Mukaanda kuri bari Loma 7 - Musamu Wamubwete 2013

Kifwaani mu makweele

¹ Mukwongo, bampaangi, me kuri bari na nyaabulu ya mangisi nyiri mu kudzoonso. Buri beenu lwahele kuyaaba, ti mangisi mari na lutumu mu muutu, mu ntaangu yoyinso yikari mu bumwooyo?

² Mukasi wuri kunsa lutumu lwa mulumi, wu bari bakaangama mu mangisi, mu ntaangu yiri mulumi wakiri mwooyo, ngo mbuti mulumi fwiiri, lo nde kuulukiri mu mangisi ma mulumi.

³ Hango-nkuumbu, mbuti mulumi wakiri mwooyo, ngo mukasi pariri na bakala dikimi, lo baleeriri ti nde ngaa-kimpala; ngo mbuti mulumi fwiiri, lo mukasi bakiri bunsaalisi ha busu bwa mangisi, kuri hayuku nde pariri na bakala dikimi, lo wahele kuba ngaa-kimpala.

⁴ Beenu se bunubwo, bampaangi baami, beenu lwayeki lwafwa mu mangisi mu nyutu ya Kiristo, mu kuba ba muutu mukimi, wunde wafulukusu mu bafwa, mpisi tubeeneenu na bimbutu mu ntoono Nzaambi.

⁵ Mukwongo, mu ntaangu yi twaba twakiri kwedyaatila mu kimuutu, mantiilu ma masumu mu nzila ya mangisi, maba kwesalaana mu binamu byeetu, mu kubuta bimbutu binata ku lufwa.

⁶ Ngo mu lumalu, twayeki twakuuluka mu mangisi, twafwa mu mi twaba twakaangama, kuri heki tuba bankutu mu kiteesu kyamono kya Mpeeve, kari mu kiteesu kya kikulu kya mukaanda ko.

Mangisi na masumu

⁷ Ngo nki tuleele? Buri mangisi ngo masumu? Ti bele na dyo pe! Kasi mbuti ka nzila ya Mangisi ko, nkani me nyahele kuyaaba masumu. Mukwongo, mbuti ka mangisi maleele kuri ti: «Yaa sa nyiimunu ko», nkani me nyaketi kuyaaba nyiimunu ko.

⁸ Mu nzila ya mangisi, masumu mabaka mpwaani, ya kubuta mu me, nyiimunu dza bitsuumbu-bitsuumbu. Bukuri, mangisi mbuti mo pe, lo masumu mafwa.

⁹ Mu ntaangu yayikulu, me nyanata kidziingu kwahele mangisi; ngo mangisi bu mayisa, masumu mabweesiri kuba mamwooyo.

¹⁰ Ngo me nyafwa; dyamonokono ti mangisi maketi kuha me bumwooyo, meki kunata ku lufwa.

¹¹ Mukwongo, mu nzila ya mangisi, masumu mabaka mpwaani ya kuwuna me, na ya kudzusa me.

¹² Mu didyo, mangisi matsyeemeke, na lutumu lwangisi, lwasuunguma na lwalubwete.

¹³ Buri haho, mamabwe, meki kuri me lufwa? Ka butsiitsa kuba ko! Kasi masumu mu kumonoko kuri me ti masumu, mo mabuta lufwa kuri meenu mu nzila ya mamabwete, mpisi ngaa-masumu kaba nkati na masumu mu nzila ya ntumunu.

Muutu kunsa lutumu lwa masumu

¹⁴ Beetu tuyaari ti mangisi mari ma kimpeeve, ngo me nyiri na nyutu ya muswinyi, bayeki banyarika kuri masumu.

¹⁵ Mamo ma nyiri mu kuyirika, nyahele kubakula; bukuri mari nyahele kutya kuyirika, mamo ngo ma nyiyirika, kasi mamo ma mberiri, mamo ngo ma nyiyirika.

¹⁶ Ngo mbuti, mamo mari ntii ko ngo ma nyiyirika, lo me ntaamburi ti mangisi mamabwete.

¹⁷ Ngo mu lumalu, kari me nyibweese kuyirika mamo ko, kasi masumu mari mu me.

¹⁸ Me nyaari ti mamabwe mahele mu me, bu ntiiri kuleele ti, mu muswinyi waami. Nzala kuyirika mamabwe yiri mu me, kasi nyahele kubangisina kumayirika.

¹⁹ Mukwongo, me nyahele kuyirika mamabwe ma ntiiri, kasi me kuyirika mamabi mari ntii ko.

²⁰ Mbuti mamo mari ntii ko, ngo ma nyiyirika, lo kari me nyibweese kumayirika ko, kasi masumu mari mu me.

²¹ Me nyimono kiteesu kimaki: ha ntiiri kuyirika mamabwe, kumonokono mamabi.

²² Me nyimono kiminu mu mangisi ma Nzaambi, bunu buri muutu wa kunsa-kati.

²³ Ngo me nyimono kiteesu kikimi mu binamu byaami, kiri mu kunwaanisa ngisi ya nyukulu yaami, na kukotoso me boroko dya ngisi ya masumu, yiri kunsa binamu bya me.

²⁴ Kyaari kuri me! Nani wukuula me mu nyutu yimayi ya lufwa?

²⁵ Matoondo kuri Nzaambi, mu Yesu Kiristo Mfumu yeetu! Hango-nkuumbu, mu nyukulu ya me-meene me nyiri nkutu ya mangisi ma Nzaambi, ngo mu muswinyi, nyiri nkutu ya mangisi ma masumu.