Nyabusulu ya Yowane 12 - Musamu Wamubwete 2013

Mukyeetu bo na maŋataŋo

¹ Kidiimbu kyakinene kyamonoko ku yulu, mukyeetu mosi walwaata ntaangu, wateleme ha yulu ngoondo, na wuri na lukoongolo lwa bambwetete kuumi na boolo mu mutu waandi.

² Nde wuri na yimi, wuri mu kufulaa, wuri na misoongo na wuri mu kwenyonyomoko mu kubuta.

³ Kidiimbu kikimi kyamonoko ku yulu: mono, maŋataŋo mamanene, mabeenge bunu mbaawu, mari na mitu nsaamu na mampoko kuumi, na mu yulu mitu myaandi, muri mampu nsaamu ma lutumu.

⁴ Mukila waandi wakoombolo ndaambu mosi, mu mandaambu matatu ma bambwetete bari ku yulu, na wabatuba ha butoto. Maŋataŋo wateleme ha busu bwa mukyeetu waba weki buta, mpisi heki, kamanaa kubuta, kamumingutina na mwaana.

⁵ Mukyeetu wabuta mwaana wa mubakala, wunde mbasi-tsuku, wutwaalisa makaanda momanso mu luboto lwa kiseengu. Bakitumuna mwaana wunde, bamunata kuri Nzaambi, na kuri mboloko yaandi.

⁶ Mukyeetu wayitika ku nsi yankatu, kwamuyirikila Nzaambi kibeendu, mpisi kaba wadiisulu kukwo, mu fuunda dimosi nkama dzoolo na makuumi masaamunu ma biluumbu.

⁷ Mudziingu wabwa ku yulu, Mikaheli na bambasi baandi banwaana mudziingu na maŋataŋo. Maŋataŋo se na bambasi baandi banwaana mudziingu,

⁸ ngo kasii kubvula makwa ko, na kwasii bakama kibeendu kya bo ku yulu ko.

⁹ Batuba ha butoto Maŋataŋo mamanene, nyoko yayikulu, yi bateele ti dyabulu na Satana, wunde wudziimbisa nsi yansiina, bamutuba ha butoto, bambasi baandi se babatuba kintwaari na nde.

¹⁰ Me nyayuka mbeembu yayinene ku yulu yaleele ti: «Mu lumalu mvuukulu, mpinu, kimfumu kya Nzaambi yeetu, na lutumu lwa Kiristo dyaandi bimwaakwiisa, bukuri mufuundisi bampaangi ba beetu, bamwaamutuba, nde wabee kwebafuundana kuri Nzaambi yeetu, butsuku na mwiini.

¹¹ Bo bamubwiisiri, mu ntoono makila ma Mwaana kimeeme, na mu ntoono maampu ma kimbaangi kya bo; bo basii tya kukalila miwuumunu myaaku ha busu bwa lufwa ko.

¹² Hango-nkuumbu, monee kiminu, mayulu na babo badzakila mu mo! Mpasi kuri butoto na kuri mubu, bukuri dyabulu mwaasunduka kuri beenu, wuri na nkesi dzamakwa, bu kayaari kuri ti Mwaa-ntaangu yantele kari na yo.»

¹³ Maŋataŋo, wasungumina mukyeetu wabutiri mwaana wa mu bakala, bu kamono ti bamutubiri ha butoto.

¹⁴ Baha kuri wa mukyeetu mapaapu moolo ma ngo-noni yayinene, mu kuri ti kadumuka mu kweende ku nsi yankatu, ku kibeendu kyaandi, kukwo ku bamudiisila, mu ntaangu mosi, mu mantaangu, na mu ndaambu ntaangu, kuri la na kidziri kya nyoko.

¹⁵ Nyoko yaluka, mu munwa waandi, maampa mari bunu nyari ha mambisa ma wa mukyeetu, mpisi heki kadyaama mu yo.

¹⁶ Butoto bwayisa mu kubakisa wa mukyeetu; bwo bwadzibula munwa waandi, bwamina mu munwa waandi nyari yapariri mu munwa maŋataŋo.

¹⁷ Maŋataŋo wabakila mukyeetu nkesi, na wayende mu kweesa mudziingu kuri baala ba wa mukyeetu basaala, babo bakebaa mangisi ma Nzaambi, na basimbikila kimbaangi kya Yesu.

¹⁸ Maŋataŋo, ha kateleme, ha yulu munyeenge wa mubu.