Musamu wamubwete watina Matayi 13 - Musamu Wamubwete 2013

Nkuma ya mukuni

¹ Mu kiluumbu kikyo, Yesu kapalaa mu nzo, weedzakala ha simu dya mubu.

² Mampuumbu malaka makutukina mu mpele nde, kuri nde nweeti mu bwaatu, dzakiri, na mpuumbu yoyinso yisiiri ha simu.

³ Nde wabadzoonsolo kwalaka mu mankuma. Nde ti: «Mukuni wayende mu kweenyaka.

⁴ Mu ntaangu yi kaba mu kwenyaka, nsaangi dzamosi dzabwa ha luteembu lwa nzila. Banoni bayisa, na badzitootiri.

⁵ Dzakaka dzabwa ha matari, haho hahele butoto bwalaka. Dzo dzamene mu mawasu; ngo mu ntoono butoto bwaba bwahele na musundu,

⁶ ntaangu bu yatoomboko, mitwiikila myababuka, na bu myaba myahele na myaansi, myo myakana.

⁷ Dzakaka dzabwa ha yulu manseende, na manseende bu matoomboko madziswetekese.

⁸ Dzakimi dzabwa ha butoto bwabubwete na dzabuta. Miti myamosi myaha nkama bimbutu; myakaka makuumi masaamunu, na myakimi makuumi matatu.

⁹ Wunde wuri na makutu, hemese kayuka!»

Bukuri nki Yesu kari mu kwesalila mankuma?

¹⁰ Bayiki baandi bu bakokosolo kuri nde, bamufuula ti: «Mu nki ye wuri mu kwebadzoonsolo mu mankuma?»

¹¹ Nde wabvutula kuri bo ti: «Bukuri, kuri beenu baheeri kiteesu kya kuyaaba mpaanu dza Kimfumu kya mayulu; ngo kuri bo, bahele kuha.

¹² Mukwongo, kuri wunde wuri na kitotolo, sa bamuha, na sa kaba wabuukila mu bitotolo; ngo kasi, kuri wahele na kitotolo, sa bamuyisila na kikari na kyo.»

¹³ Hango nkuumbu, me nyiri mu kwebadzoonsolo mu mankuma, kuri heki baba bu bari mu kutala, bahele kumono, bu bari mu kuyuka, bahele kubakula,

¹⁴ na mbikukulu dza Esaya mu bo dzeensi mu mana; dzileele bu: "Beenu sa luyuka, ngo lubakula ko. Kutala, sa lwatala, ngo lumono ko.

¹⁵ Mukwongo mutima kaanda dimadi wayeki wakuba; bo bayeki bakiindisa makutu maaku, na bayeki bakaanga miisu myaaku, mu kubata ti bee bamwiini mu miisu, bee bayukiri mu makutu maaku, na kubata ti bee babakuri mu mutima, na kuyiinga madyeele; na ti me bee nyibatsinikisi."

¹⁶ «Kiminu kiri na beenu bukuri miisu myeenu mikwemono, na makutu meenu makweyuka.

¹⁷ Mukwongo, ngwanwa me nyiluleele ti: Babikiri balaka na baatu basuunguma se balaka baba batya kumono, ma lukwemono beenu, ngo basii mono ko; na kuyuka ma lukweyuka beenu, ngo basii yuka ko.»

Yesu wusundula nkuma ya mukuni

¹⁸ Ha yukee buri nkuma ya mukuni:

¹⁹ «Mpisi wuyuka maampu ma Kimfumu, ngo wahele kubakula, lo muutu wuri, ngaa-bubi bu kiisiri, dzikiri ma bakuninyee mu mutima waandi. Wunde ngo wuri bunu luteembu lwa nzila lubwiiri nsaangi.

²⁰ Wuri bunu butoto bwa matari bu bwiiri nsaangi, ngo muutu wuri kayukaa maampu, hanaho, wumataambiri mu kiminu,

²¹ ngo maampu mahele kubaka myaansi mu nde; nde muutu wa mwaa-ntaangu yantele. Manyoongi bunu pe nkwamusunu bu biisiri mu ntoono ya Maampu, hanaho nde bwiiri.

