Mukaanda kuri bari Loma 16 - Musamu Wamubwete 2013

Mamboto

¹ Me nyiluheeri ntumunu mu ntoono Foyibe, kibusi kyeetu, nde se kisari kari mu dibuundu dya Kengereya,

² mpisi heki lumutaambula mu Mfumu, mu kiteesu kyayelemene kya bangisi, na lumubakisa mu musamu ngo musamu, wu kaba na nzala beenu; bukuri nde wabeeri mubakisi wa baatu balaka, na wa me-meene.

³ Heenee mboto kuri Piriska na kuri Akila, bambaasi baami ba kisalu mu Kiristo Yesu,

⁴ bari mu ntoono kidziingu kya me, baketi kuhoomboso kidziingu kya bo-meene; kari wunu me nyibvutula matoondo kuri bo ko, ngo se na mabuundu momanso ma makaanda.

⁵ Heenee se mboto kuri dibuundu dikookutukinaa mu nzo bo. Heenee mboto kuri Epayineto, nduku yaami ya mutima, nde wuri watete mu Asya, mu kusiila kanyi mu Kiristo.

⁶ Heenee mboto kuri Mariya, nde wasala kwalaka mu ntoono beenu.

⁷ Heenee mboto kuri Anderoniko bo na Yunya, bo bari kaanda dyaami, na bambaasi baami ba mu boroko, baatu ba mvuumfu ha kakati dya bantumu, bo batekisiri kuba mu Kiristo ti na me.

⁸ Heenee mboto kuri Ampilyato, nduku yaami ya mutima mu Mfumu.

⁹ Heenee mboto kuri Urbano, mbaasi yeetu ya kisalu mu Kiristo, na kuri Estaki, nduku yaami ya mutima.

¹⁰ Heenee mboto kuri Apele, nde wasoongiri bimbaangi byaandi mu Kiristo. Heenee mboto kuri babo bari mu nzo Aristobulo.

¹¹ Heenee mboto kuri Erodyono, kaanda dyaami. Heenee mboto kuri baatu ba Narkiso bari mu Mfumu.

¹² Heenee mboto kuri Tirifayina na Tirifosa, bo basala kwalaka mu Mfumu. Heenee mboto kuri Peresi, nduku ya mutima, nde wasala kwalaka mu Mfumu.

¹³ Heenee mboto kuri Lufo, wasoolu mu Mfumu, na kuri nguri yaandi yiri se nguri me.

¹⁴ Heenee mboto kuri Asinkirito, kuri Felengo, kuri Ereme, kuri Patoroba, kuri Erema, na kuri bampaangi bari kintwaari na bo.

¹⁵ Heenee mboto kuri Filolongo na kuri Yulya, kuri Nere bo na kibusi kyaandi, kuri Olimpa, na kuri bangisi bari kintwaari na bo.

¹⁶ Heelesenee mboto beenu na beenu, kuri mu nyumutunu yangisi. Mabuundu momanso ma Kiristo maluheeri mboto.

Nsyamusunu ya mpotulu

¹⁷ Bampaangi, me nyilusyaamisa mu kusa madyeele, mu baatu bakwesa nkabunu na bakwelubumusa makya, mu nyikusulu dzi luri lwataambula; batekelee mbisa;

¹⁸ bukuri baatu ba bubwo bahele kusalila Mfumu yeetu Kiristo, ngo kasi myooyo mya bo-meene, na mu maampu mamabwe na mu nzoonsulu dzalupyelu, bo bakwewuna baatu bahele kulubuka.

¹⁹ Mukwongo, bintambukulu byeenu byayabakana kuri bobanso. Ngo me nyimono kiminu mu ntoono beenu, me ntiiri ti beenu luba na madyeele mu mamabwete, na luba kutsyeemeke kwahele mamabi.

²⁰ Mwaa kidzika kyantele, Nzaambi ya kiyeengi sa kakosono Saatana kunsa bitaambi byeenu. Bweese bwa Mfumu yeenu Yesu buba na beenu!

²¹ Timoteho, mbaasi yaami ya kisalu, wuluheekiri mboto; Lukyo, Yasoni na Sosipatoro bari kaanda dyaami se, baluheekiri mboto.

²² Me se Teretyo, mutini mukaanda wumawu, nyiluheekiri mboto mu Mfumu.

²³ Ngayo, wataambula me na wutaambula dibuundu dyodinso wuluheekiri mboto. Erasto, musweeki mboongo dza bvula, wuluheekiri mboto, Kwarato, mpaangi yeetu se wuluheekiri mboto. [

²⁴ ]

Nkeembu kuri Nzaambi

²⁵ Kuri wunde wakuka mu kulukumisa, bunu buri Musamu waami Wamubwete, wu nyikwenata mu nyaabusulu Yesu Kiristo, bunu buri nyabusulu mpaanu dzasweeku, kuholosono mu mantaangu mahele mbandukulu na manunu.

²⁶ Mpaanu dzidzo dzamonokono mu lumalu, mu matinu ma babikiri, mu lutumu lwa Nzaambi yahele mbandukulu na manunu, mu kuri ti makaanda momanso mabaka nyaabulu na matumuma mu kanyi.

²⁷ Kuri Nzaambi, ndemosi ngaa-madyeele, mu Yesu Kiristo, kuri nde kuba nkeembu mu mantaangu momanso! Amene.