Nyabusulu ya Yowane 13 - Musamu Wamubwete 2013

Bibulu byobyoolo

¹ Me nyamono kibulu kitoomboko mu mubu, kyaba na mampoko kuumi na mitu nsaamu, mu yulu mampoko maandi mo kuumi, mwaba mampu kuumi ma lutumu, na ha yulu mpisi mutu waandi kwaba mankuumbu ma nsaanunu.

² Kibulu ki nyamwiini me, kyaba kyafwanikina na ngo, miilu myaandi myaba bunu miilu mya nzusi, munwa waandi bunu munwa nkosi. Maŋataŋo waha mpinu dzaandi, mboloko yaandi na lutumu lwalunene kuri kibulu kikyo.

³ Mosi mu mitu myaandi waba bunu wakeke, kasi mputa yaandi ya mfwiilu yiyo bayibelekese. Butoto bwabutsiina bwakimuka na bwanama kibulu.

⁴ Baatu basaambila maŋataŋo, bukuri nde waheeri lutumu kuri kibulu; basaambila kibulu na baleele ti: «Na wafwanikina na kibulu, na na wakuka mu kunwaanisa kyo?»

⁵ Baha kibulu mbeembu mu kusa biwobiri bya masiiku na bya nsaanunu, bamuha lutumu lwa kusala mu lutaangu lwa mangoondo makuumi mana na moolo.

⁶ Kyo kyadzibula munwa mu kusaana Nzaambi, mu kusaana nkuumbu yaandi, musaampu waandi na babo badzakala ku yulu.

⁷ Bakiha miswa mu kunwaanisa bangisi na mu kuluuluka mu bo, bamuha lutumu ha yulu bitsuumbu byobinso, baatu bobanso, mandiinga momanso na makaanda momanso.

⁸ Bobanso badzakala ha butoto, sa basaambila kibulu kikyo; bobanso bari mankuumbu mahele kutina, mu mukaanda wa mwooyo wa Mwaana kimeeme, wubakekiri, kuholosono kunu mbandukulu nsi.

⁹ «Mbuti muutu wuri na makutu, lo kayuka!

¹⁰ Mbuti muutu wataasulu mu bunkutu, lo ku bunkutu kakweende. Mbuti muutu wataasulu mu lufwa lwa mbeesi yayila, lo mu mbeesi yayila kafwiila. Haho ngo, ha bamono kifiki na kanyi dya bangisi.»

¹¹ Me nyamono kibulu kikimi kyaba pala mu butoto, kyo kyaba na mampoko moolo mari bunu ma mwaana kimeeme, kyaba kwedzoonso bunu maŋataŋo.

¹² Kyo kyaba kwesalila lutumu lwolunso lwa kibulu kyatete, ha busu bwaandi. Kibulu kikyo kyasa kuri ti butoto na badzakala mu bwo, basaambila kibulu kyatete, kyaba na mputa ya lufwa yabeelekiri.

¹³ Kyo kyasa bimaangu byabinene, kuri lo sundiri mbaawu ya ku yulu ha butoto, ha busu bwa baatu.

¹⁴ Mu ntoono bimaangu bi bamuheeri miswa mu kuyirika, ha busu bwa kibulu, kyo kikwedziimbisa babo badzakala ha butoto, na kikweleele kuri badzakala ha butoto ti bayirika kiteki, mu kifwaani kya kibulu ki baleti boko mu mbeesi yayila, ngo kiri mwooyo.

¹⁵ Baha kibulu kyabyoolo kikyo miswa, mu kuha muwuumunu kuri kiteki kya kifwaani kya kibulu kyatete, mpisi kiteki kikyo kidzoonso, na kisa kuri ti badzusa bobanso bari basii saambila kiteki kya kifwaani kya kibulu ko.

¹⁶ Kyo kyasa momanso mayelemene mpisi heki, bakuutu na bilesi, bisina na bawelu, baatu bari na bunsaalisi na bankutu, babasa kidiimbu mu kooko kwa lubakala, bunu pe ha mbuunsu,

¹⁷ mpisi heki muutu kahele kuba na miswa mya kusuumba bunu pe mya kuyarika, mbuti wahele na kidiimbu, na nkuumbu kibulu bunu pe lutaangu lwa nkuumbu kibulu.

¹⁸ Hamaha ngo ha kusa madyeele. Wuri na madyeele katangimisa lutaangu lwa kibulu, bukuri lutaangu lulwo lutaangu lwa nkuumbu muutu. Lutaangu lwaandi ngo nkama saamunu makuumi masaamunu na bisaamunu.