Musamu wamubwete watina Matayi 20 - Musamu Wamubwete 2013

Nkuma ya bangaamba ba bviinya

¹ «Mukwongo Kimfumu kya mayulu kyafwanikina na muutu wuri ngaa-nzo. Bu kapariri mu kipari, horiri bangaamba mu kwesala ku nseke yaandi ya bviinya.

² Bu bayukisina na bangaamba mu kubafuta kidenali kimosi mu kiluumbu, nde wabasindika ku nseke yaandi ya bviinya.

³ Bu kupala mu kilookolo kya matatu, nde wamono baatu bakimi badzakala ha kibeendu kya bobanso ngo bahele na kisalu.

⁴ Nde waleele kuri bo ti: "Beenu se yende ku nseke bviinya, tumi me nyiluha byayelemene."

⁵ Bo bayende. [Ngo] bu kabweese kupala, kampe mu kilookolo kyamasaamunu na kyawa, wasa bwobumosi.

⁶ Bu kapala kampe mu kilookolo kyakuumi na kimosi, wamono bakimi bateleme, wabafuula ti: "Buri luri lwateleme hamaha, bwiisi bwabutsiina, kwahele kusala?"

⁷ Bo baleele kuri nde ti: "Bukuri kwahele muutu wutuhoriryee mu kisalu." Nde waleele kuri bo ti: "Beenu se yendeenu ku nseke bviinya."

⁸ Nsinsika yatubuka, ngaa-nseke bviinya waleele kuri mukebi lubaku lwaandi ti: "Teele bangaamba na wubaha mufutu waaku; kubandikila mu bampotulu natee mu batete."

⁹ Bangaamba ba kilookolo kya kuumi na kimosi bayisa na bataambula muutu-muutu kidenali kimosi.

¹⁰ Ba kilookolo kyatete bayisa, batsima ti bee bataamburi bibvuriri; ngo kasi, bo se bataambula muutu-muutu kidenali kimosi.

¹¹ Bu bari mu kwetaambula mufutu, bari mu kwemunguta mu ntoono ngaa-nzo.

¹² Baleele ti: "Ba kilookolo kyampotulu bamaba, kilookolo kimosi basiiryee, ngo ye kubaha kiteesu kimosi na beetu, tunaangunyee kilemu kya bwiisi na mwiini!"

¹³ Ngaa-nzo wabvutula kuri mosi mu bo, waleele ti: "Nduku yaami, me nyahele na bubayi ku wuri ye; buri kari mu kidenali kimosi ye yukisinyee na me ko?

¹⁴ Holo kyaaku na yende. Me ntiiri kuha kuri wumawu kidenali kimosi, bunu buri kuri ye se.

¹⁵ [Buri] me nyahele na miswa mu kuyirika ma ntiiri mu bitotolo byaami, hoti ye wuri na miisu mbengele, bukuri me ngaa-mutima-bubwete?"

¹⁶ Mu bubwo, bampotulu sa baba batete, na batete sa baba bampotulu.»

Yesu wuyaabisa lufwa na mfulukulu yaandi

¹⁷ Bu kaba mu kutoomboko ku Yerusalemi, Yesu waholo [bayiki] bo kuumi na boolo bo bakaka, na mu nzila nde waleele kuri bo ti:

¹⁸ «Mono! Turi mu kutoomboko ku Yerusalemi na Mwaana muutu sa kaba wayekulu kuri bakuutu ba bangaanga-nzaambi na kuri batini ba mangisi. Bo sa bamukesele mukanu wa lufwa,

¹⁹ na sa bamuyekele mu myooko mya bangooyi mu kumusaana, kumulata nkwaasulu, kumukomono ha yulu kuruwa, na kiluumbu kyabitatu sa kaba wafulukusu.»

Ndoombolo nguri Yakobo bo na Yowane

²⁰ Hanaho, nguri baala ba Dzebedayi wakokosolo kuri nde, kintwaari na baala baandi, wamutsukumina mu kuloombo kitotolo kimosi kuri nde.

²¹ Yesu waleele kuri nde ti: «Nki ye tiiri?» Nde wabvutula kuri Yesu ti: «Ha miswa mpisi heki, baala ba me bo boolo ba, mbasi-tsuku baba badzakala, mosi ha lubakala lwa ye, mosi ha lumosi lwa ye, mu Kimfumu kyaaku.»

²² Yesu wabvutula, waleele ti: «Beenu lwahele kuyaaba ma luri mu kuloombo. Buri beenu lo lubangusini kunwa mbasa yiyo, yi nyelemini kunwa me?» Babo babvutula: «Beetu lo tubangisini.»

²³ Yesu wabaleele ti: «Mbasa me, beenu ngo luri sa lwanwa; ngo mu matariri kudzakala ha lubakala na ha lumosi lwa me, kari me nyiha miswa [mimyo] ko, ngo bibeendu bibyo bya babo, bari Taayi dya me wabayirikila byo.»

²⁴ Bayiki kuumi bakaka bu bayuka bubwo, babakila bampaangi bo boolo babo nkesi.

²⁵ Yesu wabateele na wabaleele ti: «Yabee ti bamfumu ba mansi bakoosalila bumfumu ha mansi mamo, na bakuutu bakoosalila lutumu ha yulu mo.

²⁶ Kari bubwo buyelemini kuba ha kakati dya beenu ko; ngo wunde wutiiri kuba mukuutu mu beenu, lo yelemini kuba kisari kya beenu.

²⁷ Na wutiiri kuba watete mu beenu, lo sa kaba nkutu beenu.

²⁸ Bwobumosi mu Mwaana muutu wahele kwiisa mu kuri ti bamusalila, ngo mu kusalila na kuha kidziingu kyaandi, bunu kikori mu balaka.»

Yesu watsinikisa bafwa miisu boolo

²⁹ Bu baba mu kupala mu Yeriko, mpuumbu yayinene yamunama.

³⁰ Na mono, baatu boolo bafwa miisu badzakala ha teke nzila, bu bayuka ti Yesu wuri mu kuluta, bo bafula misaakulu, baleele ti: «[Mfumu], mwaana Davidi, siila beetu ngebe!»

³¹ Mpuumbu yabaŋaŋana mpisi bawura. Ngo bafwa miisu bahamisa kufula misaakulu, baleele ti: «Mfumu, mwaana Davidi, siila beetu ngebe!»

³² Yesu bu kateleme, wabateele mbila, wabafuula, waleele ti: «Nki lutiiri me nyiluyirikila?»

³³ Bo babvutula kuri nde ti: «Mfumu, hemese miisu mya beetu midzibuma.»

³⁴ Yesu wamono ngebe, wabelemene miisu mya bo, na hanaho, bamono na banama Yesu.