²² Wuri bunu butoto buri na manseende, bu bwiiri nsaangi, ngo muutu wuri kayukaa Maampu, ngo minyoongi mya nsi, na mawunu ma busina biswetikisi Maampu, na mo mahele kubuta bimbutu.

²³ Bari bunu butoto bwabubwete, bu bwiiri nsaangi, ngo babo bari bayuka Maampu, na bamabakula; bo ngo bari babuta bimbutu: bamosi nkama, bakaka makuumi masaamunu, bakimi makuumi matatu.»

Nkuma ya looso bo na lukengisi

²⁴ Yesu wabweese kubateele nkuma yikimi. Nde ti: «Kimfumu kya mayulu kyafwanikina na muutu wunyaka nsaangi dza looso mu nseke yaandi.

²⁵ Mu ntaangu yiri baatu bari tolo, mutaatu waandi wiisiri, nyakini nsaangi dza lukengisi munsa nseke, na weensi.

²⁶ Looso dyamene na dyabuta, lukengisi se lupala.

²⁷ Bangaamba ba muutu ngaa-nzo bu bakokosolo, bamuleele ti: "Mfumu, buri ye kari looso wanyakini mu nseke yaaku ko? Hango, lukengisi kuri lufumini?"

²⁸ Nde wabvutula kuri bo ti: "Mutaatu wayirikiri mya bubwo." Bangaamba baleele kuri nde ti: "Buri ye tiiri ti beetu tutsumuna lukengisi luri munsa nseke?"

²⁹ Nde waleele ti: "Pele! Bee lutsumini lukengisi na looso ha kimosi.

³⁰ Hemese byobyoolo byebuuka natee ku batolo. Tumi mu ntaangu ya kutolo, me mbasi-tsuku ndeele kuri babo batolo ti: Tekeselee kuyisila lukengisi, lukaanga lwo mu biko na kuyoko; tumi lukutikisa looso mu matalaka."»

Nkuma ya lusaangi lwa muti wuri nkuumbu sinapi

³¹ Yesu wabweese kubateele nkuma yikimi ti: «Kimfumu kya mayulu kyafwanikina na lusaangi lwa muti wuri nkuumbu sinapi, luri muutu kaholaana, kunini munsa nseke yaandi.

³² Lwo lubvuriri buntele mu nsaangi dzodzinso; ngo habaanaa lumwaabuuka, lo lubvuriri kudzaangama mu binkoolo byobinso, lo weki muti, wuri banoni ba yulu bakwiisa na batuunga madzaansa kunsa bimpaala byaandi.»

Nkuma ya lufunusu

³³ Yesu wabweese kubateele nkuma yikimi ti: «Kimfumu kya mayulu, kyafwanikina na lufunusu, luri mukyeetu bu kaluhoriri, yitiri biteesu bitatu munsa fufu, natee kuditoomboko dyodinso.»

Bukuri nki Yesu kakwedzoonsolo mu mankuma

³⁴ Myominso mimyo, Yesu mu mankuma kaba dzoonsaana kuri mampuumbu. Na nde ka kaba badzoonsolaana kwahele kusalila mankuma ko.

³⁵ Mpisi heki maleele mubikiri, meende mu mana. Nde waleele ti: «Me sa dzoonsolo mu mankuma; me sa nyaabisa myasweeke kuholosono kunu nyirikulu [nsi].»

Yesu wasundula nkuma ya looso bo na lukengisi

³⁶ Yesu wasisa mampuumbu, wayende ku nzo. Bayiki baandi bakokosolo na bamuleele ti: «Sundukila beetu nkuma ya lukengisi lwa manseke.»

