Musamu wamubwete watina Matayi 25 - Musamu Wamubwete 2013

Nkuma bantuumba kuumi banswaasa

¹ «Kimfumu kya mayulu kya fwanikina na bantuumba kuumi banswaasa, bari bu baholo miinda mya bo, bayende mu kweebwaana mulumi.

² Bataanu mo bo maba biwulu, na bataanu bari na madyeele.

³ Bantuumba ba biwulu bu baholo miinda, bahele kuholo maasi.

⁴ Ngo bari na madyeele baholo miinda myaaku na maasi mu mayuku.

⁵ Mulumi bu kaba dziingila mu kwiisa, bobanso miisu mya baleme na babwa tolo.

⁶ Mu kakati dya butsuku, mbeembu yabikisa: "Monee mulumi, yookee [lu] mubwaana."

⁷ Hanaho, bantuumba babo bobanso basiimbuka, na bayirika miinda myaaku.

⁸ Ngo bantuumba ba biwulu baleele kuri bari na madyeele ti: "Heenee beetu mwaa-maasi mu ma beenu, bukuri miinda mya beetu, miri mu kudzima."

⁹ Bari na madyeele babvutula, baleele: "Pele! Makukula mu beenu na mu beetu ko. Ngo kasi yendee lwelusaka bayariki na lusuumba ma beenu-meene."

¹⁰ Babo bu baba kweesuumba maasi, mulumi wayisa; na baba bayirima bakoto na nde, mu munkeembu wa makweele, na bakaanga mweelu.

¹¹ Mwa-mantaangu bu maluta, bantuumba bakaka se biisiri, baleele: "Mfumu, Mfumu, tudzibukila mweelu."

¹² Nde wabvutula, waleele ti: "Mu ngwanwa me nyiluleeriri ti, me nyahele kuluyaaba."

¹³ Ngo beenee naana, bukuri lwahele kuyaaba kiluumbu na kilookolo.»

Nkuma ya bisari bitatu

¹⁴ «Mukwongo, sa dyaba bunu muutu wuri kabaanaa wukweende ku budyeengi, nde wateele bisari byaandi na wabayakisa lubaku lwaandi.

¹⁵ Kuri wamosi, nde waha bitalanta bitaanu; kuri wakaka byoolo; kuri wakimi kimosi, muutu-muutu bunu bwaba makwa maandi. Tumi nde wayende ku budyeengi.

¹⁶ Hanaho, kisari kyataambiri bitalanta bitaanu wayende kweebisalila, na wabaka bitaanu bikimi.

¹⁷ Bwobumosi kuri wunde wataambiri byoolo, wabaka byoolo bikimi.

¹⁸ Ngo wunde wataambiri kimosi, bu kayende, wahaka bulu, wasweeke mboongo dza Mfumu yaandi.

¹⁹ Mantaangu malaka bu maluta, Mfumu bisari bibyo wayisa mu kutambikisa lubaku na bo.

²⁰ Wunde wataamburi bitalanta bitaanu, wakokosolo, watwaala bitalanta bitaanu bikimi, waleele ti: "Mfumu bitalanta bitaanu wanyakusiri, mono bitalanta bitaanu bikimi, me nyabakiri."

²¹ Mfumu yaandi wamuleele ti: "Bwabubwete! Ye kisari kyakibwete na kyakwiikama. Ye wabeeri wakwiikama mu byantele, ngo me nyikusuusiri ha yulu byalaka. Koto mu kiminu kya mfumu yaaku."

²² Wunde se wataambiri byoolo, wakokosolo, waleele ti: "Mfumu, bitalanta byoolo ye wayakisiri me. Mono byoolo byakaka, me nyabakiri."

²³ Mfumu yaandi wumuleeriri ti: "Bwabubwete! Ye kisari kyakibwete na kyakwiikama. Ye wabeeri wakwiikama mu byantele, ngo me nyikusuusiri ha yulu byalaka. Koto mu kiminu kya mfumu yaaku."

²⁴ Ngo kasi, wataambiri kitalanta kimosi, nde se bu kakokosolo, waleele ti: "Mfumu, me nyabee nyaari ti ye muutu wuri na mutima wakuba, ye kootolaa kwaaku kuri wahele kukuna, na wukutukisaa biri wahele kunyaka.

²⁵ Na me nyabee na boomo; ngo nyayeensi kweesweeke kitalanta kya ye kunsa butoto. Mono kyaaku kyoki."

