Musamu wamubwete watina Malako 16 - Musamu Wamubwete 2013

Mfulukulu Yesu

¹ Mpuumunu bu yaluta, Mariya Madelene, Mariya ma nguri Yakobo, na Salome basuumba milolongo myamfuku yayibwete mu kweekila nyutu Yesu.

² Mu minkya-minkya mya bwiisi bwa kiluumbu kyatete mu lumiingu, bo baba beki ku mampeembe, ntaangu bu yaba kwepala.

³ Bo baba kwelelesene ti: «Na wutuyisikila tari dyaduka bulu?»

⁴ Bu basiimbila miisu mya bo, bamono ti tari dyeki dyayusulu; nkati tari meene dyaba dyadinene na dyaleme.

⁵ Bu bakoto munsa mampeembe, bamono mwa munkuula mosi wadzakala ha lubakala, walwaata kinkuta kyahembeke; bo babwiilikila kinkuuka.

⁶ Munkuula wunde wabaleele ti: «Yaa luba na boomo ko; beenu lukwesaka Yesu, wa ku Nadzareti, wu babee komono; fulukiryeenu, kasiiryee ha ko; monee ha babee basuusa nyutu yaandi.

⁷ Ngo yendeenu lweluleele kuri bayiki baandi na kuri Petelo ti: "Nde wulutekisiri ku Ngalili; kukwo beenu lumumono, bunu bu kabee luleele!"»

⁸ Bu bapala bayitika kwa la na mampeembe, mu mantekete, na mu mutima mambaawu. Bo basii leele kuri muutu ti mosi ko, bukuri baba na boomo. [

Yesu wamonokono kuri Mariya Madelene

⁹ Yesu bu kafuluka mu minkya mya kiluumbu kya lumiingu, watekesele kumonoko kuri Mariya Madelene, mu nde kapalisiri mampeeve nsaamu mamabi.

¹⁰ Nde keendaana, weeyaabisa kuri baba kweyendaana na Yesu, baba bakoto bufwiiri na baba dilaana.

¹¹ Bo bayuka ti «Yesu wuri mwooyo, na monikinyee kuri Mariya», babisiri kusiila kanyi.

Yesu wamonokono kuri bayiki boolo

¹² Ha mambisa haho, Yesu wamonokono mu kifwaani kikimi kuri boolo mu bayiki, baba kweende ku bula.

¹³ Bo bayende kweeyaabisa kuri bambaasi basii saala, ngo babisiri kusiila kanyi.

Yesu wamonoko kuri bayiki kuumi na mosi

¹⁴ Ku nsukulu, bo kuumi na mosi, bu baba mu kudya, Yesu wabamonokono na wabaseembe mu ntoono kuhele kwa kanyi na nkubulu mitima mya bo, bukuri basii siila kanyi mu myaleeriri babo bamumwiini kuri mwaafuluka.

¹⁵ Nde wabaleele ti: «Yendee mu nsi yansiina, lweyaabisa Musamu Wamubwete kuri biyiriki byobinso.

¹⁶ Wunde wusiila kanyi, na wutaambula mbotokulu sa kabvuuka, ngo wunde wuhele kusiila kanyi sa bamukesele mukanu.

¹⁷ Kuri babo basiila kanyi, bidiimbu bimabi sa byamonoko: mu nkuumbu ya me, bo sa babingisa mampeeve mamabi, sa badzoonso mandiinga manzeense,

¹⁸ sa bakwaata banyoko [mu myooko], ti hayuku banwiini bidzusaa, lo bibamonoso mpasi ko, sa bateeteke myooko ha yulu babeeru, na babeeru sa batsiinika.»

Yesu wabvutuka kuri Nzaambi

¹⁹ Mfumu Yesu, kamanaa kudzoonso kuri bo, wanaangunu mu mayulu na wadzakala ha lubakala lwa Nzaambi.

²⁰ Bayiki bayende mu kweyaabisa Musamu Wamubwete mwomunso. Mfumu waba kwesala na bo, na kwetswiikisa maampu mu bidiimbu.]