Musamu wamubwete watina Matayi 23 - Musamu Wamubwete 2013

Kusa madyeele mu Batini ba mangisi na Bafarisi

¹ Hanaho, Yesu wadzoonso kuri mampuumbu na kuri bayiki byaandi,

² waleele ti: «Batini na Bafarisi kubaangula mangisi ma Moose.

³ Hango, yirikee na kebee momanso ma baluleele, ngo ya lwesalila bunu buri biyiriki bya bo ko; bukuri bo baleele ngo bahele kusalila.

⁴ Bo bakwekaanga matsulu mamanene [maleme mu kunata] na bamateeteke ha yulu maheembu ma baatu, kasi bo, batiiri kumaningisa mu muleembu wa bo-meene ko.

⁵ Biyiriki bya bo byobinso kwesa mukuri ti baatu babatala. Bo bakweyirika bisweekulu bya maampu byabinene bi bakwelwaata, na bakwenonono maheengu ma binkuta.

⁶ Bo batiiri bibeendu bya lukiinsu mu minkeembu mya ndiilu na byatete mu manzo ma nkutukunu,

⁷ bo batiiri bebaha mamboto mu bibeendu bya bobanso, na baatu be bateele ti "Muyikisi".

⁸ Ngo kasi, beenu yaa baluteele ko ti "Muyikisi"; bukuri beenu Muyikisi mosi luri na nde; beenu bobanso luri bampaangi.

⁹ Yaa luteele muutu ti mosi ko ha butoto ti "Taata" dya beenu, bukuri dimosi luri na dyo, ngo taayi dya ku yulu.

¹⁰ Yaa baluteele se ko ti "mutwaalisi", bukuri mutwaalisi beenu mosi wuri, ngo Kiristo.

¹¹ Wubvuriri bukuutu mu beenu, yelemini kuba kisari kya beenu.

¹² Mpisi wunde wudzaangama mu nde-meene, sa bamukulula; na mpisi wukuluka nde-meene sa bamudzaangisa.»

Bumpitu-bumpyoongo bwa batini ba mangisi na Bafarisi

¹³ «Kyaari kuri beenu, batini na Bafarisi bangaa-bumpitu-bumpyoongo, bukuri beenu luri mu kukaanga mweelu Kimfumu kya mayulu kuri baatu; kuri beenu-meene lwahele kukoto, na lwahele kukotoso se batiiri kukoto.» [

¹⁴ ]

¹⁵ «Kyaari kuri beenu, batini na Bafarisi, bangaa-bumpitu-bumpyoongo, bukuri lukwesa budyeengi mu mubu na ha butoto mu kubaka muutu mosi wuyiinga dyeele; ngo bu lumubakiri lumukituri mwaana munyeenge mbaawu, walutila beenu mu biteesu byoolo.»

¹⁶ «Kyaari kuri beenu, binatisi byafwa miisu, lukweleele ti: "Wunde wulaba maalu mu nzo yangisi, lo wahele mu dyaambu; ngo kasi, wunde wulaba maalu mu woolo dya mu nzo yangisi, lo wuri kunsa dyaambu."

¹⁷ Beenu biwulu na lwafwa miisu, nki bibvuriri mufunu, woolo hoti nzo yangisi, yihaanaa woolo bungisi?

¹⁸ Na lubweese kuleele ti: "Wunde wulaba maalu mu dziku, wahele na dyaambu; ngo kasi wunde wulaba maalu mu kikabu kiri ha yulu dziku, lo wuri mu dyaambu."

¹⁹ Beenu baatu bafwa miisu, nki bibvuriri mufunu, kikabu hoti dziku dikoohaa kikabu bungisi?

²⁰ Ngo wunde wulaba maalu mu dziku, lo wulaba mu dyo, na mu bitotolo byobinso biri ha yulu dyo.

²¹ Na wunde wulaba maalu mu nzo ya ngisi, lo wulaba maalu mu yo, na mu wunde wudzakala mu yo.

