Mukaanda kuri bari Efeso 2 - Musamu Wamubwete 2013

Nzaambi watuha mwooyo mu Kiristo

¹ Beenu lwaba lwafwa mu ntoono lumvuki lweenu, na mu masumu meenu,

² mu mo, beenu lwaba kwedyaatilaana mu ntaangu yayikulu, bunu buri bifu bya nsi yimayi, bunu buri lutumu lwa mfumu mpinu dza kingye-kingye, mpeeve yiyo yiri mu kwesala mu lumalu, ha kakati dya baala ba tungu.

³ Beetu-banso se twaba kintwaari na bo, na twaba kwedyaatilaana mu ntaangu yayikulu, bunu buri nyiimunu dza muswinyi weetu, mu kweyirika matiiri muswinyi na bitsimi byeetu byabibi. Mu mbeelu yeetu, twaba baala bayelemene kubwiilikila nkesi dza Nzaambi bunu bakaka.

⁴ Ngo Nzaambi waluula mu ngebe, mu ntoono ntiilu yaandi yayinene, yikari katutiila,

⁵ bu twaba twafwa mu lumvuki, nde watuha mwooyo mu Kiristo. Mu bweese beenu luri lwabvuukila.

⁶ Mu Kiristo Yesu, Nzaambi watufulukisa ha kimosi na nde, na watudzakisa ha kimosi na nde kunu kinsongi-yulu,

⁷ mu kusoongo mu mantaangu makwiisa, busina bwabuukula bwa bweese bwaandi, mu mbweeyulu-mutima waandi kuri beetu mu Kiristo Yesu.

⁸ Mukwongo, mu bweese beenu luri lwabvuukila mu ntoono kanyi, kari mu beenu-meene ko, ngo kikabu kya Nzaambi;

⁹ kari mu biyiriki ko, mpisi heki muutu kahele kusiika.

¹⁰ Mukwongo, beetu turi biyiriki bya Nzaambi, nde watuyirika mu Kiristo Yesu, mu kuba na biyiriki byabibwete, bi kari katekesele kuyirika, mpisi tubisalila.

Kintwaari mu Kiristo

¹¹ Hango-nkuumbu, baambukeenu mwooyo ti, beenu mu ntaangu yayikulu, lwaba bangooyi mu muswinyi, bahele kuteende bubakala, mu mwiinunu ya babo bateende bubakala, mu nteendulu ya myooko mya baatu.

¹² Baambukeenu mwooyo ti lwaba, mu ntaangu yiyo kwahele Kiristo, bahele kuba na miswa mu kudzakala mu nsi ya Isaheli, banzeense mu ndelusunu dza lusiilulu, bahele na nsiitu na bahele na Nzaambi mu nsi.

¹³ Kasi mu lumalu, mu Kiristo Yesu, beenu bari mu ntaangu yayikulu lwaba la, lweki bebele mu makila ma Kiristo.

¹⁴ Mukwongo, nde ngo kiyeengi kyeetu: nde wasa kuri ti baba boolo, beki mosi, na mu nyutu yaandi, nde wabwiisa kibaka kya mpambukusu ngo lubelu.

¹⁵ Nde wayisila lutumu lwa Mangisi na misiku, mpisi heki mu nde-meene, nde kayirika mu bo boolo, muutu ndemosi wamoono, mu kusa kiyeengi,

¹⁶ na mu kusa nyukusunu ha kakati dya bamosi na bakaka, mu nyutu yomosi kintwaari na Nzaambi mu kuruwa, mu dyo, nde kari kamana lubelu.

¹⁷ Bu kayisa, nde wayaabisa Musamu wa kiyeengi kuri beenu lwaba la, na kuri baba bebele.

¹⁸ Bukuri mu nde, beetu turi na miswa, bamosi na bakaka, mu Mpeeve yomosi, mu kuba hari Taata.

¹⁹ Mu didyo, beenu lusii banzeense, na minzakikiri ko, kasi lweki bangaa-nsi kintwaari na bangisi, baatu bari mu kaanda dya Nzaambi.

²⁰ Beenu lwatuunguma ha yulu lufulu lwa bantumu na babikiri, Kiristo Yesu nde-meene ngo tari dya ha kuumbu.

²¹ Mu nde, ntuungulu yoyinso yasuunguma na deredee, yiri mu kunaaka mu kuba Nzo-nzaambi yangisi mu Mfumu.

²² Mu nde, beenu se luri lwatuunguma mu kintwaari, mu kuba nzo yi dzakalaa Nzaambi mu Mpeeve.