Musamu wamubwete watina Matayi 18 - Musamu Wamubwete 2013

Na bvuriri bukuutu mu Kimfumu kya mayulu?

¹ Mu kilookolo kikyo, bayiki ba Yesu bakokosolo, baleele ti: «Na, bvuriri bukuutu mu Kimfumu kya mayulu?»

² Bu kateele mwaa-mwaana, wamusuusa ha kakati dya bo,

³ na waleele ti: «Mu ngwanwa me nyiluleeriri, mbuti beenu luyiingiri ko, na lukitukiri bunu mwaa-baala bantele ko, lo beenu lukoto mu Kimfumu kya mayulu ko.

⁴ Hango, mpisi wunde wukuluka nde-meene bunu mwaa-mwaana wu, lo wunde ngo wubvuriri bukuutu mu Kimfumu kya mayulu.

⁵ Na wunde wutaambula ti mosi mu mwaa-baala bari bunu wu, mu nkuumbu yaami, lo me kataamburi.»

Kusa madyeele

⁶ «Ngo kasi, mpisi wunde wubwiisa mu masumu, mosi mu bilesi bimabi bisa kanyi mu me, lo buri bwabubwete mu nde, ti bamukaanga nguku-tari mu nkiingu yaandi, na kaba wadyaamusu ku kakati dya mubu.

⁷ Kyaari kuri baatu ba nsi yi mu dyaambu dya mbumukunu makya; mukwongo, mbumukunu makya yiyelemini kuba, ngo kyaari kuri muutu wunde wuba nzila ya mbumukunu makya!

⁸ Mbuti kooko kwa ye, bunu pe kuulu kwa ye ku kubwiisa mu masumu, lo tabala kwo na looso kwo kwa la na ye; buri bwabubwete mu ye mu kukoto mu bumwooyo na kooko kumosi, bunu pe na kuulu kumosi, ti na kuba na myooko myo myoolo, bunu pe, miilu myo myoolo, na kuba watubu ku mbaawu yahele manunu.

⁹ Na mbuti diisu dyaaku dikubwiisa mu masumu, lo hokolo dyo, na looso dyo kwa la na ye; buri bwabubwete mu ye, mu kuba na diisu dimosi, mu kukoto mu bumwooyo, ti na kuba na miisu myo myoolo, na kuba watubu ku munyeenge mbaawu.»

Kimeeme kyadziimbila

¹⁰ «Talee kweenu ka lukwiisa kunyaafuna ti mosi mu mwaa bilesi bimabi; bukuri me nyiluleele ti, bambasi ba bo mu mayulu bakyeesaa kidziri kya Taayi dyaami, diri mu mayulu.» [

¹¹ ]

¹² «Nki beenu luri mu kutsima? Mbuti muutu wuri na nkama bimeeme, ngo kimosi mu byo kidziimbiri, buri lo wahele kusiisa makuumi wa na wa mu mankoto ma milaandu, na kweende ku kusaka kyadziimbila?

¹³ Na mbuti dzuukiri kyo, mu ngwanwa me nyiluleeriri ti, nde sa kabvula kumono kiminu mu kyo, ti na mu makuumi wa na wa biri byahele kudziimbila.

¹⁴ Bunubwo se buri kutya kwa Taayi dyeenu diri mu mayulu kuri ko ti mosi mu bilesi bimabi, kidziimbila.»

Mbuti mbaasi wabwa mu masumu

¹⁵ «Mbuti mbaasi yaaku, wukuyirikiri mamabi [kuri ye] yende, lo museembe ha beenu boolo. Mbuti nde wukuywiiriri, lo ye bangusini mpaangi yaaku.

¹⁶ Ngo mbuti wahele kukuywiila, lo holo mosi bunu pe boolo baba kintwaari na ye, mpisi heki mu mandoongi ma bambaangi boolo bunu pe batatu, luyelekese myominso.

