Musamu wamubwete watina Matayi 21 - Musamu Wamubwete 2013

Nkotulu Yesu ku Yerusalemi

¹ Bu bari mu kwekokosolo na Yerusalemi, batubuka ku bula bwa Betefange, ku mulaandu wa Mi-olive, haho, Yesu waheeke bayiki boolo.

² Nde waleele kuri bo ti: «Yendee ku bula buri ha mankula ma beenu, na hanaho, beenu sa lwamono mukasi mpuunda wakaangu na mwaana. Nyangunee na twalee kuri me.

³ Na mbuti muutu wululeeriri ntoono, mubvutukileenu ti: "Mfumu wuri na nzala byo." Hanaho, nde sa kaheeke byo.»

⁴ Mamama masalama mpisi heki ma leele mubikiri meende mu mana:

⁵ «Leeleenu kuri mwaana mukyeetu wa ku Syoni ti: Mono mbyaasi yaaku yiri mu kwiisa kuri ye, wadzuuna, wanwaata ha yulu mpuunda ya mukasi, na ha yulu mwaana mpuunda, kibulu kiri na kifiki.»

⁶ Bayiki ba Yesu bayende na bakukisa ma baleeriri Yesu.

⁷ Bo batwaala mpuunda na mwaana waandi, bateeteke mansaanda na binkuta ha yulu byo na Yesu wadzakala ha yulu.

⁸ Mpuumbu yayinene yayala binkuta bya bo mu nzila, baatu bakaka batabula bimpaala bya miti, bi bayala mu nzila.

⁹ Mampuumbu maba ku matu na ku mambisa ma Yesu maba kwebikisa, maleele ti: «Hosana kuri Mwaana Davidi; wasakumunu wunde wukwiisa mu nkuumbu ya Mfumu; hosana mu bibeendu bibvuriri kudzaangama.»

¹⁰ Yesu bu kakoto ku Yerusalemi, bvula dyodinso dyatekete dyaleele ti: «Wu ngo na?»

¹¹ Mampuumbu makweleele ti: «Wu ngo Yesu, mubikiri wa ku Nadzareti, dya Ngalili.»

Yesu mu Nzo-nzaambi

¹² Bu kakoto mu Nzo-Nzaambi, nde wabinga bobanso baba yarikaana na baba suumbaana munsa Nzo-nzaambi, wabwiisa mataabala ma baba yiingaana mboongo, na bidzakukulu bya baba yarikikaana mabeembe.

¹³ Yesu waleele kuri bo ti: «Diri dyatinu: "Nzo yaami sa bateele, yo nzo lusaambulu." Ngo kasi beenu lumwaasa yo, ntari bangaa-bumfuna.»

¹⁴ Bafwa miisu na babeele miilu, bakokosolo kuri nde mu Nzo-Nzaambi, na nde wabatsinikisa.

¹⁵ Bakuutu ba bangaanga-Nzaambi na batini ba mangisi, babaka nkesi, bu bamwiini misamu myansisi mi kayirikiri, na mwaa-baala baba bikisaa mu Nzo-nzaambi ti: «Hosana mwaana Davidi!»

¹⁶ Bo baleele kuri nde ti: «Buri ye wuri mu kuyuka mari mu kuleele bamaba?» Yesu wabvutula kuri bo ti: «Heehe! Buri beenu lwasii taanga ko ti: "Mu minwa mya mwaa-baala bantele na bansoombo, ye wayirika ndumusu yaaku"?»

¹⁷ Bu kabasisa, nde wapala mu bvula na wayende ku Betanya ku kalutisa butsuku.

Yesu wabulila mungenge mpopi

¹⁸ Mu kipari, habaanaa weki bvutuka ku mabvula, nde wabaka nzala.

¹⁹ Nde watalila mungenge mu nzila na wakokosolo kuri nde, ngo kasii mono kitotolo ko, ha yulu mani makaya kitsu. Na wamuleele ti: «Fuu kya bufulukutuu, ye wuri mbakila bimbutu ko!» Na ha nsi na nsi mungenge wakana.

²⁰ Bayiki baandi bu bamono bakimuka na baleele: «Dyaburi mungenge kakanini ha nsi na nsi?»

²¹ Yesu kabvutula kuri bo, waleele ti: «Mu ngwanwa me nyiluleeriri, mbuti beenu lubeeri na kanyi, na lwahele kusa mpaka, kari mana ma lumwiini mu mungenge, luketi kuyirika kitsu ko, ngo na kuri mulaandu wu se, ha beeri lo luleeriri ti: "Yisika na yende bwa mu mubu", lo bubwo buyirimini.

²² Momanso ma luloombo beenu mu lusaambulu, bu lusiiri kanyi sa lumataambula.»

Kuri kwafumuna lutuma lwa Yesu?

²³ Yesu wayende ku Nzo-Nzaambi. Bu kaba mu kuyikisa bakuutu ba bangaanga-nzaambi na bakulu ba bakala ba kaanda bakokosolo kuri nde, baleele ti: «Mu nki lutumu ye wuri mu kweyirikila mamo? Na wakuha lutumu lumalu?»

