Mukaanda kuri bari Loma 9 - Musamu Wamubwete 2013

Nzaambi na kaanda di kari kasoolo

¹ Me ngwanwa nyiri mu kudzoonso mu Kiristo, nyahele kufuta mpya, nsimunu yaami yinteelele kimbaangi, mu Mpeeve Yangisi,

² ti me nyiri na ngebe dzalaka, na nyiri mu kwebama kunsa mutima waami mpisi ntaangu.

³ Me nyitiisila mu me-meene, kuba kunsa mpopi, na kuba la na Kiristo, mu ntoono bampaangi baami, bampaangi baami ba mu kaanda dya muswinyi,

⁴ bapalila mu Isaheli. Kuri bo, bari baha kiteesu kya kuba baala ba Nzaambi, nkeembu, ndelusunu, kikabu kya mangisi, kisalu kya lusaambulu, nsiilulu.

⁵ Bataayi bari, Kiristo wapalila mu bo mu muswinyi, nde wuri hayulu byobinso, Nzaambi wasakumunu mu bibvu. Amene.

⁶ Ka kuri ko ti maampu ma Nzaambi, mayeki mawa mufunu. Bukuri bobanso bapalila mu Isaheli, bari Isaheli;

⁷ na babo bapalila mu Abalaami, bobanso ka bari baala ba nde ko, kasi: «Mu Isaki, ye wubaka babo babateele ti bapalila mu ye.»

⁸ Mbangukulu ti: kari baala ba muswinyi ko, bari baala ba Nzaambi, kasi baala bansiilulu bari mu lutaangu lwa bapalila mu nde.

⁹ Mukwongo, mu lusiilulu luri maampu mamama: «Mbasi-tsuku mu mantaangu maama, me sa nyiisa, na Sara sa kaba na mwaana wa mubakala.»

¹⁰ Kari manamo kitsu ko, ngo Lebeka se, wabakiri yimi mu wunu Isaki, taayi dyeetu.

¹¹ Mukwongo, baala baba bakiri kubutuka pe, na baba bakiri bahele kuyirika mamabwe bunu pe mamabi, mpisi heki bitaasi bya Nzaambi binamitina kuba, bunu buri nsoolulu yaandi ya bunsaalisi.

¹² Kari mu nzila ya biyiriki ko, ngo bunu bu tiiriri muteeri-mbila, Nzaambi waleele kuri Lebeka ti: «Mwaana wa mukuutu sa kaba mu bunkutu kuri mwaana-nguri.»

¹³ Bunu bu diri dyatinu: «Me nyatya Yakobe, ngo kasi nyabele Esawu.»

¹⁴ Ngo nki tuleele? Buri bubwo buri bubayi Nzaambi kari na bwo ko? Ti bele na dyo pe!

¹⁵ Bukuri nde waleele kuri Moose ti: «Me sa nyabakila ngebe kuri wunde wu ntiiri kubakila ngebe; na me sa mba na kyaari mu wunde wu ntiiri kumwiinina kyaari.»

¹⁶ Hango-nkuumbu, mimyo myahele mu miswa mya wunde wutiiri, bunu pe mya wunde wuyirika, ngo mu miswa mya Nzaambi wubakila ngebe.

¹⁷ Mukwongo, Matinu maleele kuri Falaho: «Mu didyo me nyatelemisi ye, mpisi heki mu ye, me nsoongo mpinu dzaami, na mpisi heki badzoonsolo nkuumbu yaami mu nsi yansiina.»

¹⁸ Hango-nkuumbu, kuri wunde wu katiiri kubakila ngebe, lo wumubakiri ngebe; kuri wunde wu katiiri kukubisa mutima, lo wumukubisiri.

Nkesi na kyaari kya Nzaambi

¹⁹ Hango, ye lo leeriri me ti: «Heki mu nki ntoono Nzaambi kakoobweesa kuŋaŋinaa? Na wuri lo tsiitsiri kutungukila kutya kwa nde?»

²⁰ Heki ye muutu na wuri mu kukaalisa mbeembu kuri Nzaambi? Buri kisa lo kileeriri kuri mubuumbi ti: «Buri wuri wanyirikila bumabu?»

²¹ Buri mubuumbi wahele na lutumu, mu kuyirika mu tubuumbu twotumosi, kisa kya lukiinsu, na kisa kyahele kuba kya lukiinsu?

²² Ngo Nzaambi watiiri kusoongo nkesi dzaandi, na kuyaabisa mpinu dzaandi, wakiindisa mutima mu nkindusulu yayinene mu bisa bya nkesi, bi bari bayirika mu ntoono ya mfukusulu.

²³ Nde watiiri se kuyaabisa busina bwa nkeembu yaandi, kuri bisa bikari kabakila ngebe, bi katekisiri kuyirika mu ntoono nkeembu yaandi.

²⁴ Beetuneenu turi, babo ba kari kateele mbila, kari hani ha kakati dya Bayudayo kitsu ko, ngo se na ha kakati dya makaanda.

²⁵ Bunu bu kari kaleele mu mukaanda Ose ti: «Me sa nteele, wunde wahele kuba kaanda dya me, ti kaanda dya me, na mukyeetu wahele kuba nduku ya mutima, ti nduku ya mutima;

²⁶ na ha kibeendu ki baba baleele kuri bo ti: "Beenu luri kaanda dya me ko", haho sa babateele baala ba Nzaambi ya mwooyo.»

²⁷ Esaya waleele mu ntoono Isaheli ti: «Ti hayuku lutaangu lwa baala ba Isaheli luri bunu munyeenge wa mubu, lo mwaa-ndaambu yisaala yiba yabvuukusu;

²⁸ bukuri Mfumu sa kakukisa maampu maandi momanso mu mawasu, ha butoto.»

²⁹ Bunu bwaba tekesele kuleele Esaya ti: «Mbuti Mfumu ngaa-mikaangu kasii tusisikila mwaa-baatu bapalila mu beetu ko, nkani twaketi kuba bunu Sodoma, nkani twaketi kufwanikina na Ngomora.»

Isaheli na mvuukulu mu kanyi

³⁰ Hango nki tuleele? Ti: makaanda mahele kwenama nsungumunu, babaka nsungumunu; nsungumunu yifumunaa mu kanyi,

³¹ ngo kasi, Isaheli wukwenama mangisi mu kubaka nsungumunu, wahele kubangisina mu mangisi.

³² Bukuri nki? Bukuri nde wahele kusakila mu kanyi, ngo mu biyiriki. Bo babumuna kya mu «tari dya mbumukunu makya»,

³³ bunu bu diri dyatinu ti: «Mono, me nyisuusa mu Syoni, tari dya mbumukunu makya, lweende dya mbwiisulu makubu. Ngo wunde wusiila kanyi mu nde, kafwa nsoni ko.»