¹⁷ Mbuti bisiri mu kubaywiila, lo leele dyo kuri dibuundu. Na mbuti bisiri se kuywiila dibuundu, lo hemese kuba kuri ye bunu munzeense, bunu pe mutori-mpaku.»

¹⁸ «Mu ngwanwa me nyiluleeriri ti: mpisi ma lukaanga beenu ha butoto, sa maba makaangu mu mayulu. Na mpisi ma lunyanguna beenu ha butoto sa maba manyanguna mu mayulu.»

¹⁹ «[Mu ngwanwa] me nyibweese kululeele ti, mbuti baatu boolo mu beenu bayukusini ha butoto, mu musamu ngo musamu, lo mamo ma baloombo, Taayi dya me diri ku mayulu sa kabayirikila mo.

²⁰ Bukuri haho ha kutukini boolo bunu pe batatu, mu nkuumbu yaami, lo me nyiri ha kakati dya bo.»

Nkuma ya kisari kyahele na mpemisi mu bambaasi

²¹ Hango, Petelo bu kakokosolo kuri Yesu, wamuleele ti: «Mfumu, mbala kwe me nyelemini kuhemesene mpaangi yaami, mbuti wanyirikila mamabi? Buri natee mbala nsaamu?»

²² Yesu wabvutula kuri nde ti: «Me nyahele kukuleele ti natee mbala nsaamu, ngo natee minsaamu ku minsaamu.

²³ Hango-nkuumbu, Kimfumu kya mayulu kyafwanikina na muutu mosi wa mbyaasi waba tiiri ti bisari byaandi bitambikisa bi bari na byo.

²⁴ Mu kubaandika kutambikisa, bamutwalikila wunde waba na kibiimbu kuri nde kya fuunda dya bitalanta.

²⁵ Bu kaba wahele kubangisina kufuta kibiimbu, mfumu waha lutumu bayarika na nde-meene, na mukasi na baala, na byobinso bi kari na byo, mpisi bafuta kibiimbu.

²⁶ Ngo kisari wabwa ha nsi, watsukuma ha busu bwa nde, waleele ti: "Ba na nkindusulu-mutima mu me, na me sa nyakufuta byobinso."

²⁷ Mfumu wamumwiinina ngebe, wamupatula na wamuhemesene kibiimbu.

²⁸ Kisari kikyo bu kapala, wabwaana mosi mu bambaasi baandi ba kisalu, waba wamusoombo nkama bidenali. Bu kamukwaata, wamupina ha ndinga na waleele ti: "Futa kibiimbu kya me ki wuri na kyo."

²⁹ Ngo mbaasi kisari wabwa ha nsi, wamuyingukila na waleele: "Ba na nkindusulu-mutima mu me, na me sa nyakufuta."

³⁰ Ngo mbaasi waba wahele kutya. Kasi nde kamuholaana, wumutubiri mu boroko, natee ku kafutiri kibiimbu.

³¹ Bambaasi bisari, bu bamwiini mamo mayirimini, banyoongo kwalaka, na bayende kweebaangula kuri mfumu bo, myominso myayirimini.

³² Hango mfumu yaandi kamuteelaana, wumuleeriri ti: "Ye kisari kyakibi wuri, kibiimbu kyokinso kikyo, me nyikuhemisinyeenu, bukuri ye nyingukiryee.

³³ Buri bubee bwahele kuyelemene, ti ye se, siilila mbaasi yaaku ya kisalu ngebe, bunu bu nyikusiirirye me se ngebe?"

³⁴ Mfumu yaandi wabaka nkesi na wamuyekele mu myooko mya bangaa-nkuba natee, kukafuta kibiimbu kyokinso.»

³⁵ Bunubwo se: «Taayi dyaami dya mu mayulu kasa, mbuti heki muutu-muutu mu beenu wahele kwehemesene mbaasi yaandi mu mutima ndemunso.»