³⁷ Yesu wabvutula kuri bo ti: «Wunde wukwenyaka nsaangi dza looso ngo Mwaana muutu,

³⁸ nseke ngo nsi; nsaangi dzadzibwete ngo baala ba Kimfumu, lukengisi ngo baala ba Ngaa-bubi,

³⁹ mutaatu wukwenyaka nsaangi dza lukengisi, ngo dyabulu; ntolulu ngo nsukulu ntaangu, batori ngo bambasi.

⁴⁰ Hango, bunu bu bayisila lukengisi na kuluyoko [lwolunso] bunubwo se buba ku nsukulu ntaangu.

⁴¹ Mwaana muutu sa kaheeke bambasi baandi, na sa bapalisa mu Kimfumu kyaandi, bobanso bakwebwiisa bambaasi mu masumu, na bakwesalila bubayi,

⁴² Sa babalooso ku munyeenge mbaawu, kukwo kuba bidilu na nkweetulu miinu.

⁴³ Haho, basuunguma mbasi-tsuku baseme bunu ntaangu, mu Kimfumu kya Taayi dya bo. Wuri na makutu hemese kayuka!»

Busina bwasweeku na musaanga.

⁴⁴ «Kimfumu kya mayulu kyafwanikina, na busina bwasweeku munsa nseke, ngo muutu kamwiini, sweekiri. Mu ntoono kiminu ki kari na kyo, nde weensi yarikiri byobinso bikari na byo, na wiisiri kusuumba nseke yiyo.»

⁴⁵ «Kimfumu kya mayulu kyabweese kufwanikina na muutu ngaa-mumbungu wukwesaka misaanga myamibweete.

⁴⁶ Bu kadzuukiri musaanga mosi wantalu, weensi yarikiri byobinso bi kari na byo, na wiisiri kusuumba musaanga wunde.»

Nkuma ya siinga

⁴⁷ «Kimfumu kya mayulu kyabweese kufwanikina na siinga di batubiri mu mubu, ditolo bya bitsuumbu ngo bitsuumbu.

⁴⁸ Bu diluuriri, baditoombiri ku nkoto. Na baatu bu badzakiri, basooriri byabibwe basokiri mu mansakasa, byabibi baloosiri.

⁴⁹ Bunubwo se mbasi-tsuku buba ku nsukulu ntaangu. Bambasi sa biisa, sa bayisila bababi ha kakati dya basuuguma,

⁵⁰ sa batuba bababi ku munyeenge mbaawu. Kukwo mbasi-tsuku kuba bidilu na nkweetulu miinu.»

Bitotolo byamoono na byabikulu

⁵¹ «Buri beenu lubakula momanso mamo?» Bo babvutula ti: «Heehe».

⁵² Yesu waleele kuri bo ti: «Hango-nkuumbu, mpisi mutini mangisi weki muyiki wa Kimfumu kya mayulu, wafwanikini na muutu ngaa-nzo, wupalisa mu kisweekulu kyaandi, bitotolo byamoono na byabikulu.»

Yesu bamubele ku Nadzareti

⁵³ Yesu kamanaa kuta mankuma mamo, ha kayende.

⁵⁴ Bu katubuka ku nkoonsi ya nde-meene, nde wabayikisa mu nzo-nkutukunu ya bo-meene, mu kiteesu kiri bo bakimuka na baleele ti: «Kuri kabakiri madyeele ma, na bimaangu bi?

⁵⁵ Buri wu kari mwaana mutuungi manzo ko? Buri nguri yaandi kari Mariya ko, na bampaangi baandi, kari Yakobo, Yosefi, Simoni na Yuda ko?

⁵⁶ Na bibusi byaandi byobinso, buri bahele na beetu? Kuri, kabakiri momanso ma?»

⁵⁷ Bo babumina makya mu ntoono ya nde. Yesu waleele kuri bo ti: «Mubikiri, bahelaa kumukiinsa, bani ba ha bula bwaandi na bari mu kaanda dyaandi.»

⁵⁸ Yesu kasii yirika bimaangu byalaka kukwo ko, bukuri bo baba bahele na kanyi.