Musamu wamubwete watina Matayi 14 - Musamu Wamubwete 2013

Lufwa lwa Yowane Mubotiki

¹ Mu ntaangu yiyo, Erode mutumi nkoonsi, wayuka mvuumfu Yesu,

² na waleele kuri bisari byaandi ti: «Wunde Yowane Mubotiki wafulukiri mu bafwa, mu didyo, nde kari mu kweyirika bimaangu.»

³ Mukwongo, Erode kakaangaana Yowane, wumutubiri mu boroko, mu ntoono Erodyade, mukasi Filipo mpaangi yaandi.

⁴ Bukuri Yowane waba muleelaa ti: «Ye wahele na miswa mu kuholo mukyeetu wunde!»

⁵ Erode waba na nzala kumudzusa ngo waba bataana mpuumbu baatu, bukuri bo baba monaana ti nde mubikiri.

⁶ Munkeembu wa kiluumbu kya mbutukulu Erode bu katubuka, mwaana Erodyade wa mukyeetu wakina ha kakati dya baatu, na Erode wamono kiminu mu nde.

⁷ Mu didyo, Erode walaba maalu kuri mwaana, mu kumuha kyoso kitotolo ki kamuloombo.

⁸ Nguri bu kamusinda, mwaana waleele ti: «Twalikila me hamaha, mutu Yowane Mubotiki munsa lukoombo!»

⁹ Mbyaasi wanyoongo mu mutima, ngo mu ntoono maalu ma kalabiri na mu ntoono baatu ba katumisini, nde waha miswa ti bamutwaalikila nde.

¹⁰ Erode waheeke baatu, mu kweetabula Yowane mutu, mu boroko.

¹¹ Batwaala mutu Yowane, munsa lukoombo, baha nde kuri mwaana mukyeetu, na nde wamunata kuri nguri yaandi.

¹² Bayiki ba Yowane bayisa, banaanguna nyutu, na bayende kweeyidziika; tumi bayende kweeyaabisa kuri Yesu.

Yesu wadiisila mafuunda mataanu ma babakala

¹³ Yesu kayuka bubwo, wayisika haho, na wayende mu bwaatu ku nsi yankatu, ku kibeendu kya nde-kaka. Mampuumbu ma baatu bu mayuka, mayisika mu mabvula na mamunama mu miilu.

¹⁴ Bu kasunduka mu bwaatu, nde wamono mpuumbu baatu yayinene; nde wabamwiina ngebe mu mutima, na wabeke mu kutsinikisa babeeru ba bo.

¹⁵ Nsinsika bu yatubuka, bayiki baandi bakokosolo kuri nde na bamuleele ti: «Kibeendu kyankatu, na ntaangu yimwaaluta; sindika mampuumbu mpisi meende mu mabula, be basuumba byandya bya bo-meene.»

¹⁶ [Yesu] wabvutula kuri bo ti: «Bo bahele na nzala kubvutuka, baheene bi badya beenu-meene.»

¹⁷ Bo babaleele kuri nde ti: «Turi na kitotolo ha ko, ha yulu mana mampa mataanu na bansu boolo.»

¹⁸ Nde wabaleele ti: «Ntwalikilee byo ha.»

¹⁹ Nde waleele kuri mampuumbu ti madzakala ha yulu bitiiti. Bu kaholo mampa mataanu na bansu boolo, watala ku yulu, wabisakumuna, wabukuna, na waha mampa kuri bayiki baandi, na bo baha mo kuri mampuumbu.

²⁰ Bobanso badya na bayukuta. Batolo bitsuri byasaariri, mitooto kuumi na myoolo myaluula.

²¹ Baatu badiiri, kampe baba mafuunda mataanu, kwahele kutaanga bakyeetu na baala.

Yesu wayende ha yulu mukaanda maampa

²² Hanaho, Yesu wakwiikisa bayiki mu kukoto mu bwaatu na batekesele ku simu dya mubu mu ntaangu yi kabvutula mampuumbu.

²³ Bu kamana kubvutula mampuumbu, nde wanwaata ku yulu mulaandu, ku lumperi mu kwesaambila. Nsinsika bu yatubuka, nde waba nde mukaka kukwo.

²⁴ Bwaatu bwaba bweki la dyalaka na butoto. Mipaku mya maampa myanyingisa bwaatu, bukuri kiteembu kyaba babwaana.

²⁵ Mu kitulu kya bina kya butsuku, Yesu wayende kuri bo mu kwedyaata, ha yulu mubu.

²⁶ Bayiki bu bamumono wukwedyaata ha yulu mubu, babwiilila kinkuuka, na baleele ti: «Kikyo kinyumbi!» Bo mu boomo bafula misaakulu.

²⁷ Hanaho, [Yesu] wadzoonso, waleele kuri bo ti: «Lwaatee kibakala, wumawu me, yaa luba na boomo ko!»

²⁸ Petelo waleele kuri nde ti: «Mfumu, mbuti wunde ye, lo ha lutumu, mpisi me nyiisa kuri ye, ha yulu mukaanda maampa.»

²⁹ Yesu waleele: «Wasa!» Petelo wasunduka mu bwaatu na wadyaata ha yulu mukaanda maampa, mu kweende kuri Yesu.

³⁰ Bu kamono kiteembu kya makwa, Petelo wabaka boomo, na wabaandika kudyaama, wafula misaakulu waleele ti: «Mfumu, bvuukisa me!»

³¹ Hanaho, Yesu walaambula kooko na wamukwaata, wamuleele ti: «Muutu wa kanyi dyantele! Buri ye bee sa mpaka?»

³² Bu bakoto mu bwaatu, kiteembu kyadzuuna.

³³ Baba mu bwaatu bamutsukumina na bamuleele ti: «Ngwanwa ye Mwaana Nzaambi!»

Yesu watsinikisa babeeru mu nkoonsi ya Ngenesareti

³⁴ Bamanaa kusabuka mubu, bo batubuka mu nkoonsi ya Ngenesareti.

³⁵ Bari kukwo bayaabaa ti wu Yesu, batsamukisa mvuumfu mu nkoonsi yoyinso, na baatu bamutwaalikila bobanso baba na mabeeru.

³⁶ Bamuyingukila kuri ti habee nkani, babelemene kwaandi ti yini nto kinkuta kya nde kitsu. Na bobanso babelemini babvuukiri.