yulu bunu kiyomo kya maampa malaka na bunu kidumu kya nzasi yayinene; mbeembu yi nyayukiri me yaba bunu ya basiki ba ngoomfi bari mu kusika mangoomfi maaku.

³ Mafuunda ma baatu babo, baba yimbilaa mukuunga wamoono ha busu bwa mboloko, ha busu bwa bibulu bina na bwa binuni; kuri muutu ti mosi waba wakuka mu kuyika mukuunga wunde, mbuti ka bari mu nkama makuumi mana ma mafuunda ko, baba kuuriri ha butoto.

⁴ Bamaba ngo babo bari basii kusumuka mu bakyeetu ko, bukuri baba bakiri banswaasa, bamaba ngo bari mu kwenama Mwaana kimeeme kwokunso ku ka kweyende. Bamaba ngo ba bari bakuula ha kakati dya baatu, mintekesele mya Nzaambi na mya Mwaana kimeeme.

⁵ Mu minwa mya bo, kwasii pala dya mpya ko; bahele na mi baba seembele.

Nyabusulu nzeengulu dza Nzaambi

⁶ Me nyamono mbasi yikimi yaba yooko ku nkati yulu, yaba na Musamu Wamubwete wahele manunu, mu kuyaabisa baatu badzakala ha butoto, mansi momanso, bitsuumbu byobinso, mandiinga momanso na baatu bobanso,

⁷ yikweleele mu mbeembu yayinene ti: «Bvuminee Nzaambi na muheenee nkeembu, bukuri kilookolo ki katsuundisa nde baatu kiisiri; saambilee wunde wayirika yulu na butoto, mubu na manto ma maampa!»

⁸ Mbasi yaboolo yanama yatete yaba kweleele ti: «Dibwiiri, dibwiiri, bvula dya Babiloni dyadinene!» Dyo dyanwiisa mansi Momanso malu ma nkesi dza buyala bwaandi.

⁹ Mbasi yikimi ya batatu yanama boboolo batete, yaleele mu mbeembu yayinene: «Mbuti muutu saambiri kibulu, na kiteki kya kifwaani kya kibulu, na taamburi kidiimbu ha mbuunsu yaandi bunu pe ha yulu kooko kwaandi,

¹⁰ lo nde se sa kanwa malu ma nkesi dza Nzaambi, masekele kwahele bisaangi, munsa mbasa ya nkesi dzaandi, nde sa kaba wakwaamusu kunsa mbaawu na mfulu dza ntiinta ya musaka-nkala, ha busu bwa bambasi bangisi na ha busu bwa Mwaana kimeeme.

¹¹ Mwiisi wa nkwamusunu bo sa katoomboko, mu bibvu ngo bibvu. Basaambila kibulu na kiteki kya kifwaani kya kibulu ki kyo, na mpisi wunde wutaambula kidiimbu kya nkuumbu yaandi, baba na kidzuunu ko, butsuku na mwiini.»

¹² Haho ngo, ha bamono kifiki kya bangisi, bakebaa ntumunu dza Nzaambi na kanyi mu Yesu.

¹³ Me nyayuka mbeembu mosi yafumuna ku yulu yileele: «Tina: "Kiminu kuri babo bafwa, bafwiila mu Mfumu, kubaandika lumalu!" – "Heehe, buleele Mpeeve, bo bawuumaa mu bisalu bya bo, bukuri biyiriki bya bo bikwebanama!"»

Ntolulu bikunu

¹⁴ Me nyatala, na nyamono tuti dyahembeke, na ha yulu dyo, kwaba kwadzakala wafwanikina na mwaana muutu, waba na lukoongolo lwa woolo ha yulu mutu, na mu kooko kwaandi wakwaata kisalulu kyasekusu.

¹⁵ Mbasi yikimi yapala mu Nzo-nzaambi, yabikisa mu mbeembu yayinene kuri wadzakala ha yulu tuti ti: «Heeke kisalulu kya ye na tolo bikunu, bukuri ntaangu ya ntolulu bikunu yimwaatubuka; bukuri bikunu bya butoto bimwaayele!»

¹⁶ Waba wadzakala ha yulu tuti, watubu kisalulu kyaandi ha nsi, na batolo bikunu ha butoto.

¹⁷ Mbasi yakaka yapala mu Nzo-nzaambi ya ku yulu, nde se waba wakwaata kisalulu kyasekusu.

¹⁸ Mbasi yikimi yaba na lutumu mu mbaawu, yapalila ha dziku. Yo yabikisa mu mbeembu yayinene kuri waba na kisalulu kyasekusu ha kooko, yaleele ti: «Laambula kisalulu kyaaku kyasekusu, na kaba binkaangi bya bviinya dya butoto, bukuri bimbutu bwaandi bimwaabeenge.»

¹⁹ Mbasi yakulula kisalulu kyaandi ha butoto, yakaba bimbutu bya bviinya dya butoto, na wabituba munsa kikamukunu kyakinene kya nkesi dza Nzaambi.

²⁰ Bakamuna bimbutu bya bviinya ku mbisa bula, na makila mapala, matubuka natee mu mve ya minwa mya makavaalu, mu kibeensu kya fuunda na nkama saamunu dya bitaki.