Musamu wamubwete watina Malako 4 - Musamu Wamubwete 2013

Nkuma ya mukuni

¹ Yesu wabweese kubaandika kuyikisa mu teke mubu, na mpuumbu baatu yayinene-yinene yakutukina hari nde, kuri heki nde kanwaataa, dzakiri mu bwaatu, mu mubu, na mpuumbu yoyinso ya baatu yaba yateleme ha simu dya mubu.

² Nde waba bayikisaana misamu myalaka mu mankuma, na wabaleele mu nyikusulu dzaandi ti:

³ «Yukeenu! Mukuni mosi wayende ku nseke kwekuna.

⁴ Bu kaba mu kwenyaka nsaangi, dzadzimosi dzabwa ha luteembu lwa nzila; banoni bayisa na badzitooto.

⁵ Dzakaka dzabwa ha yulu matari mari butoto mwaa-bwantele. Dzamene mu mawasu, bukuri butoto bwaba bwahele na musundu.

⁶ Ngo ntaangu bu yapala, mitwiikila myababuka mu mwiini na myakana bukuri myaba myahele na myaansi.

⁷ Nsaangi dzakaka dzabwa ha butoto bwa mpaanga. Mpaanga, bu dzabuuka, dzasyetekese mitwiikila na myakoono kuha bimbutu.

⁸ Nsaangi dzakaka dzabwa ha butoto bwabubwete. Miti myamene, myabuuka na myabuta bimbutu. Myamimosi myabaka makuumi matatu, myakaka makuumi masaamunu, na myakimi nkama.»

⁹ Yesu wabweese kuleele: «Mpisi wunde wuri na makutu ma kuyuka, lo kayuka.»

Bukuri nki Yesu kakwedzoonsolo mu mankuma?

¹⁰ Yesu kabaanaa weki ha lumperi, babo bakoobaa na nde ha kimosi na bo kuumi na boolo bamufuula mu mitariri mankuma.

¹¹ Nde wabvutula kuri bo ti: «Mpaanu dza kimfumu kya Nzaambi kuri beenu bari baha; ngo kasi kuri bari ku mbasi, momanso kwebadzoonsolo mu mankuma,

¹² mpisi heki diba, "Kutala ngo kuri batala, ngo bahele kumono; kuyuka ngo kuri bayuka, ngo kasi bahele kubakula, mu kubata kuri ti bayiinga dyeele, na bataambula mpemisi."»

Yesu wubaangula nkuma ya mukuni

¹³ Yesu wabaleele ti: «Beenu lubaanaa lwahele kubakula nkuma yimayi, lo buri lusiila mu kubakula mankuma momanso makaka?

¹⁴ Mukuni wukuna Maampu.

¹⁵ Baatu babamosi bari bunu luteembu lwa nzila, haho hari mu kubwa Maampu. Bu bameeni kuyuka, hanaho Satana wiisiri na yisiri Maampu mabeeri makuna mu bo.

¹⁶ Baatu bari bunu nsaangi dzibwiiri ha butoto buri ha yulu matari, ngo bari bu bayukiri Maampu hanaho, bamataamburi mu kiminu.

¹⁷ Ngo bo bahele na myaansi mu bo-meene, mwaa-kidzika kyantele bari na kyo. Ha lumbisa haho, mpasi bunu pe nkwamusunu dzibaanaa dzeki kwiisa mu ntoono Maampu, mwaa-ntaangu yantele babwiiri.

¹⁸ Baatu bakaka bari bunu nsaangi dzibwiiri hari mpaanga, ngo babo bari bayukiri Maampu,

¹⁹ kasi minyoongi mya nsi yi, mawunu ma busina, na nyiimunu dza bitsuumbu-bitsuumbu, bu bikotiri mu bo, biswetikise Maampu, na meki bimbutu kubuta pe.

²⁰ Babo bari bunu nsaangi dzibwiiri ha butoto bwabubwete, ngo babo bari bu bayukiri Maampu, bamataamburi na babutiri bimbutu: wamosi makuumi matatu, wakaka makuumi masaamunu, na wakimi nkama.»

