Musamu wamubwete watina Malako 5 - Musamu Wamubwete 2013

Yesu watsinikisa muutu waba na mampeeve mamabi

¹ Bo batubuka ku simu dya mubu dyakaka, mu nkoonsi bari Ngeraseno.

² Yesu, bu kasunduka mu bwaatu, hanaho muutu mosi waba na mpeeve yayibi, wapala kunsa mampeembe, wamubwaana.

³ Muutu wunde waba dzakalaana kunsa mampeembe. Kwaba kwahele muutu waba bangusinaa kumukaanga ti hayuku mu syeene.

⁴ Mu ntaangu ngo ntaangu, baba mukaangaana mu biseengu na masyeene; ngo kasi nde haba lo wutabula masyeene, na wutaandula biseengu bibyo. Kwaba kwahele muutu waba wakuka mu kumudzuunisa.

⁵ Mantaangu momanso, butsuku na mwiini, nde haba lo wuri kunsa mampeembe, na ku yulu milaandu, wukwefula misaakulu na wukwelemese nyutu mu matari.

⁶ Bu katalila Yesu ku la, nde wadzumuna, watsukuma ha busu bwaandi,

⁷ wabikisa mu mbeembu yayinene waleele ti: «Nki ha kakati dya me na ye, Yesu Mwaana Nzaambi Mwa-yulu? Me nyikuyingukila, mu nkuumbu Nzaambi, yaa kwaamisa me ko!»

⁸ Bukuri wabaleele kuri nde ti: «Mpeeve yayibi, pala mu muutu wu!»

⁹ Yesu wamufuula ti: «Nkuumbu ye na?» Nde wabvutula ti: «Nkuumbu me "Mukaangu", bukuri beetu turi balaka!»

¹⁰ Nde waba yingukilaa Yesu kwalaka, mpisi kahele kubaheeke kuri la na nkoonsi yiyo!

¹¹ Ha teke haho, kwaba mpuumbu bangulu yayinene yaba mu kwedya bebele na mulaandu,

¹² Mampeeve mamabi mayingukila Yesu ti: «Tuheeke kweetu mu bangulu, mpisi beetu tukoto mu bo!»

¹³ Yesu wabaha miswa. Mampeeve mamabi bu mapala makoto mu bangulu. Mpuumbu bangulu yapatuka ku nsuku beenge, na yabwa mu mubu, kampe mafuunda moolo madyaama mu mubu.

¹⁴ Batari ba bangulu bayitika na bayende kweyaabisa ntoono yiyo, kunsa bvula na mu mabula. Baatu bayisa mu kumono mamo mayirimini.

¹⁵ Bu bayisa kuri Yesu, bamono muutu waba na mampeeve mamabi wadzakala, walwaata binkuta, na wuri kunsa kidzuunu. Baatu bamono boomo.

¹⁶ Bambaangi bayaabisa kuri baatu babo mimyo mayirimini mu muutu waba na mampeeve mamabi, na mu bangulu.

¹⁷ Baatu babaandika kuyingukila Yesu, kuri ti keende kwa la na nkoonsi ya bo.

¹⁸ Yesu kabaanaa weki nwaata mu bwaatu, muutu watsiinikini mu mampeeve mamabi, wamuyingukila mpisi keba kintwaari na nde.

¹⁹ Yesu kasii muha miswa ko, ngo kasi wamuleele ti: «Yende ku nzo yaaku, kuri ba ye-meene, na yaabisa momanso makuyirikiri Mfumu, na bu kakusiiriri ngebe.»

²⁰ Nde wayende na wabaandika mu kwebikisa, mu mumvuka wa mabula kuumi, momanso mamuyirikiri Yesu; na bobanso bamono dyo dyankimukunu.

Mukyeetu mosi wabelemene kinkuta kya Yesu, na mwaana Yayiro wafuluka

²¹ Yesu bu kabweese kubvutuka ku simu dya mubu dyakaka [mu bwaatu], mpuumbu baatu yayinene yakutukina ha kaba nde mu teke mubu.

²² Mosi mu bakuutu ba nzo-nkutukunu, nkuumbu yaandi Yayiro, bu kamono Yesu, wabwa ha miilu mya nde.

