Mukaanda kuri bari Efeso 1 - Musamu Wamubwete 2013

Mboto

¹ Me Pawulo, ntumu Yesu Kiristo, mu kutya kwa Nzaambi, kuri bangisi bari ku Efeso, na kuri bakwiikama mu Kiristo Yesu,

² bweese na kiyeengi bifumunaa kuri Nzaambi, Taayi dyeetu na kuri Mfumu Yesu Kiristo biba na beenu.

Mamabwete matuha Nzaambi mu Kiristo

³ Kaba wasakumunu, Nzaambi wuri Taayi dya Mfumu yeetu Yesu Kiristo, nde watusakumuna mu nsakumunu dzodzinso dza kimpeeve, kunu kinsongi-yulu mu Kiristo.

⁴ Mu nde, Nzaambi watusoolo, tekesele nyirikulu nsi, mu kuba bangisi na bahele na mi babaseembele, ha busu bwaandi kunsa ntiilu.

⁵ Nzaambi watutaasiri mu kuba baala baandi ba kubuukisa mu Yesu Kiristo, bunu buri bweese bwa ntiilu yaandi,

⁶ mu kuha ndumusu ya nkeembu ya bweese bwaandi, bu kari katuha kwa mungengi mu mwaana waandi wa mutima.

⁷ Mu nde, beetu turi na nkuululu mu makila maandi, na mpemusunu ya lumvuki, bunu buri busina bwa bweese bwaandi,

⁸ bu kari kabwookoso mu beetu, kunsa nyaabulu yoyinso na madyeele.

⁹ Nde watuyaabisa mpaanu dza kutya kwaandi, bunu buri kiminu kyaandi ki kasoongiri mu Kiristo,

¹⁰ mu ntoono kitsimi kya nkukulu mantaangu: kukutukisa byobinso mu Kiristo, biri ku mayulu na biri ha butoto mu nde.

¹¹ Mu nde, beetu twataambula saala mu nteelulu wari, batekesele kutusoolo, bunu buri bitaasi bya wunde wuyirikaana momanso, bunu buri kutya kwaandi,

¹² mu kuri ti tuha ndumusu ya nkeembu yaandi, bu twatekesele kusa nsiitu mu Kiristo.

¹³ Mu nde, beenu luri lwayuka maampu ma ngwanwa, Musamu Wamubwete wa mvuukulu yeenu. Mu nde se, bu lwasiiriri kanyi, balusiiri kidiimbu mu Mpeeve Yangisi ya lusiilulu.

¹⁴ Mpeeve yiyo, yitukebelaa saala dyeetu, natee mu nkuululu yi tubaka mu ntoono ndumusu ya nkeembu yaandi.

Lusaambulu lwa Pawulo

¹⁵ Hango-nkuumbu, me se bu nyayukiri badzoonsolo mu ntoono kanyi dyeenu mu Mfumu Yesu, na ntiilu yeenu mu bangisi bonso,

¹⁶ nyahele kuhoto kubvutula matoondo mu ntoono beenu. Me nkoolubaambukilaa mwooyo mu nsaambulu dzaami,

¹⁷ mpisi heki Nzaambi ya Mfumu yeetu Yesu Kiristo, Taayi dya nkeembu, kaluha mpeeve ya madyeele na ya nyabusulu, mu kuyaaba nde.

¹⁸ Hemese Nzaambi katsyeemese mwiinunu yeenu mu mitima, mpisi lubakula nkya nsiitu yiri mu mbila yikari kaluteele, nkya busina bwa nkeembu yiri mu saala dyaandi, ha kakati dya bangisi,

¹⁹ na nkya nzaangumunu, ya bvulula, ya mpinu dzaandi, mu ntoono beetu basiila kanyi, bunu buri mpinu dza makwa ma lutumu lwaandi,

²⁰ dzi kari kamonokoso mu Kiristo, bu kamufulukisi ha kakati dya bafwa, na bu kamudzakisa ha lubakala lwaandi kunu kinsongi-yulu.

²¹ Kiristo wuri ha yulu kikuutu kyokinso, lutumu lwolunso, mpinu dzodzinso, kimfumu kyokinso, na mpisi nkuumbu yibatsiitsa kutaanguna; kari munu mu ntaangu yimayi ko, ngo se na mu ntaangu yikwiisa.

²² Nzaambi wasuusa byobinso kunsa bitaambi bya Kiristo, na wamusuusa mu kuba mutu ha yulu dibuundu dyodinso,

²³ diri nyutu yaandi, nduululu ya wunde wuluulusaa byobinso mu bobanso.