Nkuma ya mwiinda

²¹ Yesu waleele kuri bo ti: «Buri muutu lo tweesi mwiinda mu kuri ti kamufuka kunsa mpiri, bunu pe mu kumusuusa kunsa mbuka? Buri lo kari mu kumusuusa ha yulu kitetukulu kya mwiinda ko?

²² Mukwongo, byobinso byasweeke sa byaba byamonokono, na mansweeki momanso sa maba mayabukunu na pwelelee.

²³ Mbuti muutu wuri na makutu mu kuyuka, lo kayuka.»

²⁴ Yesu wabweese kubaleele ti: «Seenee madyeele mu ma luyuka! Sa baluteesele mu kiteesulu kikyo kilusalila beenu-meene, na sa babweese kiteesu ha yulu haho kuri beenu.

²⁵ Bukuri wunde wuri na kitotolo, sa babweese kumuha; ngo kasi wunde wahele na kitotolo, sa bayisila na ki kari na kyo.»

Nkuma ya nsaangi dzikwebuuka dzo-meene

²⁶ Yesu wabweese kuleele ti: «Bumabu buri Kimfumu kya Nzaambi, kiri bunu muutu wanyaka nsaangi ha butoto.

²⁷ Kabwa tolo, bunu pe, kaba naana, butsuku na mwiini, lo nsaangi dzikwemene na dzikwebuuka, ngo nde wahele kuyaaba dyaburi.

²⁸ Butoto bwo-meene bubutaa bimbutu: ku tekesele munsengele, tumi mungingiri, ku manunu mankono mayele mu mungingiri.

²⁹ Mankono mamanaa kuyele, mwaa-kidzika kyantele, bahoriri mambeesi bukuri ntaangu ya kutolo yiyelemini.»

Nkuma ya lusaangi lwa muti wuri nkuumbu sinapi

³⁰ Nde wabweese kuleele ti: «Na nki tufwanikisa Kimfumu kya Nzaambi? Bunu pe mu nkya nkuma tukiyabisila?

³¹ Kiri bunu lusaangi lwa muti wuri nkuumbu sinapi. Habaanaa balukunini mu butoto, lo lubvuriri buntele mu nsaangi dzodzinso dziri ha butoto.

³² Ngo bu balukunini, lwo lumenini na lweki lubvuriri kudzaangama mu binkoolo byobinso, lo lusiiri mampaala mamanene, kuri lo banoni batuungiri madzaansa mu mampaala maandi.»

³³ Mu mankuma malaka ma bubwo, Yesu kaba kweyikisaa Maampu, bunu bwaba nyukulu ya baatu.

³⁴ Yesu waba kubadzoonsilaa munu mu mankuma. Ngo kabaanaa weki ha lumperi na bayiki baandi, lo misamu myominso wukwebaangula.

Yesu wadzuunisa kiteembu kya makwa

³⁵ Mu kiluumbu kinikyo, nsinsika bu yatubuka, Yesu waleele kuri bayiki baandi ti: «Tusabukeenu ku simu dya mubu dyakaka.»

³⁶ Bo basisa mpuumbu baatu, na bayiki bamunatina mu bwaatu mu kaba; ngo kwaba se mabwaatu makimi ha teke nde.

³⁷ Kiteembu kyamakwa kyateleme, na mipaku myabwa mu bwaatu, kuri bwaatu bweki kusaka kuluula mu maampa.

³⁸ Yesu waba ku mambisa ma bwaatu na wabwa tolo ha yulu nkata. Bo bamusiimbila na bamuleele ti: «Muyikisi, buri ye wahele kumono mutima mpasi, ti beetu tufuukila?»

³⁹ Yesu bu kasiimbuka, waŋaŋana kiteembu na waleele kuri mubu: «Wura! Dzuuna!» Kiteembu kyawa, na kidzuunu kyakinene kyamonoko.

⁴⁰ Yesu waleele kuri bo ti: «Buri luri na boomo? Buri beenu lwakiri kanyi pe?»

⁴¹ Bayiki babwiilikila kinkuunka kyalaka, na balelesene bo na bo ti: «Kya muutu wu, wuri kiteembu na mubu bimuywiila?»