²² Na wulaba maalu mu yulu, lo wulaba maalu mu mboloko Nzaambi, na wunde wadzakala ha yulu yo.»

²³ «Kyaari kuri beenu batini ba mangisi na Bafarisi bangaa-bumpitu-bumpyoongo, beenu luhanaa kikuuku kyakuumi kya binkoolo biri nkuumbu hedwosemo, aneto, na kumino, na lubwoongolaa bibvuriri mufuna mu mangisi: nsungumunu, mutima wangebe na kanyi. Mimyo beenu lukeetyee kusalila, kwahele kubwoongolo se myakaka mimyo.

²⁴ Beenu batwaalisi bafwa miisu, beenu lukele kimbu; ngo kasi lumina kamelo.»

²⁵ «Kyaari kuri beenu, batini na Bafarisi bangaa-bumpitu-bumpyoongo, bukiri beenu lukwetsyeemese mbasi ya mbasa na lukoombo, kunsa-kati kwaluula mu nyiimunu na kuhele kwa nkebulu nyutu.

²⁶ Ye Mufarisi wafwa miisu, tekeseleeti kutsyeemisaa kunsa-kati dya mbasa, mpisi heki ku mbasi, mbasa yiba se yatsyeemese.»

²⁷ «Kyaari kuri beenu, batini na Bafarisi, bangaa-bumpitu-bumpyoongo, bukuri beenu lwafwanikina na mampeembe makila mpeembe, mari ku mbasi mamonoko luwu, ngo kasi kukati kwaluula mu miyisi mya bafwa, na nsumukunu ya bitsuumbu-bitsuumbu.

²⁸ Bwobumosi beenu-seene, ku mbasi beenu lumonoko bangaa-kusuunguma, ngo ku kati lwaluula mu bumpitu-bumpyoongo na mu bubayi.»

²⁹ «Kyaari kuri beenu, batini na Bafarisi, bangaa-bumpitu-bumpyoongo, bukuri beenu lukwetuunga mampeembe ma babikiri na lukwebweeyese mampeembe ma basuunguma.

³⁰ Na luleele ti: "Mbuti beetu twaba mu biluumbu bya bataayi beetu, beetu twaketi kusa kintwaari na bo ko, mu kutsaamuna makila ma babikiri."

³¹ Mu didyo beenu luta kimbaangi mu beenu-meene ti, beenu luri baala ba badzusi ba babikiri.

³² Hango, luuluseenu kiteesu kya bataayi beenu!

³³ Beenu banyoko, kitsuumbu kya bampiri, buri beenu lusiila mu kuyitika la na mutsuundu wa lubila?

³⁴ Mu didyo, mono, me nyiheeke babikiri, bangaa-madyeele, batini ba mangisi kuri beenu. Beenu sa lwadzusa babamosi mu bo, na sa lwabakomono, bakaka sa lwabalata nkwaasulu mu manzo ma nkutukunu, na kubakwaamisa mu bvula-bvula,

³⁵ mpisi heki makila momanso ma basuunguma, matsaamukini ha butoto, kuholosono mu Abele ngaa-kusuunguma, natee mu Dzakariya, mwaana Barakya, wulwadzusiri ha kakati dya kihekiri kyangisi na dziku, mabwa ha yulu beenu.

³⁶ Mu ngwanwa, me nyiluleele ti: momanso mamo sa mayirima mu kiseendu kimaki.»

Yesu na Yerusalemi

³⁷ «Yerusalemi, Yerusalemi, ye wudzusaa babikiri, wudzusaa mu matari bantumu baba bakuheekele, mantaangu makwe me nyatiiri kukutikisa baala baaku, bunu bu kutikisaa nguri nsusu baala baandi kunsa mapaapu maandi, ngo beenu lusii tya ko.

³⁸ Mono, nzo yeenu yeki yalubwongokolo yamukangala.

³⁹ Bukiri me nyileele kuri beenu ti, mu lumalu beenu lubweese kumono me ko, natee ha luleele beenu ti: "Kaba wasakumunu wunde wukwiisa mu nkuumbu ya Mfumu!"»