Mukaanda kuri Tito 1 - Musamu Wamubwete 2013

Mboto

¹ Me Pawulo, nkutu Nzaambi, ntumu Yesu Kiristo mu mitariri kanyi dya basoolu ba Nzaambi, na mu mitariri nyaabulu ngwanwa bunu buri kinzaambi,

² mu nsiitu dza kidziingu kya bibvu ngo bibvu kiri Nzaambi, nde wahele kuba ngaa-mpya, wasa nsiilulu tekesele mantaangu ma bibvu ngo bibvu.

³ Nde wamonokoso maampu maandi, mu ntaangu yikatsimini nde-meene, mu nyaabusulu yibari batiisila me, bunu buri lutumu lwa Nzaambi, mubvuukisi weetu.

⁴ Hemese bweese na kiyeengi, bifumunaa kuri Nzaambi Taata, na kuri Kiristo Yesu Mubvuukisi weetu, biba kuri ye Tito, mwaana waami wangwanwa mu kanyi dya ntwaari.

Manzelu mamabwe ma mukuutu dibuundu

⁵ Me nyasiisiri ye ku Kerete mu ntoono yiri ti, ye saa mana kubweeyese misiiri, na kusuusa mu mpisi bvula bakulu ba babakala, bunu bu nyakutumini me;

⁶ mbuti kubakimini muutu wahele na ntoono yi bamuseembele, wuri na mukasi mosi, wuri na baala bari na kanyi, bahele na kibila mu ndyaatulu, bunu pe bahele na nko.

⁷ Mukwongo, mukuutu dibuundu wukebaa bya Nzaambi, kayelemini kuba na ntoono yi bamuseembele ko, wahele na masiiku, kari ngaa-mankesi ko, kari yaa-kinwi ko, kari ngaa-bikiindu ko, na kari wukwebakilaa mu bumbabu ko.

⁸ Ngo nde yelemini kuba mutaamburi-banzeense, nduku mamabwe, wasoongolo, wasuunguma, wangisi, yaa kukebe nyutu yaandi.

⁹ Nde yelemini kuba se wakaangama mu maampu ma bayelemene kusiila kanyi, mpisi kaba wakuka mu kusyaamisa baatu mu nyikusulu dzadzibwete, na mu kutungukila se babo bari na muhaawu.

¹⁰ Mukwongo, bangaa-nko, bangaa-nzoonsolo dzahele mufunu, na bangaa-mawunu balaka bari, mbiki ti ha kakati dya bateende bubakala.

¹¹ Ba bubwo bayelemene kubakaangisa minwa, bukuri bari mu kwekotoso kisaangila munsa makaanda mansiina. Bakweyikisa myahele kuyelemene, mu kubaka mufutu wa bumbabu.

¹² Mosi mu bo, wuri mubikiri wa bo-meene waleele ti: "Bari Kerese, mpisi ntaangu bangaa-mpya, bibulu byabibi, bilyeebe biri kisalu kunu kudya."

¹³ Kimbaangi kimaki kiri kyangwanwa. Mu dyaambu didyo, ye yelemini kubaseembe mu makwa, mpisi baba bakuma mu kanyi,

¹⁴ bahele kwekaangama mu mankuma ma Bayudayo, na mu ntumunu dza baatu babisa kusalila ngwanwa.

¹⁵ Kuri babo batsyeemeke, lo byobinso byatsyeemeke; kuri babo bayeki babviimfuka na bahele na kanyi, lo kuri ti kimosi kyatsyeemeke ko; ngo madyeele ma bo na nsimunu bo byayeki byasumuka.

¹⁶ Bo bakweleele ti bayaari Nzaambi, ngo mu biyiriki bo bakwemutuna. Bo bayeki nkeensu na bangaa-tungu, bakoono kuyirika ntoono ti yimosi yayibwete.