²⁴ Yesu wabvutula, waleele kuri bo ti: «Me se kifuuri kimosi me nyiluha, kiri mbuti beenu lumpeeri mvutu, tumi me se nyiluleeriri mu nkya lutumu me nyiri mu kweyirika mamo:

²⁵ Mbotokulu ya Yowane, yaba ya kuri? Ya ku yulu hoti ya baatu?» Bo balelesene bo na bo ti: «Mbuti tuleeriri ti: "ya ku yulu", lo nde bee leeriri ti: "Hango buri lwaheriri kusiila kanyi mu nde?"

²⁶ Na mbuti tuleeriri ti: "Ya baatu", tubata mpuumbu. Bukuri bobanso bahololo Yowane bunu mubikiri.

²⁷ Bo babvutula kuri Yesu, baleele ti: "Beetu tuyaari ko.» Yesu wababvutula ti: «Me se nyiluleele ko, mu nkya lutumu me nyiri mu kweyirika mamo.»

Nkuma ya baala boolo

²⁸ «Beenu nki lutsimini? Muutu mosi waba na baala boolo. Bu kakokosolo kuri watete, wuleele ti: "Mwaana me, yende sala bwalolo ku nseke bviinya."

²⁹ Nde wabvutula, waleele ti: "Me nyahele kutya." Mwaa-mantaangu bu maluta, nde wayiinga kitsimi na wayende.

³⁰ Bu kakokosolo kuri wakaka, waleele bwobumosi. Ngo nde wabvutula waleele ti: "Mfumu, me nyikweende", Ngo kasi wahele kweende.

³¹ Na mu bo boolo wayirika kutya kwa taayi?» Bo baleele «watete». Yesu waleele kuri bo ti: «Mu ngwanwa me nyileele kuri beenu ti: Batori ba mpaku na bakyeetu ba biyala sa balutekisile mu Kimfumu kya Nzaambi.

³² Bukuri Yowane wayisa kuri beenu mu nzila ya nsungumunu, beenu lwasii siila kanyi mu nde; kasi batori ba mpaku na bakyeetu ba biyala basiila kanyi mu nde. Ngo beenu lwamono, kasi ha mambisa haho lwahele kuyiinga dyeele, mu kusiila kanyi mu nde.»

Nkuma ya bakamuni ba bviinya bababi

³³ «Yukeenu nkuma yikimi: Muutu mosi waba ngaa-nzo, wakuna nseke bviinya, wadyengesile yo mu lupaangu, wahaka bulu dya kukamukina malu, watuunga nzo yadzaangama, wayukusina na bakamuni ba bviinya na wayende ku budyeengi.

³⁴ Ntaangu ya kutolo bimbutu bu yatubuka, nde waheeke bisari byaandi kuri bakamuni ba bviinya, bee baholo kikuuku kya nde.

³⁵ Bakamuni ba bviinya, bakwaata bisari bya nde, balata wamosi, badzusa wakaka, na wa batatu bamudzusa mu matari.

³⁶ Nde wabweese kuheeke bisari bikimi bibvuriri mu lutaangu ti na byatete; na bo bayirika bwobumosi kuri bo.

³⁷ Mwaa-mantaangu bu maluta, nde waheeke mwaana waandi kuri bo, waleele ti: "Bo sa babvumina mwaana me."

³⁸ Bakamuni ba bviinya bamono mwaana, balelesene bo na bo ti: "Wumawu ngo mukondiri-saala. Waseenu, tumudzuseenu, mpisi tumuholee na saala."

³⁹ Bamukwaata, bamutuba ku mbisa nseke, na bamudzusa.»

⁴⁰ «Hango, ntaangu yikwiisa ngaa-nseke, nki kasa kuri bakamuni ba bviinya?»

⁴¹ Bo babvutula kuri nde ti: «Nde sa kadzusa bababi babo mu kibakala, na sa kaha nseke kuri bakamuni bakimi, bamuha bimbutu, mu ntaangu ya bo.»

⁴² Yesu waleele kuri bo ti: «Buri beenu lwasii taanga mu Matinu ko? "Tari dyaloosiri batuungi, didyo ngo dyeki dyanguri ha kuumbu; mimyo kuri Mfumu miri myafumuna, na mya nkimukunu ha miisu mya beetu."»

⁴³ «Hango-nkuumbu, me nyileele kuri beenu ti, Kimfumu kya Nzaambi, sa baluyusula na kyo, na sa baha kyo kuri kaanda dibuta bimbutu. [

⁴⁴ Mpisi wubwa ha yulu tari di sa kakosoko; na mpisi wuri dimubwirikiri, sa dyamunyifuna.]»

⁴⁵ Bakuutu ba bangaanga na Bafarisi bayuka mankuma ma Yesu, babakila ti Yesu mu bo kadzoonsolo.

⁴⁶ Basaka bwa kumukwaatila ngo babata mampuumbu, bukuri baba hololo Yesu bunu mubikiri.