Nyabusulu ya Yowane 11 - Musamu Wamubwete 2013

Bambaangi boboolo

¹ Bayakisa me dyaari diri bunu luboto, bandeele ti: «Teleme, teese Nzo-nzaambi na dziku, na babo bakoosaambikilaa mumwo.

² Mbasi Nzo-nzaambi ngo yiri, hemese kwaandi, yaa teese ko, bukuri bayeki bayiha kuri makaanda. Mo sa madzabata bvula dyangisi mu mangoondo makuumi mana na moolo.

³ Me sa nyaha miswa kuri bambaangi baami boboolo, mu kubikula mu fuunda dimosi nkama dzoolo na makuumi masaamunu ma biluumbu kuri balwaata matsaaka.»

⁴ Bo ngo miti myomyoolo mya olive, na bitetukulu bya miinda byobyoolo biri ha busu bwa Mfumu.

⁵ Mbuti muutu tiiri kubasa bubi, lo mbaawu yipariri mu minwa mya bo, na yinyeengisini bataatu ba bo; mpisi wutiiri kubasa bubi, lo bubwo kafwiila.

⁶ Bambaangi babo bari na lutumu lwa kukaanga yulu, mpisi mvula yihele kunoko, mu biluumbu bya babikula bo. Bari na lutumu se lwa kukitula maampa kuri meki makila, na lwa kuseembe butoto, mu mpasi dza bitsuumbu-bitsuumbu, bunu bu batiiriri bo.

⁷ Mu ntaangu yi bamana kuta kimbaangi kya bo, kibulu kitoomboko mu lubila, sa kaba bwisikila mudziingu, sa kababwiisa na kabadzusa.

⁸ Bamvuumbi ba bo sa baba ha kibeendu kya bvula dyadinene, di bateela mu kimpeeve Sodoma na Ngipiti, haho habakomini Mfumu bo.

⁹ Baatu ba mpisi kaanda, kitsuumbu, ndiinga na nsi, sa bamono bamvuumbi ba bo, mu biluumbu bitatu na ndaambu, na bataambula ko ti, badziika bamvuumbi ba bo ku mampeembe.

¹⁰ Baatu bari ha butoto, bari mu kumono kiminu mu ntoono bo, na bari mu kiminu, sa bahelesene bikabu kuri bo na bo, bukuri babikiri boboolo babo, bakwaamisini baatu badzakala ha butoto.

¹¹ Ha mambisa ma biluumbu bitatu na ndaambu, muwuumunu wa mwooyo wa Nzaambi wakoto mu bo, na bo bateleme; babo baba bamono, babaka boomo bwalaka.

¹² Babikiri babo bayuka mbeembu yayinene ku yulu yaleele kuri bo ti: «Nwaatee hamaha.» Bo banwaata ku yulu mu tuti, na bataatu baaku babamono.

¹³ Mu kilookolo kinikyo, butoto bwaningina mu makwa, na kibari kimosi mu bibari kuumi bya bvula kyabwa, na mafuunda nsaamu ma baatu mafwa mu ningununu butoto yiyo. Babo babvuukiri babaka boomo bwalaka, na baha nkeembu kuri Nzaambi ya ku yulu.

¹⁴ Mpasi dza kiteesu kyabyoolo dzaluta. Mono, mpasi dza kiteesu kyabitatu dziri mu kwiisa mu mawasu.

Mvumvuri yansaamu

¹⁵ Mbasi yansaamu yasika mvumvuri. Mambeembu mamanene mayukukuna ku yulu maleele ti: «Kimfumu kya nsi kyeki kuri Mfumu yeetu, na kuri Kiristo dyaandi. Nde sa katuma mu bibvu ngo bibvu.»

¹⁶ Makuumi moolo na mana ma binuni badzakala ha busu bwa Nzaambi, ha yulu mamboloko maaku, bayilimisa mabusu maaku na basaambila Nzaambi,

¹⁷ baleele ti: «Mfumu, beetu tubvutula matoondo kuri ye, Mfumu Nzaambi, Mwa-mpuungu, wuri na waba, bukuri ye wasariri mpinu dzaaku dzadzinene, na ye wadzakisa kimfumu kyaaku.

¹⁸ Makaanda mabaka nkesi, nkesi dza ye dzamonokono, na ntaangu ya kutsuundisa bafwa yitubukiri, ya kuha museendu kuri bisari byaaku, kuri babikiri, kuri bangisi na kuri babvuminaa nkuumbu yaaku, kuri bakuutu na bilesi; ntaangu ya kutsyaamuna babo bari mu kwetsaamuna butoto!»

¹⁹ Nzo-nzaambi yadzibuma ku yulu, sanduku dya lulelusunu lwaandi dyamonoko, mu Nzo-nzaambi yaandi; manseremi, mambeembu, manzasi, ningununu butoto na mvula ya midiingi ya makwa byasalama.