Mukaanda wa Yakobo 1 - Musamu Wamubwete 2013

Mboto

¹ Me Yakobo, nkutu Nzaambi na ya Mfumu Yesu Kiristo, kuri makaanda kuumi na moolo matsamukina mu mansi, mboto yeenu!

Kanyi na madyeele

² Bampaangi baami, lubaanaa lukotiri mu nsindukulu dza bitsuumbu-bitsuumbu, lo monee kiminu kyalaka,

³ bu luyaari ti, nsiitsulu ya kanyi dyeenu yibutaa kifiki.

⁴ Kifiki kiyelemini kusala kisalu kyakuka, mpisi beenu luba na nyirimunu yayibwete, na luba bakuka kuri luhele kuhelele kitotolo ti kimosi.

⁵ Ngo mbuti muutu mu beenu wahele na madyeele, lo kaloombo kuri Nzaambi, wuhaanaa kuri bobanso kwa mungengi, na kwahele biŋaŋunu, na sa kamuha mo.

⁶ Ngo kasi, kaloombo mu kanyi kwahele kuketekese, bukuri wunde wuketekesaana wafwanikina na mupaku maampa wa mubu, waningusu na wanaangunu mu kiteembu.

⁷ Mukwongo, muutu wa bubwo, lo yaa katsima kwaandi ko ti, lo taamburi kitotolo kuri Mfumu.

⁸ Wunde muutu ngaa-maketi-keti, wukwewunga mu manzila maandi momanso.

Muwelu na kisina

⁹ Hemese mpaangi ya muwelu, kaba na kimweese bu bamudzaangisiri,

¹⁰ ngo kasi wa kisina kaba na kimweese bu bamukuriri, bukuri nde sa kaluta bunu kifulu kya kitiiti.

¹¹ Mukwongo, ntaangu yipariri na mwiini wamakwa, yikanisini kitiiti, kifulu kyaandi kisonokini na bubwete bubeeri na kifulu buwiiri. Bwobumosi se wa kisina sa kakuuka kunsa bisalu byaandi.

Nsiitsulu na nsindukulu

¹² Muutu wukuunda nsindukulu wuri mu lwambwe, bukuri bu bameeni kumutsiitsa, nde sa kataambula lukoongolo lwa bumwooyo lwataambukila Nzaambi kuri bamutyaanaa.

¹³ Muutu wukotiri mu nsindukulu, yaa kaleele ko ti: "Nzaambi wuri mu kunsidukula"; bukuri Nzaambi ka katsiitsa kuba wasindukulu mu mamabi ko; na nde-meene ka kasindukulaa muutu ko.

¹⁴ Ngo mpisi muutu wubaanaa wasindukulu mu nyiimunu dza nde-meene, dzimukokaana na dzimukoondaana;

¹⁵ tumi nyiimunu dziyelaana, dzibutiri masumu, na masumu mayelaana, mabutiri lufwa.

¹⁶ Bampaangi baami ba mutima, yaa luhumuka kweenu ko.

¹⁷ Mpisi kikabu kyakibwete, na mpisi kimbwanga kyayirima, lo kya ku yulu, kifumunaa kuri taayi dya buungi, kuri nde kwahele nsobokoso na mposi yayiinga kibeendu ko.

¹⁸ Mu kutya kwaandi, nde watubuta mu maampu ma ngwanwa, mu kuba bunu mintekesele mu biyiriki byaandi.

Kuyuka na kusalila maampu ma Nzaambi

¹⁹ Yaabee dyo bampaangi baami ba mutima ti, mpisi muutu yelemini kuba na malwangukila mu kuyuka, ngo wahele na mawasu mu kudzoonso na mu kubaka nkesi;

²⁰ bukuri nkesi dza muutu dzikookukukisaa nsungumunu ya Nzaambi ko.

²¹ Hango-nkuumbu, bu lumwaalooso myominso myamviindu, na biyiriki bya mutima-bubi, taambuleenu mu kidzuunu maampu makunu mu beenu, makuka mu kubvuukisa miheebulu myeenu.

²² Beenee bakwesalila maampu, nkani ka bani bakwemayuka ko, bakwewunukuna bo-meene.

²³ Bukuri, mbuti muutu wuyuka maampu, ngo wahele kumasalila, lo wa bubwo wafwanikina na muutu wukengisiri kidziri kya nde-meene mu lumweenye.

²⁴ Mukwongo, nde bu kameeni kukengese nyutu yaandi, weensi, na hanaho dzimikini bunu bu kari.

²⁵ Ngo wunde, wuyekamaa na wusaa kikuundi mu mangisi makuka ma bunsaalisi, kwahele kuba muyuki wuri na bunzimbu, ngo wukukisaa biyiriki, lo nde sa kaba mu lwambwe kunsa kisalu kyaandi.

²⁶ Mbuti muutu wumono kuri ti nde munsaambiri, ngo wahele kubangisina kutwaalisa ludima lwaandi, na wukwewunukuna nde-meene, lo nsambukulu yaandi yiri ya mungengi.

²⁷ Nsambukulu ya ngwanwa, na yahele nsumukunu ha busu bwa Taayi Nzaambi, ngo yimayi: kweyilimina bisaani na bafwiilila balumi, kunsa mpasi dzaaku, na kukebe nyutu yaandi mu nsumukunu dza nsi.