Musamu wamubwete watina Matayi 17 - Musamu Wamubwete 2013

Yesu wakituka

¹ Biluumbu bisaamunu bu byaluta, Yesu waholo Petelo, Yakobo na Yowane, mpaangi yaandi, na watoomboko na bo, ku yulu mulaandu wadzaangama, kwa bo bakaka.

² Nde wakituka ha busu bwa bo. Kidziri kyaandi kyaseme bunu ntaangu, binkuta byaandi byakituka bu pee bunu buungi.

³ Na mono, Moose na Eliya bamonokono, bari mu kudzoonso na Yesu.

⁴ Petelo wabaangula mbeembu na waleele kuri Yesu ti: «Mfumu, buri bwabubwete kuri beetuneenu mu kuba hamaha. Mbuti ye tiiri, lo me ntuungiri misaampu mitatu hamaha: mosi wa ye, mosi wa Moose, na mosi wa Eliya.»

⁵ Bu kaba wakiri mu kudzoonso, mono tuti dya buungi dyabafuka mu mposi yaandi, na mono, mbeembu mosi yayukukuna mu tuti, yaleele ti: «Wumawu ngo mwaana waami wa mutima, mu nde me nyimonaa kiminu, muywiileenu!»

⁶ Bayiki ba Yesu, bu bayuka mbeembu yiyo, bayilimisa mabusu maaku ha nsi, na bamono boomo bwalaka.

⁷ Yesu wakokosolo, bu kababelemene waleele ti: «Telemeenu, yaa luba na boomo ko.»

⁸ Bu basiimbila mabusu ma bo, basii mono muutu ko, ha yulu wunu Yesu kitsu.

⁹ Bu baba mu kwekulumuka mulaandu, Yesu wabadika, wabaleele ti: «Yaa luleele kuri muutu ti mosi ko, mamo lumwiini, natee Mwaana muutu fulukiri mu bafwa.»

¹⁰ Bayiki baandi bamufuula ti: «Bukuri nki, batini ba mangisi bakooleele ti Eliya wakiri tekesele na kwiisa?»

¹¹ Yesu wabvutula kuri bo waleele ti: «Bunubwo, Eliya wukwiisa, mu kubvutula bunkete mu byobinso.

¹² Ngo kasi kuri beenu me nyileele ti, Eliya wayeki wayisa. Baatu basii muyaabula ko, ngo kasi bamuyirikila momanso ma batiiri. Bunubwo se, Mwaana muutu sa kubama kuri bo.»

¹³ Hanaho, bayiki baandi babakula ti Yesu waba badzoonsolo mu ntoono ya Yowane Mubotiki.

Yesu watsinikisa mwaana waba na mpeeve yayibi

¹⁴ Bu batubaka hari mpuumbu, muutu mosi wayisa kuri Yesu watsukuma ha busu bwa nde,

¹⁵ waleele ti: «Mfumu, bakila mwaana me wa mubakala ngebe, bukuri wuri na kimbikila-ngoondo na wuri mu mpasi. Mukwongo, mantaangu malaka nde kakoobwaanaa ku mbaawu na mu maampa.

¹⁶ Me nyimusoongiryee kuri bayiki ba ye, ngo basii bangusina kumutsinikisa ko.»

¹⁷ Yesu wabvutula, waleele ti: «Ha! Kiseendu kyahele na kanyi, na kyawumuka. Natee mantaangu makwe me nyiba na beenu? Natee mantaangu makwe me nyikuunda beenu? Muntwalikilee hamaha!»

¹⁸ Yesu waŋaŋana mpeeve yayibi, yo yapala mu mwaana, na mu kilookolo kinikyo, mwaana watsiinika.

¹⁹ Hanaho, bayiki bu bakokosolo kuri Yesu, bamuleele ha nde-kaka ti: «Mu nki ntoono, beetu tukooninyee kubinga mpeeve yiyo?»

²⁰ Nde wabvutula kuri bo ti: «Mu ntoono kanyi dyeenu dyantele. Bukuri, mu ngwanwa me nyiluleeriri ti: mbuti lubeeri luri na kanyi diri bunu lusaangi lwa muti wuri nkuumbu sinapi, ha beeri nkani lo luleeriri mulaandu wu: "Yisika, yende kunii", lo nde weensi; kuri kitotolo ti kimosi ki lukoono beenu ko.» [

²¹ ]

Yesu wabweese kuyaabisa lufwa na mfulukulu yaandi

²² Bu baba bakutukina ku Ngalili, Yesu waleele kuri bo ti: «Mwaana muutu bee beeri wayekele mu myooko mya baatu,

²³ bo sa bamudzusa, na mu kiluumbu kyabitatu sa kaba wafuluka.» Bo banyoongo kwalaka.

Kufuta mpaku ya Nzo-nzaambi

²⁴ Bu batubuka ku Kafarnawumi, batori ba mpaku ya Nzo-nzaambi bayisa na bafuula kuri Petelo ti: «Buri muyikisi beenu koofutaa mpaku ya Nzo-nzaambi?»

²⁵ Nde wabvutula ti: «Bunubwo.» Petelo bu kabvutuka ku nzo, Yesu watekesele kudzoonso kuri nde, waleele ti: «Simoni, nki ye wuri mu kutsima? Bambyaasi ba nsi, kuri ba nani bakooloombaa mikesu na mpaku? Kuri baala ba bo-meene, hoti kuri baatu bakimi?»

²⁶ Petelo wabvutula: «Kuri baatu bakimi», Yesu waleele ti: «Mu didyo, baala bari na bunsaalisi.

²⁷ Ngo mu kuhele kubabumisa baatu makya, yende tuba lobo mu mubu. Holo nsu yatete yitoomboko, dzibula munwa waandi, sa mono mboongo. Holo dzo, na yende baha, mu ntoono ye na me.»