Mukaanda kuri bari Efeso 4 - Musamu Wamubwete 2013

Kintwaari mu kanyi

¹ Me nyilusyaamisa, me nyiri boroko mu ntoono Mfumu, mu kudyaatila mu kiteesu kyayelemene na mbila yiyo yibari baluteele,

² mu nkulukulu yoyinso, mu bundeembu, mu nkindusulu-mutima, mu kwekuunda bambaasi beenu na beenu mu ntiilu.

³ Salilee makwa, mu kukebe kintwaari kya Mpeeve, mu musiinga wa kiyeengi.

⁴ Nyutu mosi yiri, na Mpeeve se mosi, bunubwo se bari baluteele mu nsiitu mosi, ya mbila yeenu.

⁵ Mfumu mosi, kanyi dimosi, mbotokulu yimosi,

⁶ Nzaambi mosi yiri, Taayi dya bobanso, wutuma bobanso, wukwesala mu bobanso, na wuri mu bobanso.

⁷ Kuri mpisi muutu mu beetu, bari baha bweese, bunu buri kiteesu kya kikabu kya Kiristo.

⁸ Hango-nkuumbu, diri dyaleelu ti: «Bu kamana kunwaata ku yulu, nde wakaanga bunkutu, na waha bikabu kuri baatu.»

⁹ Ngo, «nde wanwaata», lo mambangukulu ti ki? Ti nde katekisilaana kukulumuka mu mankoonsi ma ku nsuku butoto tumi keki nwaata.

¹⁰ Wunde wakulumuki, wunu nde se wanweeti kunu kinsongi-yulu, mpisi heki nde kaluulusa nsi na yulu.

¹¹ Na nde-meene wasa kuri ti, babamosi baba bantumu, bakaka babikiri, bakimi madingisi, bakaka se batari, na bakimi se bayikisi.

¹² Mimyo, mu kusa kuri ti, bangisi baba bayirima mu kusa kisalu, kya ntuungulu nyutu ya Kiristo,

¹³ natee bu tutubukiri beetu-banso, mu kintwaari kya kanyi na kya nyaabulu Mwaana Nzaambi, mu muutu wabuuka, mu kiteesu kya kuba na mutele wasuka wa Kiristo.

¹⁴ Haho lo tubweese kuba baala, banyingusu na bakweyende mu mpisi kiteembu kya nyikusulu dza kimpa kya baatu, mu lupyelu lwa bo ko, na mu mawunu na lumvuki lwa bo.

¹⁵ Ngo kasi habaanaa tukwedzoonso ngwanwa mu ntiilu, lo tukwebuuka mu nde mu momanso; nde Kiristo, wuri mutu.

¹⁶ Mu nde nyutu yoyinso yiri yayirima, na yasokomo kwakubwete, mu biyikulu byobinso byayikwaata, bunu buri kisalu kyayelemene na mpisi muutu, na yikwebuuka mu ntuungulu ya yo-meene kunsa ntiilu.

Kidziingu kyamoono mu Kiristo

¹⁷ Mu didyo, me nyileele na nyitswiikisa mu Mfumu ti, yaa lubweese kwedyaatila bunu bangooyi ko bakwedyaatila mu madyeele ma bo-meene mahele mufunu.

¹⁸ Madyeele ma bo mayeki mamabi, bo banzeense mu mwooyo wa kinzaambi, mu ntoono kuhele kwa nyaabulu, na mu ntoono nkubusulu mutima yi bari na yo.

¹⁹ Bo basaala na nsoni mu bo-meene ko, bayeki bayekele manyutu maaku mu buyala, mu kweyirika nsumukunu dza bitsuumbu-bitsuumbu mu kiteesu kya makwa.

²⁰ Ngo beenu kari bubwo ko, luri lwayika mu kuyaaba Kiristo.

²¹ Mbuti heki beenu lwayuka mi kari kaleele nde-meene, na mu nde, beenu baluyikisa, bunu buri ngwanwa yiri mu Yesu,

²² lo luyelemini kuyisila ndyaatulu yatekesele ya mu muutu wamukulu, wukwesumuka mu nyiimunu dza mawunu.

²³ Kitukeenu baatu bamoono, mu mpeeve ya madyeele meenu,

²⁴ na lwaatee muutu wamoono, wayiriku bunu buri kutya kwa Nzaambi, kunsa nsungumunu na bungisi byangwanwa.

²⁵ Hango-nkuumbu, hotee mpya, dzoonsee ngwanwa mpisi muutu kuri mbaasi yaandi, bukuri turi binamu bamosi na bakaka.

²⁶ Bu lubakiri nkesi, yaa lubwa mu masumu ko: ntaangu yaa yidyaama, kuri beenu bunu bu luri na nkesi ko,

²⁷ yaa luha mpwaani kuri dyabulu ko.

²⁸ Ngaa-kwiibi ya kabweese kuyiba ko, ngo kamono mpasi mu kusala bunu buyelemini, mu myooko mya nde-meene, mpisi heki kabaka kya kuha kuri wunde wuri na nzala kubaka.

²⁹ Yaa kupala ntoono ti mosi yayibi mu munwa weenu ko, ngo mbuti kuri yipala, lo yiba yayibwete, yiri mufunu mu ntuungulu, mpisi yiha bweese kuri babo bayuka.

³⁰ Yaa lunyoongoso Mpeeve Yangisi ya Nzaambi ko, mu yo beenu bari balusa kidiimbu mu kiluumbu kya nkuululu.

³¹ Mpisi musamu wankari, wa kabala, wa nkesi, kuyaama, bitari, na mpisi mamabi, biba byayusula ha kakati dya beenu.

³² Beeneenu na mbweeyulu-mutima mu beenu na beenu, bangaa-bundeembu, kwehemesene beenu na beenu, bunu bwa luhemesene Nzaambi mu Kiristo.