²³ Wamuyingukila kwalaka na waleele ti: «Mwaa-mwaana me wa mukyeetu, weki mu kufwa. Tweendee wumutetekele myooko mpisi kabvuuka na kaba mwooyo.»

²⁴ Yesu wayende kintwaari na nde. Mpuumbu baatu yayinene yamunama na bamusiila mfina.

²⁵ Kwaba mukyeetu mosi wuri makila maba kwemupalaana, mu kiteesu kya mibvu kuumi na myoolo.

²⁶ Nde wamono mpasi dzalaka mu myooko mya babuki balaka. Wamana mboongo dzodzinso dzi kaba na dzo, ngo kasi ha kibeendu kya kuleenge, bubeeru kusa kuleme.

²⁷ Bu kayuka ma baba leelaana mu Yesu, nde wakoto kunsa mpuumbu, na wamubelemene ku mambisa mu kinkuta.

²⁸ Nde waleele kunsa mutima ti: «Mbuti me mbelemini kwaandi ti kinkuta kya nde, lo me mvuukiri.»

²⁹ Mu kilookolo kinikyo, makila mahoto kupala, na nde wamono kunsa nyutu yaandi ti tsiinikini.

³⁰ Hanaho, Yesu wayaaba mu nde-meene ti mpinu dzipariri mu nde. Bu kasyeeteke, wafuula ti: «Na belemini binkuta bya me?»

³¹ Bayiki baandi bamuleele ti: «Ye wumono kuri ti mpuumbu yiri mu kwefinikina kuri ye, ngo wubweese kufuula ti: "Na belemini me?"»

³² Nde wadyeengese kisooso mu kutala kari na siiri bubwo.

³³ Wa mukyeetu, bu kaba kayaaba mamo ma kabwanikini na mo, wayende, wabwa ha busu bwa Yesu, mu boomo na mantekete, na wamuleele ngwanwa yoyinso.

³⁴ Yesu waleele kuri nde ti: «Mwaana me wa mukyeetu, kanyi dyaaku dikubvuukisiri, yende mu kiyeengi, na tsiinika mu bubeeru bwaaku.»

³⁵ Yesu bu kaba wakiri mu kudzoonso, baatu banaangukini ku nzo mukuutu nzo-nkutukunu baleele kuri mukuutu ti: «Mwaana ye wa mukyeetu mwaafwa; buri wubweese kuwungisa kwaandi Muyikisi.»

³⁶ Ngo Yesu bu kayukiri ma baba dzoonso, waleele kuri mukuutu nzo-nkutukunu ti: «Yaa ba na boomo; sa dini kanyi kitsu!»

³⁷ Yesu kasii bweese kutala ko ti baatu beende kintwaari na nde, ha yulu wuni Petelo, Yakobo, na Yowane mpaangi Yakobo.

³⁸ Bu batubuka ku nzo mukuutu nzo-nkutukunu, Yesu wamono kisaangila, na baatu bari mu kudila na kunyoongo kwalaka.

³⁹ Yesu kakotaa mu nzo, waleele kuri bo ti: «Buri luri mu kusa kisaangila, na buri luri mu kudila? Mwaana wahele kufwa, ngo tolo kari kabwa.»

⁴⁰ Kasi baatu bamusiila munsiku. Ngo nde kamanaa kupalisa bobanso ku mbasi, horiri taayi na nguri ba mwaana, na bayiki baba kintwaari na nde, na kotiri mu nzo mwaba mwaana.

⁴¹ Nde wakwaata kooko kwa mwaana na waleele ti: «Talita kuum,» mbangukulu lo ti: «Mwaa-ntuumba, me nyikuleele ti siimbika!»

⁴² Hanaho, mwaa-ntuumba wasiimbuka na wabeke kweyende. Mwaa-nde waba na bvula kuumi na dzoolo. [Mu kilookolo kinikyo], baatu bamono dyo dyankimukunu yalaka.

⁴³ Yesu wabadika mu makwa ti, muutu ti mosi yaa kayaaba ko, na waleele ti: «Muheenee byandya.»