²⁶ Mfumu yaandi wabvutula, waleele kuri nde ti: "Ye wuri kisari kyakibi na kiri na bubolo. Ye wayaari ti me kootolaa hari nyahele kukuna; na nkookutukisaa hari me nyahele kunyaka.

²⁷ Habee nkani wasuusiri, mboongo dza me, kuri bakebi ba mboongo, kuri me habee bu nyikwiisa, me bweese kuholo dzaami na ndaandu.

²⁸ Ngo yisilee kitalanta kuri nde, na luha kyo, kuri wunde wabeeri na byo kuumi.

²⁹ Mukwongo, kuri wunde wuri na byobinso, sa bamuha, na sa kaba wabuukula mu bitotolo. Ngo kasi kuri wunde wahele na kitotolo, na ki kari na kyo sa bayisila.

³⁰ Kisari kyahele mufunu, muloose kunsa mampimbisi ma ku mbasi; kukwo kuba bidilu na nkweetulu miinu."»

Nsundusulu yampotulu

³¹ «Mbasi-tsuku ha kwiisa Mwaana muutu kunsa nkeembu yaandi, na bambasi bobanso kintwaari na nde, haho nde kadzakala ha yulu mboloko ya nkeembu yaandi.

³² Makaanda momanso sa makutukina ha busu bwaandi, na nde sa kahaambila babamosi na bakaka, bunu bu haambula mutari bimeeme na bataba.

³³ Nde sa kasuusa bimeeme ku lubakala lwaandi, na bataba ku lumoso.

³⁴ Haho, mbyaasi sa kaleele kuri bari ku lubakala lwaandi: "Waseenu, beenu bari taayi dya me walusakumuna; taambuleenu saala ngo kimfumu kibari baluyirikila tekesele nyirikulu nsi.

³⁵ Bukuri me nyaba na nzala, na beenu lwampeeri bya kudya; nyaba na mpwiisu, na beenu lwampeeri bya kunwa; nyaba munzeense, na beenu lwantaamburi;

³⁶ Nyaba mpene, na beenu lwandwiikiri; nyaba nyabeele, na beenu lwayisa kumono; nyaba mu boroko, na beenu lwayisa kuri me."

³⁷ Hanaho, basuunguma sa babvutula kuri nde, sa baleele ti: "Mfumu, nkya ntaangu beetu twamwiini ye kuri wuri na nzala na twakudiisiri, wuri na mpwiisu, na twakuheeri bya kunwa?

³⁸ Mu nkya ntaangu twakumwiini kuri wuri munzeense, na twakutaambiri, bunu pe wuri mpene, na twakulwiikiri?

³⁹ Nkya ntaangu twakumwiini kuri ye wabeele, bunu pe wuri mu boroko na twayisiri ku wuri ye?"

⁴⁰ Mbyaasi sa kabvutula, sa kaleele kuri bo ti: "Mu ngwanwa me nyiluleele ti: Mamo ma lwayirikiri kuri mosi, mu bampaangi bamaba, babvuriri buntele, lo kuri me lwayirikiri."»

⁴¹ «Haho mbyaasi sa kaleele kuri bari ku lumoso ti: "Tatukeenu la na me, beenu ba bari babulila mpopi, yendeenu ku mbaawu yahele manunu, yibari bayirikila mu ntoono dyabulu na bambasi baandi.

⁴² Bukuri me nyaba na nzala, na beenu lwasii mpa bya kudya ko; nyaba na mpwiisu, na lwasii mpa bya kunwa ko; nyaba munzeense, na lwasii ntaambula ko;

⁴³ nyaba mpene, na lwasii ndwiika ko; nyaba nyabeele, na nyaba mu boroko, na lwasii kwiisa kumono me ko."

⁴⁴ Bo se sa babvutula, sa baleele ti: "Mfumu nkya ntaangu beetu twamwiini ye, kuri wuri na nzala, bunu pe mpwiisu, bunu pe wuri munzeense, bunu pe wuri mpene, bunu pe wabeele, bunu pe wuri mu boroko, na beetu twasii kubakisa ye ko?"

⁴⁵ Haho, nde sa kabvutula kuri bo, sa kaleele ti: "Mu ngwanwa me nyiluleele ti: mamo ma lwaheriri kuyirika beenu kuri mosi mu babvuriri buntele bamaba, lo kuri me lwaheriri kumayirika."

⁴⁶ Na babo, sa beende ku nseembulu dzahele manunu, ngo kasi basuunguma ku kidziingu kyahele manunu.»