Mukaanda kuri bari Efeso 5 - Musamu Wamubwete 2013

Kunata kidziingu kunsa buungi

¹ Beeneenu minsombisiri mya Nzaambi bunu baala ba mutima;

² na dyaatileenu kunsa ntiilu, bunubwo se Kiristo kari kalutiila, na kayekele nyutu yaandi kuri Nzaambi mu kikabu na mu kumudzusa, mu ntoono beetu, bunu mananaasi ma mfuku yayibwete.

³ Buyala, na nsumukunu dza bitsuumbu-bitsuumbu, bunu pe ntiki-mboongo, yaa biba ha kakati dya beenu ko, bubwo bwayelemene kuri bangisi.

⁴ Mantoono mamabi, nzoonsulu dza budzeeke bunu pe dzansoni, byahele kuyelemene ha kakati dya beenu; ngo kasi byayelemene mvutukulu matoondo.

⁵ Mukwongo, yaabeenu dimadi: mpisi kiyala, bunu pe wasumuka, bunu pe ngaa-lukakutu, yiyo nsambukulu-biteki, lo wabubwo wahele na saala mu Kimfumu kya Kiristo bo na Nzaambi.

⁶ Yaa kuba muutu wuluwuna mu misamu myahele mufunu ko, bukuri mu mimyo nkesi dza Nzaambi dzikwiisaana ha yulu baala ba nko.

⁷ Yaa luba mfuundu mosi na bo ko.

⁸ Mu ntaangu yayikulu beenu lwaba mampimbisi; mu lumalu beenu lweki buungi mu Mfumu. Yendee lwedyaatila bunu baala ba buungi.

⁹ Mukwongo, kimbutu kya buungi kiri mu nyirikulu momanso ma mbweeyulu, ma nsungumunu, na ma ngwanwa.

¹⁰ Yaabeenu kuswaasisa mari mamabwe ha busu bwa Mfumu,

¹¹ na yaa lweba kintwaari mu biyiriki byahele mufunu bya mampimbisi ko, ngo kasi bitungukilee.

¹² Mukwongo, diri dyansoni mu kudzoonsolo ma bari mu kweyirika bo mu nsweeki.

¹³ Momanso ma bari batungukila mamo, mari mamonokono ha buungi,

¹⁴ bukuri momanso ma baanaa mamonokono lo meki buungi. Hango-nkuumbu, kaleele ti: «Siimbika, ye wuri tolo, teleme ha kakati dya bafwa, na Kiristo kasemese buungi bwaandi ha yulu ye.»

¹⁵ Ngo seenee madyeele na bunkete mu ndyatulu yeenu, yaa luba bunu biwulu ko, ngo beenee bunu bangaa-madyeele,

¹⁶ bayaari kubakila ndaandu mu ntaangu yimayi, bukuri biluumbu biri byabibi.

¹⁷ Hango-nkuumbu, yaa luba madzeeke ko, ngo kasi bakuleenu buri kutya kwa Mfumu.

¹⁸ Yaa lwekolo malu ko, mu mo mu kwiisikila nzimbusulu, kasi beenee baluula mu Mpeeve.

¹⁹ Syamisineenu beenu na beenu mu mikuunga mya nkeembu, mu mikuunga mya mbambukulu mwooyo, na mikuunga mya kimpeeve, yimbileenu na siikeenu Mfumu mu mutima weenu ndemunso.

²⁰ Bvutulee matoondo mpisi ntaangu, mu myominso, kuri Taayi Nzaambi, mu nkuumbu ya Mfumu yeetu Yesu Kiristo.

Bakasi na Balumi

²¹ Yende lwetumuma bamosi kuri bakaka, mu kibvumi kya Kiristo.

²² Bakasi batumuma kuri balumi ba bo-meene bunu ti kuri Mfumu,

²³ bukuri mulumi ngo mutu mukasi, bunu Kiristo se wuri mutu dibuundu, nde Mubvuukisi nyutu;

²⁴ ngo kasi bunu bu tumumaana dibuundu kuri Kiristo, bunu bwo se, bakasi bayelemini kutumuma kuri balumi baaku mu myominso.

²⁵ Balumi, tyeenee bakasi beenu, bunubwo se Kiristo kari watya dibuundu, na wayekele nyutu yaandi mu ntoono dyo.

²⁶ Nde wadisa dyangisi mu kuditsyeemese mu nswaakulu ya maampa, kunsa Maampu;

²⁷ mpisi kamonokoso kuri nde-meene, dibuundu dyakeembusu, dyahele na mpita bunu pe mihonyi, bunu pe kitotolo kyafwanikina na bibyo, ngo kasi diba dyangisi na dyahele maseembu.

²⁸ Balumi se bunubwo, bayelemini kutya bakasi ba bo-meene, bunu bu batiiriri manyutu ma bo-meene. Wunde wutiiri mukasi wa nde-meene, lo nyutu ya nde-meene katiiri.

²⁹ Mukwongo, kuri muutu wutsiitsa kubele nyutu ya nde-meene ko, kasi nde wudiisila na wusaana bunkete mu yo; bunubwo se Kiristo kakoosiilaa mu dibuundu.

³⁰ Bukuri beetuneenu turi binamu bya nyutu yaandi.

³¹ Mu didyo, wabakala sa kasiisa taayi na nguri yaandi, na sa kakaangama na mukasi waandi, na boboolo sa baba muutu mosi.

³² Mpaanu dzimadzi dziri dzadzinene; na me bu nyiri mu kuleele ti, mimyo mitariri Kiristo na dibuundu.

³³ Ngo kasi mitariri se mosi-mosi mu beenu, mpisi muutu mu beenu katya mukasi wa nde-meene, bu katiiriri nyutu ya nde-meene; na mukasi kabvumina mulumi.